Rasija hatova adkazać na pahrozu Trampa pra razryŭ damovy pra rakiety siaredniaj i małoj dalnaści (DRSMD) vajennymi zachadami, zajaviŭ namieśnik kiraŭnika MZS Siarhiej Rabkoŭ, pieradaje ria.ru. Palityku Vašynhtona jon paraŭnaŭ z šantažom.
Napiaredadni prezident ZŠA Donald Tramp zajaviŭ, što vyjdzie z DRSMD z Rasijaj, adnačasova abvinavaciŭšy Maskvu ŭ parušeńni damovy.
ZŠA vychodziać z Damovy ab rakietach siaredniaj dalnaści, uciahvajuć Rasiju ŭ honku ŭzbrajeńniaŭ
«My z tryvohaj i asudžeńniem ŭsprymajem novyja amierykanskija sproby mietadam šantažu damahčysia ad Rasii sastupak u śfiery mižnarodnaj biaśpieki i stratehičnaj stabilnaści. Nieadnarazova havaryłasia z rasijskaha boku, što nijakich padstaŭ dla abvinavačvańniaŭ u tym, što Rasija nibyta parušaje hetuju damovu, u amierykancaŭ niama», — skazaŭ Rabkoŭ.
«Svaje nadumanyja abvinavačvańni jany tak i nie zmahli za ŭsie hetyja hady padmacavać vyraznymi tłumačeńniami, ź jakoj pryčyny heta robicca», — dadaŭ namieśnik kiraŭnika MZS.
Pry hetym, jak adznačaje RBK, Rabkoŭ dadaŭ, što hetaje pytańnie «zanadta surjoznaje, kab jaho vyrašać u režymie publičnaj palemiki».
Damova ab rakietach siaredniaj i małoj dalnaści była padpisanaja 8 śniežnia 1987 hoda padčas vizitu savieckaha lidara Michaiła Harbačova ŭ Vašynhton. Upieršyniu pad skaračeńnie trapiŭ ceły kłas rakietnaha ŭzbrajeńnia z dalnaściu paražeńnia ad 500 da 1000 i ad 1000 da 5500 kiłamietraŭ, u tym liku rakiety R-12 i R-14, jakija SSSR ŭ 1962 hodzie raźmiaściŭ na Kubie, što spravakavała Karybski kryzis. U mai 1991 hoda damova była całkam vykananaja, kali SSSR źniščyŭ 1752 balistyčnyja i kryłatyja rakiety naziemnaha baziravańnia, ZŠA — 859. Dakumient maje biesterminovy charaktar. Pry hetym kožny z bakoŭ maje prava jaho skasavać, pradstaviŭšy pierakanaŭčyja dokazy ab nieabchodnaści vychadu ź jaho.
ZŠA, tym nie mienš, upeŭnienyja, što Rasija raspracoŭvaje novyja nośbity jadziernaj zbroi ŭ parušeńnie hetaj damovy.
U pryvatnaści, pretenzii Vašynhtona vyklikaje kryłataja rakieta naziemnaha baziravańnia 9M729. Aficyjny pradstaŭnik MZS Maryja Zacharava zajaŭlała, što rakieta 9M729 całkam adpaviadaje patrabavańniam damovy i nie pryznačanaja dla vykarystańnia na dalnaści, zabaronienaj DRSMD.
Kamientary