Uma Turman narešcie patłumačyła, čamu ličyć, što Vajnštejn «nie zasłuhoŭvaje kuli»
Halivudskaja aktrysa Uma Turman u intervju New York Times raspaviała, što stała achviaraj seksualnych damahańniaŭ z boku pradziusara Charvi Vajnštejna. Taksama jana zhadała zdradu Kviencina Tarancina, praź jakuju ledź nie zahinuła ŭ aŭtakatastrofie na zdymkach «Zabić Biła».
Turman vykazała svajo staŭleńnie da skandału vakoł Vajnštejna jašče ŭ minułym listapadzie, napisaŭšy: «Mnie padabajecca, što ŭsio idzie pavolna — ty nie zasłuhoŭvaješ kuli».
Tady jana nie stała padrabiazna raskazvać pra svaje pretenzii da Vajnštiejna, paabiacaŭšy zrabić heta, kali jaje «hnieŭ krychu ścichnie».
U subotu hazieta New York Times apublikavała vialiki artykuł pad nazvaj «Voś čamu Uma Turman u lutaści». Nižej pryvodzim vytrymki ź jaho.
U pryvatnaści aktrysa śćviardžaje, što Vajnštejn zaprasiŭ jaje ŭ svoj numar u łondanskim hateli ŭ 1990-ja hady, šturchnuŭ na łožak i pasprabavaŭ raspranuć.
Pradstaŭnik Charvi Vajnštejna ŭžo zajaviŭ, što abvinavačvańni ŭ napadzie na aktrysu nie adpaviadajuć rečaisnaści.
47-hadovaja zorka zajaviła, što ŭ 16 hadoŭ, na pačatku jaje karjery, jaje zhvałtavaŭ nienazvany akcior, jaki byŭ na 20 hadoŭ starejšy, čym jana.
«Pa sutnaści ja była pasłuchmianaj, — raskazała jana vydańniu. — Ja sprabavała skazać nie, ja płakała, ja rabiła ŭsio, što mahła. Jon skazaŭ mnie, što dźviery začynienyja, ale ja nie pabiehła i nie pasprabavała adčynić».
«Kali ja pryjšła dadomu, ja pamiataju, što stajała pierad lusterkam i hladzieła na svaje ruki. I ja była vielmi złaja, što na ich nie było ni kryvi, ni siniakoŭ», — dadała jana.
Abvinavačvańni na adras Vajnštejna tyčacca času pośpiechu filma «Kryminalnaje čytvo» 1994 hoda, jaki źniaŭ Kviencin Tarancina i spradziusavaŭ Vajnštejn.
Incydent, mierkavana, adbyŭsia ŭ numary pradziusara ŭ łondanskim hateli Savoy.
«Jon šturchnuŭ mianie. Jon sprabavaŭ zaleźci na mianie. Jon išoŭ na lubyja niepryjemnyja rečy, — raspaviała aktrysa. — Adnak u vyniku jon usio ž taki nie pajšoŭ da kanca i nie staŭ mianie prymušać. Ty jak žyvioła, jakaja sprabuje vyśliznuć, jak jaščarka».
Pavodle jaje słoŭ, na nastupny dzień jana atrymała bukiet kvietak z zapiskaj: «U ciabie vydatnyja instynkty». Paśla asistenty Vajnštejna praciahvali telefanavać z prapanovami novych prajektach.
Jakaja reakcyja Vajnštejna?
Pradstaŭnik Charvi Vajnštejna (sam pradziusar ciapier prachodzić reabilitacyju) apublikavała zajavu paśla publikacyi artykuła.
U joj havorycca, što kamanda pradziusara źviazvałasia z New York Times i dasyłała zdymki, «jakija demanstrujuć ciesnyja suviazi Vajnštejna i Turman».
U haziecie pryznali, što atrymali «siabroŭskija» fota pary na premjerach filmaŭ i viečarynkach.
«Vajnštejn pryznajecca ŭ niajomkaj sprobie zalacańniaŭ da Turman 25 hadoŭ tamu ŭ Anhlii — paśla niapravilnaha razumieńnia jaje sihnałaŭ, paśla flirtu ŭ Paryžy, — za jakuju jon nieadkładna vybačyŭsia i pra jakuju hłyboka škaduje», — havorycca ŭ zajavie.
«Adnak jaje zajavy pra fizičny hvałt nie adpaviadajuć rečaisnaści. Padčas niajomkich zalacańniaŭ Vajnštejna nie było nijakaha fizičnaha kantaktu, i jon zasmučany i źbiantežany tym, čamu Turman… čakała 25 hadoŭ, kab apublikavać hetyja abvinavačvańni», — napisali pradstaŭniki pradziusara.
A jak ža Kviencin Tarancina?
Turman taksama padrabiazna raspaviała pra časovy razryŭ adnosin z režysioram Kviencinam Tarancina, jaki razam z Vajnštejnam pracavaŭ nad «Kryminalnym čytvom» i «Zabić Biła» — samymi paśpiachovymi karcinami Turman.
Jana raspaviała, što pasvaryłasia z Tarancina praz avaryju na zdymkach «Zabić Biła». Pavodle jaje słoŭ, Tarancina byŭ u lutaści, što jana chacieła vykarystoŭvać kaskadziora padčas zdymak sceny ŭ kabryjalecie, niahledziačy na mahčymuju niaspraŭnaść aŭtamabila. U vyniku jon pierakanaŭ jaje samu vieści mašynu. Adbyłasia avaryja, i aktrysa paškodziła šyju i kaleni.
Incydent paŭpłyvaŭ na adnosiny pary. Turman pahražała zasudzić studyju Vajnštejna, adnak joj 15 hadoŭ nie davali dostupu da kadraŭ avaryi.
Tarancina pakul nie kamientavaŭ abvinavačvańni aktrysy.
Ciapier čytajuć
«Ad biazvychadnaści źjeździŭ u Biełaruś, dzie jamu zrabili apieracyju». Pabracim raskazaŭ, što viadoma pra aryštavanaha kalinoŭca Andreja Siarhiejeva1313
Kamientary