Pačalisia sudy nad mierkavanymi špijonami: u Minsku sudziać ukrainskaha, u Čarnihavie — biełaruskaha
12 lutaha ŭ Biełarusi i va Ukrainie pačalisia pracesy nad padazravanymi ŭ špijanažy. U Minsku razhladajuć spravu ŭkrainskaha žurnalista Paŭła Šarojki, a ŭ Čarnihavie — biełarusa Juryja Palityki.
Spravu Šarojki razhladaje Viarchoŭny sud. Pasiadžeńnie prachodzić u zakrytym režymie.
Nahadajem, što karespandent «Ukrainskaha radyjo» ŭ Biełarusi Pavieł Šarojka źnik u Minsku. Jaho siamja i kalehi zajavili, što Šarojku zatrymali 25 kastryčnika, ale jany nie ahučvali heta spadziajučysia, što dypłamatyčnyja vysiłki pa vyzvaleńni daduć plon. Ukrainski konsuł, jakoha puścili da žurnalista, paviedamlaŭ, što Šarojka znachodzicca ŭ SIZA KDB — jaho vinavaciać u špijanažy, jon pad śledstvam.
U vyniku, Šarojku vystavili abvinavačvańnie ŭ špijanažy, KDB zajaviła, što žurnalistyka tolki prykryćcio, nasamreč Šarojka kadravy raźviedčyk i maje zvańnie pałkoŭnika.
Ciapier Šarojku pahražaje da 15 hadoŭ.
U hety ž dzień pačałosia sudovaje pasiadžeńnie va ŭkrainskim Čarnihavie. Tam abvinavačvajuć biełarusa Juryja Palityku. Praŭda, praces nie zakryty.
Palityku zatrymali 16 červienia na ŭukrainska-biełaruskaj miažy. Jaho źniali z aŭtobusa «Čarnihaŭ—Homiel» i źmiaścili ŭ SIZA. Ukrainski bok zajaviŭ, što Palityka nibyta źbiraŭ sakretnuju infarmacyju pra detali antyterarystyčnaj apieracyi na Danbasie, a źviestki zachoŭvaŭ na karcie pamiaci svajho mabilnika.
Juryja Palityku vinavaciać, jak i Šarojku, u špijanažy, jamu pahražaje, taksama jak i Šarojku, da 15 hadoŭ.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj34
Kamientary