Rasijskaja «Novaja hazieta» padrychtavała materyjał pra novaha pasła Rasii ŭ Biełarusi Michaiła Babiča. Vydańnie paviedamlaje, što raniej jon byŭ fihurantam hučnaj kryminalnaj spravy.
Vydańnie źviartaje ŭvahu, što nie ŭ pieršy raz Rasija pasyłaje ŭ susiednija krainy ludziej z sumnieŭnaj reputacyjaj — u 2009 hodzie Rasija adpraviła pasłom va Ukrainu Michaiła Zurabava, jaki raniej, kali byŭ ministram achovy zdaroŭja, znachodziŭsia ŭ centry karupcyjnaha skandału.
Babič na pačatku 2000-ch fihuravaŭ u kryminalnaj spravie ab prodažu charčavańnia z ZŠA i Jeŭrasajuza.
Havorka idzie pra kryminalnuju spravu № 9247, jakuju raspačaŭ u mai 2000 hoda Śledčy kamitet Rasii. Jaje sutnaść: pavodle mižuradavaha pahadnieńnia, ZŠA i Jeŭropa z 1999 hoda pastaŭlali ŭ Rasiju charčavańnie, jakim rasparadžaŭsia ŭpaŭnavažany ŭradam ahient — «Raśmiasamałhandal», tam Babič byŭ pieršym vice-prezidentam. Jak skazana ŭ materyjałach spravy, pa viersii śledstva, Babič, a zatym i jaho pierajemnik realizavali pradukcyju praź inšyja arhanizacyi, u tym liku zarehistravanyja na padstaŭnych asob. U vyniku čaho vyručka pastupiła nie na śpiecyjalny asobny rachunak Minfina Rasii, a na rachunak «Raśmiasamałhandla» i inšych arhanizacyj.
Śledstvu stała viadoma, što Babič u 1990-ja kiravaŭ «Karparacyjaj Antej». «Miescaznachodžańnie karparacyi źjaŭlałasia taksama bazaj, dzie faktyčna znachodzilisia fiktyŭnyja firmy», — havaryłasia ŭ materyjałach deputackaj kamisii. «Supracoŭniki karparacyi pradstaŭlali [hetyja] fiktyŭnyja firmy».
Taksama firmy, jakija ŭvachodziać u chołdynh, zaklučyli dahavory na pastaŭku vialikaj kolkaści praduktaŭ charčavańnia ŭ MUS, Ministerstva abarony, MNS Rasii.
6 sakavika 2001 hoda namieśnik hienieralnaha prakurora Rasii sankcyjanavaŭ aryšt Babiča i jaho saŭdzielnikaŭ. «Novaja hazieta» paviedamlaje, što Babič tady ŭciok.
Zrešty, hetaja kryminalnaja sprava ničym nie zaviaršyłasia. Inšy namieśnik hienprakurora — Juryj Birukoŭ — admianiŭ pastanovu ab aryšcie Babiča. Materyjały spravy — bolš za 400 tamoŭ — pieradali ŭ maskoŭskuju prakuraturu, i ŭ vyniku jaje spynili.
U svajakoŭ novaha pasła Rasii ŭ Biełarusi byŭ paśpiachovy biznes. Pavodle «Novaj haziety», paśla spynieńnia kryminalnaj spravy svajaki Babiča šmat hadoŭ zastavalisia pastaŭščykami struktur MUS, MNS, Minabarony, FSB i FSA Rasii. Pryčym z časam sumy kantraktaŭ usio ŭzrastali.
Hetaja dziaŭčyna vyjšła ŭ centry Hrodna z płakatam «Nie vajnie». Jana raskazała, što pieražyła paśla14
Kamientary