Mahiloŭca prysudzili da paŭhoda kałonii za raspalvańnie varožaści da rasiejcaŭ i habrejaŭ

Žychara Mahilova Alaksieja Kuźmina asudzili na paŭhoda kałonii ahulnaha režymu za raspalvańnie nacyjanalnaj varažniečy. Jaho źvinavacili pavodle 1 častki 130 artykuła Kryminalnaha kodeksu — «Naŭmysnyja dziejańni, skiravanyja na ŭzbudžeńnie nacyjanalnaj varažniečy», paviedamlaje Radyjo Svaboda.

Alaksiej Kuźmin

Pavodle śledztva, Kuźmin raźmiaščaŭ u internecie zakliki da hvałtu i źniščeńnia rasiejcaŭ, habrejaŭ dy narodaŭ Kaŭkazu, a taksama infarmacyju, jakaja źnievažaje ichnyja honar dy hodnaść. Padsudny svaju vinu pryznaŭ i raskajaŭsia.

«Ja ŭśviadomiŭ svaju vinu i zrazumieŭ, što zrabiŭ vialikuju duraść. Prašu ŭličyć, što ad maich dziejańniaŭ nichto nie paciarpieŭ i nichto nie skarystaŭsia ź ich tak, jak ja pisaŭ. Heta samaje hałoŭnaje. Adzinaje, prašu nie pazbaŭlać mianie svabody», — skazaŭ u apošnim słovie Alaksiej Kuźmin.

Zatrymali Kuźmina sioleta 9 žniŭnia supracoŭniki KDB. Z taho dnia jon zastavaŭsia pad vartaj. U sudovaj zale siadzieŭ u kletcy.

Vykryli Kuźmina supracoŭniki ŭpraŭleńnia ŭnutranych spraŭ Mahiloŭskaha abłvykankama. Milicyjanty źviarnuli ŭvahu na raźmieščanyja ŭ adnoj z supołak materyjały z nacysckaj simvolikaj i vykazvańni, skiravanyja na raspalvańnie nacyjanalnaj varažniečy. Na toj samaj staroncy byŭ raźmieščany pratakoł administracyjnaha pakarańnia Kuźmina za demanstracyju ŭ internecie nacysckaj symboliki.

Pavodle prakurora Taciany Amosavaj, Alaksiej Kuźmin u 2014 hodzie zacikaviŭsia palityčnymi pracesami va Ŭkrainie, praniknuŭsia pohladami ŭltrapravych arhanizacyj, paśla čaho i pačaŭ varoža stavicca da habrejaŭ i rasiejcaŭ. Svajo niehatyŭnaje staŭleńnie da habrejaŭ Kuźmin tłumačyŭ tym, što jany pazajmali va Ŭkrainie klučavyja pasady, imknucca da ŭzbahačeńnia za košt inšych. A da rasiejcaŭ jon staviŭsia admoŭna za ichnija impierskija ambicyi adnosna inšych krain.

Kuźmin, kazała pradstaŭnica dziaržaŭnaha abvinavačvańnia, stvaryŭ u sacyjalnaj sietcy Ukantakcie supołku, u jakoj raźmiaščaŭ publikacyi ź niehatyŭnym staŭleńniem da rasiejcaŭ, habrejaŭ i narodaŭ Kaŭkaza. Amosava spasłałasia na słovy Kuźmina, što jon uśviedamlaŭ nastupstvy svaich dziejańniaŭ. Kab papularyzavać svaju supołku, jon štučna pavialičvaŭ jaje naviedvalnaść.

Prakuror prasiła sud pakarać Kuźmina adnym hodam pazbaŭleńnia voli ŭ kałonii ahulnaha režymu.

Advakat prasiŭ sud dać jahonamu padabaronnamu pakarańnie, minimalna mahčymaje pa inkryminavanym abvinavačańni. Jon prasiŭ uličyć stanoŭčyja charaktarystyki padsudnaha, a taksama toje, što raźmieščanyja ŭ internecie materyjały nie nanieśli škody hramadztvu.

Sudździa Ryhor Kačałaŭ prysudziŭ Kuźminu paŭhoda kałonii ahulnaha režymu.

Asudžany maje prava źviarnucca z prośbaj pra ŭmoŭna-daterminovaje vyzvaleńnie.

• 0
• 0
• 0
• 0
• 0
• 0
• 0
• 0