10 śniežnia pačałosia vyłučeńnie kandydataŭ na vybary miascovych savietaŭ 18 lutaha 2018 hodu. Jakija płany na hetyja vybary ŭ apazicyjnych palitykaŭ, vyśvietliła «Radyjo Svaboda».
«Havary praŭdu» pačała zbor podpisaŭ
Kampanija «Havary praŭdu» choča stvaryć kala 180 inicyjatyŭnych hrup — heta najbolš z demakratyčnych partyjaŭ i ruchaŭ. Lidery kampanii taksama ŭdzielničajuć u vybarach. Taciana Karatkievič budzie zmahacca za miesca ŭ harsaviecie Miensku. Jana abrała Zasłaŭskuju akruhu — tamsama, dzie jana balatavałasia na vybarach u Pałatu pradstaŭnikoŭ u 2012 hodzie. Andrej Dźmitryjeŭ pazmahajecca za miesca ŭ Mienskim abłasnym saviecie. Jon ciapier žyvie ŭ vioscy Voŭkavičy i balatujecca ŭ Fanipalskaj vybarčaj akruzie.
Kiraŭnik vybarčaha štabu Siarhiej Vaźniak kaža, što kandydaty kampanii mohuć vyłučacca tolki praz zbor podpisaŭ.
«I niekatoryja vyrašyli nie adkładvać hetuju spravu. Pieršaj 93 podpisy vybarnikaŭ pry nieabchodnych 75 sabrała ŭ niadzielu naša viadomaja aktyvistka Taciana Hutarava. Jana balatujecca ŭ haradzki saviet Babrujsku».
Kandydaty ad AHP balatujucca adrazu ŭ dva saviety
«Pryjarytetam dla Abjadnanaj hramadzianskaj partyi stanie vyłučeńnie adnaho i taho ž kandydata ŭ dva saviety adnačasova: haradzki i abłasny», — kaža namieśnik staršyni partyi Vasil Palakoŭ. Na jaho dumku, heta adkryvaje padvojnyja mahčymaści, u tym liku i infarmacyjnyja.
AHP padała bolš za 20 zajavak na rehistracyju inicyjatyŭnych hrup. Častka aktyvistaŭ skarystajecca vyłučeńniem ad partyi, kali projduć partyjnyja schody i kanferencyi.
Partyja BNF robić staŭku na moładź
Asnoŭnaja zadača na hetych vybarach — abkatać moładź, kaža staršynia partyi BNF Ryhor Kastusioŭ.
«Z paŭsotni patencyjnych kandydataŭ pieravažnaja balšynia — maładyja ludzi. Adnak im treba i prykład pakazvać. Tamu ja asabista balatujusia ŭ Mahiloŭski abłasny saviet pa Škłoŭskaj haradzkoj vybarčaj akruzie. U rajonny saviet ja nie źbirajusia, bo mianie i tak kožny ŭ Škłovie viedaje. A za miesca ŭ abłasnym saviecie budu zmahacca».
Ruch «Za svabodu» abiraje Miensk
Samaja mocnaja hrupa kandydataŭ — u Miensku, kaža kiraŭnik ruchu «Za svabodu» Juraś Hubarevič.
«My majem u stalicy 10 pretendentaŭ. Usie jany ŭžo pačali zbor podpisaŭ. U tym liku i ja. U mianie Akademičnaja akruha. Heta taja ž samaja aŭdytoryja vybarnikaŭ, ź jakoj ja pracavaŭ letaś padčas kampanii ŭ Pałatu pradstaŭnikoŭ».
BCHD addaje pryjarytet rehijanałam
Niezarehistravanaja partyja Biełaruskaj chryścijanskaj demakratyi addaje pieravahu aktyvistam, jakija ŭžo pracavali ŭ svaim rehijonie. Jak tłumačyć sustaršynia BCHD Vital Rymašeŭski, usiaho budzie kala sotni kandydataŭ.
«Absalutnaja balšynia ź ich i raniej pravodzili tut roznyja kampanii. Ich dobra ŭsie viedajuć, i jany majuć usiu infarmacyju pra specyfiku svaich rehijonaŭ. Tamu, kali b vybary byli česnymi i sumlennymi, to my mieli b davoli šmat deputataŭ».
Sustaršyni BCHD sami nie vyłučajucca. Jany buduć davieranymi asobami ŭ niekalkich dziasiatkaŭ kandydataŭ.
«Spraviadlivy śviet» pieraaryjentavaŭsia na sielsaviety
Biełaruskaja partyja levych «Spraviadlivy śviet» na hetych vybarach budzie vyłučać svaich kandydataŭ nia tolki ŭ abłasnyja i haradzkija saviety, ale i ŭ sielskija i pasiałkovyja.
Jak kaža kiraŭnik partyjnaha vybarčaha štabu Valer Uchnaloŭ, tak robicca ŭpieršyniu.
«Praktyka papiarednich vybaraŭ pakazała — znajści achvotnych balatavacca ŭ sielsaviet ciažka nia tolki apazycyi, ale i ŭładzie. Tamu pasprabujem źmianić taktyku — «apuścimsia» na samy nizki rovień i pahladzim, što z hetaha atrymajecca».
Što dalej?
Vyłučeńnie kandydataŭ u deputaty praciahniecca da 8 studzienia. Kandydataŭ mohuć vyznačać palityčnyja partyi, hramadzkija arhanizacyi, a taksama hramadzianie šlacham zboru podpisaŭ.
Kamientary