Novym polskim pasłom u Biełarusi chutčej za ŭsio stanie Artur Michalski. Siońnia jaho kandydaturu na ambasadara ŭ Miensku padtrymaŭ Kamitet zamiežnych spravaŭ Sejmu Polščy. Ciapier jahonuju kandydaturu maje zaćvierdzić prezydent Andžej Duda, piša Radyjo Svaboda.
Što viadoma pra Michalskaha?
1. Filozaf. Arturu Michalskamu 56 hadoŭ. Jon filozaf pavodle adukacyi. Z 1987 hodu pracavaŭ u hramadzka-katalickim tydnioviku «Ład». Zajmaŭsia pieravažna rehijonam Centralna-Ŭschodniaj Eŭropy. Pisaŭ pra padzieńnie kamunizmu i demakratyčnyja pracesy.
2. Napisaŭ knihu pra chryścijanstva ŭ Rasiei. Kniha «Na ruinach tatalitaryzmu — razmovy pra adradžeńnie chryścijanstva ŭ Rasiei» stała vynikam častych pajezdak u SSSR i razmovaŭ ź ludźmi, jakija ŭdzielničali ŭ palityčnych pieramienach.
3. Dyplamat z 28-hadovym stažam. Pracu ŭ MZS Michalski raspačaŭ u 1990 hodzie. Uviesnu taho ž hoda jaho nakiravali ŭ polskaje pasolstva ŭ Maskvu. Tam jon pracavaŭ u pres-adździele ambasady, a potym na pasadzie pres-sakratara. Vałodaje anhielskaj i rasiejskaj movami.
4. Specyjalist pa Rasiei. U 1996 hodzie Artur Michalski viartajecca ŭ Varšavu i ŭznačalvaje rasiejski adździeł Centru ŭschodnich daśledavańniaŭ, adnaho z samych upłyvovych polskich think-tank. Praz hod jon uznačalvaje rasiejski adździeł u Departamencie Ŭschodniaj Eŭropy ŭ MZS.
5. Praca ŭ ZŠA i Kanadzie. U 2000 hodzie Michalski pakidaje Varšavu, kab pracavać u pasolstvie Polščy ŭ Vašynhtonie. Tam jon, jak i ŭ Maskvie, pracuje pres-sakratarom. Praz 4 hady dyplamat viartajecca ŭ Polšču i pačynaje pracu ŭ Departamencie Ameryki MZS. A ŭ 2006 jaho iznoŭ nakiroŭvajuć na pracu za akijan — hetym razam u Kanadu. Tam jon pracuje namieśnikam polskaha pasła.
6. Orden ad Dadona. Z 2010 pa 2012 hod Michalski pracavaŭ dyrektaram Uschodniaha Departamentu MZS Polščy. U 2012 jaho pryznačyli pasłom Polščy ŭ Kišynevie. Svaju misiju jon skončyŭ 30 červienia 2017 hodu. Prezydent Małdovy Ihar Dadon uznaharodziŭ polskaha dyplamata Ordenam honaru.
7. Baćka traich dziaciej. Artur Michalski žanaty na Evie Karnoŭskaj-Michalskaj. U jaho troje dziaciej: Alaksandra, Veranika i Adam.
Papiaredni ambasadar Polščy Konrad Paŭlik zaviaršyŭ svaju pracu ŭ Biełarusi 31 studzienia. Pavodle polskich ŚMI, nieaficyjnaj pryčynaj adstaŭki Paŭlika stała toje, što jon nia zdoleŭ naładzić stasunki z pradstaŭnikami polskaj dyjaspary i kiraŭnictvam telekanału «Biełsat».
Na zimu zapłanavanyja masavyja zatrymańni, składzienyja «pieršy i druhi śpisy»29
Kamientary