Słaŭnaje svajoj historyjaj miastečka znachodzicca na šlachu z Horadni ŭ Bieraście. Fotarepartaž.
Siadzibu ŭ Padarosku niemahčyma nie zaŭvažyć, kirujučysia z Horadni ŭ Bieraście, ci naadvarot. U zaležnaści ad taho, adkul lažyć vaš šlach, pieršym na vočy vam patrapić abo vieličny park, atočany staroj cahlanaj aharodžaj, u jakim chavajecca kamianica z kalonami, abo sadžałka, jakuju dzielać miž saboj lebiedzi, kački dy husi.
Kala bramy, što niekali była arkaju, sustrakaju miascovych babul. «Jašče adny pryjechali, a tut hladzieć niama na što — usio paraściahvali» — kažuć tyja dy sychodziać, pabačyŭšy fotaaparat.
Siadziba Bochvicaŭ siońnia pustuje. U 2004 hodzie adsiul źjechała praŭleńnie miascovaha SVK. Vokny šykoŭnaha niekali budynku schavanyja listami šyferu, padłoha ŭ kalidorach dy pakojach zakidanaja śmiećciem. Pustaja tara staić na padvakońni flihielu, što zaros byllom. Funkcyjanuje tolki adzin z acalełych budynkaŭ — u im mieścicca miascovy post MNS.
Adna ź pieršych zhadak pra Padarosk adnosicca da 1522 hodu, kali ŭ pieraliku kaściołaŭ Vilenskaj katalickaj japarchii byŭ nazvany Padaroski kaścioł. Pa adnoj z versij nazva miastečka ŭźnikła paśla taho, jak pa hetym šlachu, pasypanym pialostkami ružaŭ, pravieźli kryštalnuju trunu pamierłaj u Ijerusalimie panienki Bochvic. U 1660 hodzie Padarosk atrymaŭ Mahdeburskaje prava.
Pieršymi haspadarami miastečka byli Kłočki. Potym jano pierajšło da Dolskich. U roznyja časy tut vaładaryli Scypijo del Kampa, vychadcy ź Italii, za imi Hryboŭskija, Čačoty. U 1854 hodzie majontak u Padarosku nabyŭ syn viadomaha filozafa Fłaryjana Bochvica, Raman. Jon i pierabudavaŭ siadzibny dom u styli poźniaha klasycyzmu ŭ 1854-1856 hh. Pry im byŭ pabudavany śpirtzavod, vadziany młyn (nie zachavaŭsia), suknavalnia (zachavaŭsia fundament) i šmat inšaha.
Bolšaść starych biełaruskich siadzibaŭ trymalisia datul, pakul u ich byŭ choć niejki ŭłaśnik — škoła, lakarnia, praŭleńnie kałhasu, kaža staršynia Dobraachvotnaha tavarystva achovy pomnikaŭ historyi i kultury Anton Astapovič. Źjechała praŭleńnie kałhasu z byłoha panskaha majontku ŭ Padarosku, i jon pačaŭ zaniepadać. A miž inšym, heta adna z važniejšych kropak perspektyŭnaha turystyčnaha i krajaznaŭčaha maršrutu — pobač Kraski, u jakich mieścicca siadziba Siehlicaŭ, Ružany, Kosava. Ružanski dy kosaŭski pałacy dačakalisia narešcie ŭvahi z boku restaŭrataraŭ, a pałacyk u Kraskach znajšoŭ haspadara. Zastajecca spadziavacca, što pryčakaje svajho i Padarosk.
Ciapier čytajuć
«Adpuścicie, kali łaska, syna!» Amierykanca z amniezijaj, jaki nielehalna pryjechaŭ u Biełaruś, nie addajuć maci5
Kamientary