Mininfarm — BAŽu: Pasiaredniki ŭ vyhladzie hramadskich abjadnańniaŭ nie patrebnyja ni nam, ni žurnalistam

Ministerstva infarmacyi nakiravała adkaz na zapyt HA «Biełaruskaja asacyjacyja žurnalistaŭ» ab paradku akredytacyi miedyja pry ministerstvie. Žurnalisckaja arhanizacyja źbirajecca abskardžvać dakumient, paviedamlaje pres-słužba arhanizacyi.

BAŽ cikaviłasia, ci raspracavany pry Mininfarmie paradak akredytacyi pradstaŭnikoŭ miedyja. Mahčymaść akredytacyi praduhledžana art. 35 Zakona «Ab ŚMI».

U adkaz na zapyt HA «BAŽ» pieršy namieśnik ministra infarmacyi Pavieł Lohki aproč inšaha paviedamlaje:

«U pasiarednictvie roznych hramadskich arhanizacyj, jakimi b pavažanymi jany ni byli, pry vybudoŭvańni ŭzajemadziejańnia Ministerstva infarmacyi z pradstaŭnikami jak dziaržaŭnych, tak i niedziaržaŭnych ŚMI ni toj, ni inšy bok nie majuć patreby, pra što mohuć paviedamić vam u tym liku i sami siabry HA «BAŽ». Žadajem pośpiechaŭ na nivie hramadskaj dziejnaści, kali takija pryniasuć karyść krainie».

HA «Biełaruskaja asacyjacyja žurnalistaŭ» aburana takim adkazam.

Staršynia arhanizacyi Andrej Bastuniec padkreślivaje: žurnalisty mienavita tamu i ŭstupajuć u BAŽ, kab arhanizacyja pradstaŭlała i łabiravała ich intaresy.

— Heta ŭnikalny adkaz z punktu hledzišča razumieńnia čynoŭnikam svajho miesca i svajoj pracy. Pa-pieršaje, u adkazie niama infarmacyi pa sutnaści — ci isnuje ŭ Mininfarmie raspracavany paradak akredytacyi žurnalistaŭ.

Pa-druhoje, hramadskija arhanizacyi dla hetaha i stvarajucca, kab pradstaŭlać intaresy svaich siabraŭ. Mienavita dla hetaha ŭ našu mižnarodna pryznanuju arhanizacyju i ŭvachodziać bolš za 1200 kaleh.

I ŭžo dakładna Mininfarm nie moža adkazvać za siabraŭ BAŽ.

A naohuł, u Mižviedamasnym płanie pa realizacyi rekamiendacyj pa pravach čałavieka havorycca pra nieabchodnaść pašyreńnia ŭdziełu hramadskaści ŭ kiravańni hramadstvam i dziaržavaj. I Ministerstva infarmacyi — adzin z orhanaŭ, jakija adkaznyja za realizacyju hetaha płana, — kamientuje Andrej Bastuniec.

U vieraśni BAŽ raspačaŭ daśledavańnie praviłaŭ akredytacyi žurnalistaŭ u dziaržaŭnych viedamstvach i miascovych orhanach ułady.

Arhanizacyja nakiravała aficyjnyja zapyty adnosna paradku akredytacyi žurnalistaŭ va ŭsie ministerstvy, dziaržaŭnyja kamitety, bujniejšyja viedamstvy, miascovyja orhany ŭłady i saviety deputataŭ abłasnoha ŭzroŭniu. Meta daśledavańnia: daviedacca, ci raspracavanaje ŭ dziaržaŭnych orhanach adpaviednaje zakanadaŭstvu pałažeńnie ab akredytacyi žurnalistaŭ, a kali jaho niama, prapanavać uzor takoha dakumienta dla pryniaćcia.

• 0
• 0
• 0
• 0
• 0
• 0
• 0
• 0