Uzłamany sajt Bsblog.info, na im panapisvali antyrasijskich tezisaŭ
Sajt Bsblog.info, jaki ŭznačalvaje były milicejski śledčy, analityk Andrej Parotnikaŭ, 14 śniežnia byŭ uzłamany. U materyjał pra kamandziroŭku Parotnikava ŭ Rumyniju byli dadadzienyja antyrasijskija vykazvańni. Pryčym zroblena heta było dastatkova nieachajna.
«Impierskaja niamytaja Rasija», «PaRaša» — vidavočna, što takija vyrazy nie budzie vykarystoŭvać nivodzin ekśpiert. U vyniku Parotnikavu prypisali słovy, što Rasija moža rychtavać terakty i zabojstvy viadomych ludziej na Bałkanach.
Admietna, praz kaho hetyja «źmieny» stali viadomyja hramadskaści. Heta apublikavaŭ niechta «Vital Makarevič», najchutčej, fejkavy akaŭnt, jaki nakiravany na toje, kab pijaryć artykuły z prarasijskaha «Imchakłaba». A adzinym kamientataram staŭ hałoŭny redaktar «Imchakłaba» Alaksiej Dzierman.
«Akaŭnt na fejsbuku vykarystoŭvajecca dla raskrutki materyjałaŭ ź biełaruskaj halinki adnaho łatvijskaha sajta. Jaho ŭznačalvajuć ludcy, jakija stajać na ŭliku ŭ łatvijskaj palicyi pa starych spravach za ekstremizm. A ŭ łatvijskich śpiecsłužbach, nakolki mnie viadoma, — jak asoby, jakija supracoŭničali sa śpiecsłužbami SSSR/Rasii. Samo saboj, što i łatvijskaje «dreva», i jaho ssochłaja biełaruskaja «halinka» palivajucca hrašyma rasijskich piensijanieraŭ praz Rassupracoŭnictva, Fond Harčakova i padobnyja kantory», — napisaŭ Parotnikaŭ.
Redaktar Bsblog'a zhadvaje, što niedzie viasnoj niešta padobnaje zdaryłasia z sajtam baranavickaj niezaležnaj haziety «Inteks-pres», kali ŭ stary materyjał byli dadadzienyja zhadki pra analitykaŭ Juryja Caryka i Arsiena Sivickaha. Tady pra hety vypadak taksama stała viadoma z fejkavych akaŭntaŭ u fejsbuku.
Paratnikaŭ kaža, što zroblena ŭsio było dastatkova prafiesijna. Usie ślady ŭzłomu pačyščanyja. «Heta rabili ludzi ź vielmi dobrym viedańniem spravy, jany znajšli, dzie jość pravały ŭ sistemie», — adznačaje jon.
Dla čaho heta moža rabicca? «U Rasii kryminalnyja spravy zavodziacca navat za reposty ŭ sacyjalnych sietkach. Mahčyma, mianie zachacieli zrabić nieŭjaznym u Rasiju. U toj ža Bucharest ja lacieŭ praz Maskvu.
Druhaja maja viersija: pakazvajuć, što našy mahčymaści bolšyja za vašyja. Typovaja hebešnaja praktyka. Kali b jany chacieli sajt pavalić, to pavalili b. A tak prosta demanstrujuć svaju siłu. Pa ŭsim vidać, što heta ŭschodniaja aktyŭnaść, našy tak nie pracujuć», — ličyć Andrej Parotnikaŭ.
Taksama analityk kaža, što niekalki dzion tamu jamu pastupiŭ dziŭny zvanok, nibyta ad žurnalistaŭ, jakija rychtujuć materyjał «da 100-hodździa KDB». «Zadavali pytańni adnosna struktury, kolkaści. Ja adrazu skazaŭ, što heta tyčycca dziaržasakreta i admoviŭsia dalej razmaŭlać», — kaža Parotnikaŭ.
-
Łukašenka na pieramovach u Amanie ŭstaviŭ takoje słova, što pierakładčyca na arabskuju razhubiłasia
-
U Lidzie pabralisia šlubam 15‑hadovyja chłopiec i dziaŭčyna. Samaj maładoj mamie Hrodzienščyny taksama 15
-
«U płanie byli jašče niekalki krain». Maršrut Łukašenki składali tak, kab nie nadta biła pa zdaroŭi
Ciapier čytajuć
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy29
Kamientary