Jarmošyna ŭ videazvarocie vybačyłasia pierad barysaŭcam. Chto hety mužčyna?
U svaim videazvarocie staršynia Centrvybarkama Lidzija Jarmošyna raskrytykavała pracu Barysaŭskaj rajonnaj vybarčaj kamisii za toje, što taja admoviła ŭ rehistracyi kandydatam u deputaty invalidu-vazočniku z-za techničnaj pamyłki ŭ dakumientach, paviedamlaje ex-press.by.
Jarmošyna skazała, u pryvatnaści, što barysaŭskaja kamisija prajaviła «i biazdušnaść, i čerstvaść, i abyjakavaść». I ŭ vyniku hetaha (!) pretendentam była ździejśniena pamyłka pry padačy dakumientaŭ. Pamyłka techničnaja, jana mahła być zaŭvažanaja siabrami kamisii.
Jarmošyna vybačyłasia pierad mahčymym kandydatam i paviedamiła, što nie maje prava admianiać rašeńnie Barysaŭskaj vybarčaj kamisii.
Chto hety čałaviek, pierad jakim vybačyłasia Jarmošyna?
Barysaŭca kličuć Alaksandr Makarčuk. Jon całkam paralizavany, što nie pieraškodziła jamu arhanizavać ułasny biznes i stać sacyjalna aktyŭnym členam hramadstva.
Pa jaho bijahrafii možna zdymać kino.
Jon naradziŭsia ŭ nieščaślivaj siamji, maci była pazbaŭlenaja baćkoŭskich pravoŭ, vychoŭvaŭ dzied, były vajskoviec. Ź piatnaccaci hadoŭ pačaŭ pracavać, kab padtrymać siabie i małodšaha brata. Pracavaŭ na budoŭli i sanitaram, tamu paśla vośmaha kłasa pryjšłosia syści sa škoły.
U šasnaccać hadoŭ zachvareŭ i apynuŭsia ŭ invalidnym vazku. Užo ŭ hetym stanie źviazaŭsia z drennaj kampanijaj i byŭ sudzimy. Ažaniŭsia. Praz materyjalnyja ciažkaści siamja pradała kvateru ŭ Minsku i pierajechała ŭ Barysaŭ.
U 2009 hodzie zdoleŭ atrymać siaredniuju adukacyju. Atestat Makarčuka byŭ najlepšym u jaho vypusku. U hetym ža hodzie ad jaho syšła žonka, nie vytrymaŭšy materyjalnych ciažkaściaŭ i inšych niahod.
Paśla razvodu Alaksandr asvoiŭ kiravańnie kampjutaram hołasam. U pačatku 2010 hoda zapuściŭ svoj pieršy sacyjalny prajekt «Biez abmiežavańniaŭ» pa dapamozie i reabilitacyi paralizavanych ludziej. Navučyŭsia raspracoŭvać sajty i zarablać na hetym. Dziakujučy dapamozie siabroŭ zmoh pastupić u VNU, byŭ zaličany na fakultet hramadzianskaha prava i pracesu Mižrehijanalnaha adkrytaha sacyjalnaha instytuta RF.
U 2014 hodzie skončyŭ kursy instytuta IBA pa sistemnym administravańni. Pa vynikach kursaŭ była praviedziena respublikanskaja alimpijada, u jakoj Alaksandr zaniaŭ pieršaje miesca. Paśla hetaha im zacikavilisia pracadaŭcy, i jon atrymaŭ pracu sistemnaha administratara. Pracavaŭ addalena, absłuhoŭvajučy kampjutarny park dźviuch kampanij u Maskvie. Samastojna asvoiŭ šerah prafiesij IT-śfiery: prahramista, teściroŭščyka, śpiecyjalista infarmacyjnaj biaśpieki, IT-rekrutary.
Novyja viedy i ŭmieńni dazvolili Alaksandru Makarčuku nie tolki stać paŭnavartasnym padatkapłacielščykam, ale i nabyć kvateru, finansavać dabračynnyja mierapryjemstvy.
Vosieńniu 2015 hoda Alaksandr pastupiŭ u Vyšejšuju škołu biznesu i kiravańnia, skončyŭ na vydatna. Dypłomny prajekt byŭ pryśviečany dystancyjnaj adukacyi dla ludziej ź invalidnaściu.
Alaksandru ŭdałosia sabrać kamandu ludziej z abmiežavanymi mahčymaściami, jakija dasiahnuli pośpiechu i pryznańnia. Jany dzielacca svaimi viedami i ŭmieńniami, što dapamahaje asablivym ludziam pavieryć u siabie i reintehravacca ŭ hramadstva. U prajekcie ŭžo ŭdzielničaje 35 čałaviek.
Metavaja aŭdytoryja prajekta — maładyja invalidy i ich sacyjalnaje asiarodździe. Heta dobraja sprava całkam realizujecca ŭłasnymi siłami, dziakujučy asabistamu entuzijazmu i dapamozie vałancioraŭ. Prajekt nie zaležyć ad čužych hrošaj.
Pačynańnie atrymała hramadskaje pryznańnie. Prajekt Makarčuka vyjšaŭ u finał Social Weekend 2016 hoda, a ŭ mai 2017 hoda prajekt zaniaŭ pieršaje miesca ŭ konkursie SND «Śviet roŭnych mahčymaściaŭ» siarod 490 udzielnikaŭ.
U lutym 2017 hoda Alaksandr Makarčuk aficyjna zarehistravaŭ IP i pačaŭ pracavać na siabie i spryjaŭ pracaŭładkavańniu ludziej ź invalidnaściu. Byŭ pryznany pracadaŭcam hoda.
Raspavieści pra dośvied pracy jaho zaprašali na navukovuju kanfierencyju ŭ BDUIR, dzie Alaksandr vystupiŭ z hruntoŭnym dakładam «Prablemy dystancyjnaj adukacyi ŭ Biełarusi».
Čamu taki čałaviek zachacieŭ ŭdzielničać u vybarčaj kampanii?
Voś jak pra heta jon napisaŭ sam:
«Majučy vopyt pieraadoleńnia ciažkich žyćciovych abstavinaŭ, nie majučy siamji i dziaciej, chaču prynieści karyść hramadstvu, prynieści svajoj hramadskaj dziejnaściu karyść tym, chto maje patrebu ŭ hetym bolš za ŭsio».
Nahadajem, Barysaŭskuju rajonnuju vybarčuju kamisiju ŭznačalvaje Pavieł Žuha, jaho namieśnik — Jaŭhien Haŭrylčyk, sakratar kamisii — Natalla Złobič.
Kamientary