Śmiarotnik Ihar Hieršankoŭ praz svaju maci pieradaŭ papiaredžańnie pra haładoŭku, jakuju jon źbirajecca pačać 27 červienia ŭ minskim śledčym izalatary. Pavodle słoŭ Ludmiły Hieršankovaj, heta pratest suprać dziejańniaŭ administracyi SIZA, jakaja nie prapuskaje karespandencyju ni da mužčyny, ni ad jaho, paviedamlaje PA «Viasna».
— Vielmi doŭha ad jaho nie było nijakich listoŭ. Pra ŭsio ja daviedałasia tolki niadaŭna padčas spatkańnia ŭ SIZA. Vyhladaje Ihar žudasna — uvieś pasivieŭ, ruki ŭ jaho trasucca. Jon skazaŭ, što listy, jakija ja pišu jamu, jon nie atrymlivaje. Z-za hetaha jon advažyŭsia na haładoŭku z 27 červienia, — raspaviała maci śmiarotnika.
Jana ŭžo paśpieła źviarnucca sa skarhaj u Departamient vykanańnia pakarańniaŭ, adnak tam joj paviedamili, što ź Iharam Hieršankovym abychodziacca pa ŭsich praviłach. Adkazu ad administracyi SIZA №1 pakul nie było.
Pa słovach Ludmiły, rašeńnie ab rasstrele jaje syna pakul prypyniŭ Viarchoŭny sud. Ale jak doŭha heta praciahniecca, jana nie viedaje:
— U mianie ŭžo adno žadańnie, kali ŭłady zabjuć Ihara, to chaj zabivajuć i mianie, — skazała žančyna.
Mahiloŭcaŭ Ihara Hieršankova i Siamiona Bieražnoha asudzili na śmiarotnaje pakarańnie pa spravie tak zvanych «čornych ryełtaraŭ» u lipieni 2017 hoda. Jašče dvoje fihurantaŭ — Taćciana Hieršankova i Barys Kaleśnikaŭ — atrymali 24 i 22 hady źniavoleńnia adpaviedna.
Pa viersii śledstva, z 2009 pa 2015 hod «čornyja ryełtary» zabivali ŭładalnikaŭ kvater, kab zavałodać ich nieruchomaściu. Było dakazana dačynieńnie ŭsioj hrupoŭki da zabojstva šaści čałaviek. Jašče try čałavieki paźbiehli śmierci, pakolki fihurantaŭ spravy źmiaścili pad vartu. Złačynnaj hrupie zaličyli ździajśnieńnie i padrychtoŭku da ździajśnieńnia zabojstvaŭ, vykradańnie i padrychtoŭku da vykradańnia čałavieka, machlarstva, razboj, vymahalnictva, kradziež abo źniščeńnie dakumientaŭ i niezakonny abarot narkotykaŭ abo psichatropaŭ.
Łukašenkaŭcy ŭpieršyniu za doŭhi čas pakazali Viktara Babaryku23
Kamientary