Sukamiernik pra padazravanaha ŭ vyrabie vybuchoŭki mahiloŭca: «Chacieŭ zrabić zbroju, jakoj jašče nie isnuje»
Aktyvist apazycyi Stanisłaŭ Paŭlinkovič z Mahilova siadzieŭ u adnoj kamery z amataram-vybuchatechnikam, jaki majstravaŭ vybuchovyja prystasavańni.
Mahiloŭskaja milicyja zatrymała žychara abłasnoha centru, jaki padazrajecca ŭ vyrabie vybuchovaniebiaśpiečnych rečyvaŭ. Pra heta havorycca na sajcie Ŭpraŭleńnia ŭnutranych spraŭ Mahiloŭskaha abłvykankamu.
Vyzvaleny siońnia siabar arhkamitetu Biełaruskaj sacyjał-demakratyčnaj partyi «Narodnaja hramada» Stanisłaŭ Paŭlinkovič siadzieŭ u adnoj kamery z hetym 23-hadovym mahiloŭcam. Pavodle aktyvista, chłopca zatrymali 16 žniŭnia. Jon byŭ duža pryhniečanym. Zakłapočana chadziŭ pa kamery.
«Skazaŭ, što jon samavuk-vybuchatechnik. Zachaplajecca chimijaj. Majstravaŭ roznyja vybuchovyja pryłady i nie čakaŭ, što jaho zatrymajuć, a kali skazali, što jamu pahražaje da 7 hadoŭ kalonii, to emacyjny stan jaho jašče bolej pahoršyŭsia. Kazaŭ, što jamu chacieli vystavić abvinavačvańnie ŭ teraryźmie. Vadzili na dopyty. Ź ich jon viartaŭsia znervavanym», — apaviadaŭ Stanisłaŭ Paŭlinkovič.
Z apoviedu sukamernika Paŭlinkovič zrazumieŭ, što taho zatrymali ŭ haražy. Milicyjanty znajšli vadkaść, ź jakoj možna vyrabić vybuchovaje rečyva.
«Adšukali taksama patrony i samarobnuju zbroju, jakaja stralała sa znojdzienych patronaŭ, — pryhadaŭ aktyvist. — Kazaŭ, što źbiraŭsia zmajstravać zbroju, jakoj jašče nie isnuje. Dziela čaho jon rabiŭ vybuchoŭku, nie kazaŭ. Niepakoiŭsia, što pačali dapytvać jahonych siabroŭ i tyja, jak jon zaznačaŭ, mohuć aby-čaho na jaho nahavaryć».
Pavodle Paŭlinkoviča, amatara-vybuchatechnika zabrali z kamery siońnia ŭnačy.
«Mianie i jašče adnaho siadzielca, u jakoha było kryminalnaje minułaje, duža ździviła, kali pa jaho pryjšli ŭnačy. Skazali: «Na vychad z rečami», ale ŭ izalatary jaho nie pakinuli. Moža, kudy ŭ Miensk u KDB pavieźli. Nam było strašna, kali jaho zabirali», — skazaŭ jon.
Paviedamleńnie pra zatrymańnie 23-hadovaha mahiloŭca źjaviłasia na sajcie ŭpraŭleńnia ŭnutranych spraŭ Mahiloŭskaha abłvykankamu 18 žniŭnia. U im adznačajecca, što ŭ haražy, jaki zdymaŭ u znajomaha zatrymany, byli vyjaŭlenyja rečyvy, prydatnyja dla vyrabu vybuchoŭki.
Pavodle namieśnika načalnika abłasnoha ŭpraŭleńnia milicyi Alaksandra Vasiljeva, padčas ahladu miesca žycharstva padazravanaha taksama byli vyjaŭlenyja chimičnyja kampanenty dla vyrabu vybuchovych rečyvaŭ i prystasavańniaŭ, samarobnyja pradmiety, vyhladam padobnyja na ahniastrelnuju zbroju i bojeprypasami da jaje.
«Papiarednie supracoŭnikami milicyi vyśvietlena, što zatrymany vyrablaŭ samarobnyja prystasavańni, nabityja ćvikami, šrubami dy śvincom. Ich jon vypraboŭvaŭ na adkrytaj miascovaści», — skazana ŭ paviedamleńni na sajcie UUS
Kamientary