Žycharka Barysava, jakaja stała fihurantkaj spravy ab hibieli čatyroch miascovych žycharoŭ ad spažyvańnia narkotykaŭ, prysudžanaja da 14 hadoŭ kałonii, biez kanfiskacyi majomaści, paviedamlaje BiełTA.
Takoje pakarańnie žančyna atrymała za niezakonnyja z metaj zbytu nabyćcio, zachoŭvańnie asabliva niebiaśpiečnych narkatyčnych srodkaŭ.
U toj ža čas jana pryznana nievinavataj i apraŭdanaja pa č.5 art.328 KK. Havorka idzie ab niezakonnym zbycie narkatyčnych srodkaŭ, što paciahnuła pa nieaściarožnaści śmierć čałavieka ŭ vyniku spažyvańnia im narkotykaŭ. Heta značyć sud paličyŭ, što vina žančyny ŭ datyčnaści da śmierci mužčyn nie dakazanaja.
Prysud u zakonnuju siłu nie ŭstupiŭ i moža być abskardžany i apratestavany va ŭstanoŭlenym zakonam paradku.
Trahiedyja adbyłasia ŭ vieraśni 2016 hoda. Čaćviarych barysaŭčan biez prykmiet žyćcia miascovyja žychary vyjavili ŭ miežach horada ŭ lasnym masivie. Miedyki kanstatavali śmierć dvuch ź ich. Jašče dvoje pamierli ŭ balnicy. Pry ahladzie miascovaści, dzie byli znojdzieny cieły mužčyn, znajšli vykarystanyja šprycy i jomistaści ad lekavych srodkaŭ, što śviedčyła pra ŭžyvańnie zahinułymi narkatyčnych srodkaŭ i psichatropnych rečyvaŭ.
Kamientary