Ułasny dośvied: śpis bazavych rečaŭ, jakija varta ŭziać z saboj u radzilniu
Rody — nie tolki praces źjaŭleńnia na śviet novaha žyćcia, ale i surjozny ispyt na tryvałaść i samaarhanizacyju. Jak zabiaśpiečyć sabie maksimalny kamfort u biełaruskaj radzilni? Źbirajemsia pravilna razam.
Pa-pieršaje, uličycie, što ŭ biełaruski radzilny dom rečy treba vieźci tolki ŭ polietylenavych pakietach. Nijakija torby i narakańni na ekałohiju nie prymajucca. Pa-druhoje, zručna padzialić usio patrebnaje na try pakiety — dla rodaŭ, dla niemaŭlaci i dla mamy. Ź pieršym pakietam vy pajedziecie naradžać, astatnija rečy vam pieradaduć svajaki ŭ paślarodavaje adździaleńnie. I treciaje važnaje praviła: nie nabirać vializny bahaž, bo nichto, akramia paradzichi, jaho nasić nie abaviazany, dy ŭ standartnych pałatach niašmat miesca, kab usio raźmiaścić.
Pakiet dla rodaŭ
- Dakumienty (pašpart, abmiennaja karta, damova, kali zaklučali);
- Humovyja tapački (jakija možna pamyć);
- Telefon, zaradnaje;
- Miakkaja tualetnaja papiera i pradmiety asabistaj hihijeny (zubnaja pasta, ščotka, myła, rasčoska);
- Kubak, łyžka, videlec;
- Niekalki padhuzkaŭ na dziaciej vahoj 2—5 kh (zahadzia addać miedsiastry);
- Ručnik i niekalki pialušak;
- Butelka vady 1 ł i što-niebudź sałodkaje (naprykład, ziefir);
- Pakiety dla adzieńnia i abutku, u jakim pryjedziecie naradžać.
Pakiet dla mamy
- Chałat;
- Niekalki načnych saročak (lepiej na šlejkach, kali źbirajeciesia karmić hrudziami, ci admysłovyja, z zašpilkami) i stanikaŭ dla karmleńnia;
- Adnarazovyja majtki, prakładki ŭrałahičnyja ci vialikija načnyja;
- Niekalki par škarpetak;
- Układyšy ŭ stanik;
- Srodki dla duša, patrebnaja kaśmietyka;
- Pakiety dla brudnaj bializny.
Pakiet dla małyša
- Pačak padhuzkaŭ dla novanarodžanych 2—5 kh;
- Dziciačyja vilhotnyja survetki, nievialiki ručnik;
- Dziciačy krem, prysypka;
- Pačak adnarazovych pialušak, 5—6 bavaŭnianych;
- 2—3 bodzi abo ślipy, škarpetački, kapturyk, rukavički.
I jašče niekalki łajfchakaŭ
1. Ulubionaja muzyka dapamahaje lahčej pieranosić schopki. Padrychtujcie svoj płejlist i vaźmicie navušniki.
2. Padčas rodaŭ vielmi chočacca pić, ale rabić hetaha nielha. Vaźmicie z saboj fłakon termalnaj vady, kab papyrskać na tvar — budzie lahčej.
3. Adrazu paśla rodaŭ vielmi chočacca jeści. Nie ihnarujcie heta, bo na pryjom ježy pa raskładzie radzilni možacie nie patrapić.
4. Zahadzia vyznačcie, jak budziecie karmić dzicia. Kali ŭ vas płanujecca kiesarava, nabudźcie małakaadsos, kab naładzić łaktacyju i pieradavać małyšu svajo małako. Kali ŭ vas płoskija smočki, vaźmicie z saboj śpiecyjalnyja nakładki dla karmleńnia. Krem dla smočak budzie darečy.
5. U paślarodavych pałatach ciaham nočy haryć śviatło. Kali vam heta zaminaje, pakłapaciciesia pra masku na vočy.
6. Kab chutčej ačuniać paśla rodaŭ, vaźmicie toje, što nijak ź imi nie źviazana. Naprykład, knižku ŭpadabanaha aŭtara abo časopis.
7. Savieckaja praktyka vykarystańnia padkładaŭ jašče žyvaja. Kali vam nakładajuć švy, mohuć paraić peŭny čas karystacca mienavita padkładami, a nie prakładkami, kab zabiaśpiečyć patrebnuju tempieraturu i cyrkulacyju pavietra. Vyrašycie skarystacca paradaj — padrychtujcie čystuju bavaŭnianuju tkaninu, jakuju potym parežacie na kavałki.
Uličyć ŭsio niemahčyma, kožnyja rody — asobnaja, časam niepradkazalnaja, historyja. Adnak naležnaja padrychtoŭka dapamoža zajmieć pravilny nastroj i źvieści dyskamfort da minimumu.
Kamientary