Pad Baranavičami kazaki samavolna pastavili antyŭnijackija kryžy FOTY
U pieršaj pałovie studzienia la viosački Kołbavičy Baranavickaha rajona aktyvistami arhanizacyi «Kazacki Spas» byli ŭstalavanyja dva kryžy. Na adnym dubovym kryžy vykanany nadpis pa-rusku «Adrynutyja hvałtam (1596)», na druhim — «Uźjadnanyja luboŭju (1839)».
Heta padziei źviazanyja z unijactvam. 1596 — hod padpisańnia Bresckaj unii. 1839 — hod skasavańnia unii ŭ Rasijskaj Impieryi. Z apošnim nadpisam vypuskaŭsia miedal u Rasijskaj Impieryi.
Cikava, što kazaki vyrašyli nie apubličvać miesca, dzie byli ŭstalavanyja hetyja kryžy. Zatoje prailustravali heta cytataj biskupa Siamaški ab nieabchodnaści skasavańnia unii.
Pobač z Kołbavičami na ŭźbiarežžy Ščary pabudavany turystyčny kompleks. Budavali jaho z udziełam rasijskaha kapitału. Najpierš na hetym miescy była ŭźviedzienaja kaplička ŭ honar Maci Božaj «Žyvanosnaja krynica».
Za kapličku adkazvaje nastajaciel carkvy Śviatoha Antonija ŭ vioscy Padhornaja ajciec Anatol Paškievič. Mienavita jon udzielničaŭ u aśviačeńni tych kryžoŭ. «Mianie paprasili — ja aśviaciŭ, kryžy ž našy, pravasłaŭnyja. Ludzi z horada prasili, jany źviazanyja z maskoŭskim kazactvam. Heta znak taho, što ŭnijaty viarnulisia ŭ pravasłaŭje».
Kali my spytali ŭ baciuški, ci nie ličyć jon, što kryžy mohuć pakryŭdzić unijackich viernikaŭ, to śviatar adkazaŭ: «Dziakuj, što źviarnuli ŭvahu, ja padumaju pra heta».
Pa słovach Anatola Paškieviča, baranavickija kazaki ablubavali hetaje miesca ŭ Kołbavičach. «Jany tudy časta pryjazdžajuć, akunajucca, vadu nabirajuć, u hryby chodziać».
Śpiavak Dźmitryj Kałdun pakazaŭ svaju minskuju kvateru niedaloka ad Drazdoŭ ŠMAT FOTA15
Kamientary