«Amierykanskaja mroja». Cvietłaj pamiaci Jarasłava Vinickaha
U jakija prafesii išli našyja surodzičy, kali prybyvali ŭ 1950-ch hadach u Ameryku? Adnoj z takich prafesijaŭ dla mnohich stałasia zubnaja technika, absłuhoŭvańnie dentystaŭ vyrablańniem zuboŭ. Pracaju ŭ hetaj halinie šmat chto zdoleŭ realizavać sabie j dzieciam tak zvanuju «amerykanskuju mroju», ci, jak u nas kažuć, vybicca ŭ ludzi.
Adnym z takich byŭ niadaŭna pamierły (26.01.2018) u Kalifornii Jarasłaŭ (Słavik) Vinicki. Prybyŭšy ŭ Ńju Jork na pačatku 1950-ch, jon nieŭzabavie pierabraŭsia ŭ Los-Andželes, dzie pasialiłasia z časam usia siamja Vinickich: baćki, dva syny j dačka.
Słavik naradziŭsia ŭ Niaśvižy (26.04.1925) u siamji byłoha aficera carskaj armii j biełaruskaha hramadzkaha dziejača Alesia Vinickaha. Siamja Vinickich apynułasia pad kaniec vajny ŭ Niamieččynie. Tam Słavik pastupiŭ va ŭniversytet i atrymaŭ dyplom dentysta.
Ale ŭ Amerycy dyplomy ź inšych krainaŭ nie pryznajucca, navat kali chto hramadzianin ci ŭradženiec Złučanych Štataŭ. Słavik vybraŭ sabie blizkuju da dentystyki prafesiju zubnoha technika. Pahatoŭ, što jon byŭ zdolny ŭ rukach, a ŭ dadatak adznačaŭsia artystyčnymi jakaściami, lubiŭ malunki, muzyku, zajmaŭsia ŭ volny čas fatahrafijaj.
U svajoj prafesijnaj pracy, u jakoj jamu šmat dapamahała žonka Kaciaryna (z domu Jacevičaŭ), Słavik nia tolki adznačaŭsia jakasnym vykovańniem zakazaŭ, ale j strohaj akuratnaściu, datrymoŭvańniem terminaŭ. Usio heta zabiaśpiečyła jamu vysokuju acenku z boku dentystaŭ, supraca ź jakimi tryvała 35 hadoŭ.
Pracaj svajoj Vinickija zmahli zabiaśpiečyć vyšejšuju aśvietu dźvium dočkam, Ani j Lusi, dy synu Antonu (siońnia padpałkoŭnik amerykanskaj armii ŭ adstaŭcy). Usim traim hrunt da «Amerykanskaj mroi» zabiaśpiečyli baćki.
Pracavitaje žyćcio Jarasłava Vinickaha skončyłasia 26 studzienia sioleta. Siamja j mnostva siabroŭ ušanavali jahonuju śvietłuju pamiać 9 lutaha, a 10 lutaha adbylisia pachoviny — na prośbu siamji tolki ŭ prysutnaści rodnych — na mohilniku Holy Cross Cemetery (imia Śviatoha Kryža) ŭ Kałver-Sici, častcy horadu Los-Andželes.
Viečnaja jamu pamiać.
Kamientary