Z časam u Biełarusi pryjduć da abmierkavańnia pytańnia ab uniasieńni źmianieńniaŭ u Asnoŭny Zakon krainy. Ab hetym Alaksandr Łukašenka zajaviŭ siońnia na sustrečy z sudździami Kanstytucyjnaha suda, piša BiełTA.
«Ja ŭžo havaryŭ na sustrečach z parłamientaryjami i sudziejskim korpusam, što z časam my pryjdziem da abmierkavańnia pytańnia ab uniasieńni źmianieńniaŭ u Asnoŭny Zakon, — skazaŭ Alaksandr Łukašenka. — Usio vielmi prosta, nie treba ŭ hetym šukać niejkija naviny, až da fejkavych. Treba razumieć, što zakanatvorčaść — žyvy praces, jak i ŭsie zakony, padzakonnyja akty, heta žyvy arhanizm, jaki pavinien udaskanalvacca, kab nie adstać ad taho žyćcia, jakoje pulsuje naohuł u śviecie».
«Žyćcio idzie, i vy bačycie, nakolki ŭžo voś za naša pakaleńnie my rušyli napierad. Kali my pačynali na zary našaj niezaležnaści, nie mahli ŭjavić, jakija prablemy buduć stajać pierad nami, i što ekanomika pojdzie ŭ IT-śfieru, i ŭžo tam usie narody buduć šukać svajo ščaście — mienš buduć havaryć ab vuhlevadarodach, a na paradak dnia vyjdzie inavacyja», — adznačyŭ Łukašenka.
Kiraŭnik dziaržavy padkreśliŭ, što Biełaruś sočyć za tendencyjami i ŭ krainie starajucca svoječasova prymać rašeńni, nakiravanyja na raźvićcio dziaržavy. «Žyćcio nie staić na miescy, jano vielmi burna raźvivajecca, i, zrazumieła, my pavinny paśpiavać mianiacca sami, padładžvacca pad heta žyćcio. Usio heta treba rabić na zakonnym uzroŭni, zychodziačy z patrabavańniaŭ našaha žyćcia, — upeŭnieny jon. — Tamu što i hramadstva mianiajecca, i my z vami mianiajemsia. Zrazumieła, Kanstytucyja pavinna być na krok-dva napieradzie źmianieńniaŭ našaha hramadstva. Adsiul i prablema, jakaja pierad nami, jak ja ŭžo skazaŭ, kali nie paŭstała, to paŭstanie, ab karekciroŭcy, źmianieńni norm Kanstytucyi».
Pry hetym Alaksandr Łukašenka źviarnuŭ uvahu, što treba vielmi dakładna i pravilna vybrać momant dla ŭniasieńnia źmianieńniaŭ u hałoŭny zakon krainy.
«Tamu što sami razmovy ab źmianieńni Kanstytucyi paradžajuć u lepšym vypadku niejki broŭnaŭski ruch u našym hramadstvie. A niekatoryja vielmi palityzavanyja i zacikaŭlenyja koły pačynajuć užo vielmi raźvivać burnuju dziejnaść na hetaj asnovie. Tamu važna vybrać čas, kali my budziem padbiracca da karekciroŭki hetaha zakona, i vyznačyć asnoŭnyja napramki, pa jakich budziem pracavać», — rastłumačyŭ biełaruski lidar.
Kamientary