U Śvisłačy aštrafavali pravaabaroncu Viktara Sazonava za toje, što prysutničaŭ na akcyi ŭ honar paŭstancaŭ 1863 hoda
23 listapada ŭ Śvisłačy prajšoŭ razhlad administracyjnaj spravy haradzienskaha pravaabaronca Viktara Sazonava, pieradaje «Haradzienskaja viasna».
Razhladaŭ spravu staršynia Śvisłackaha rajonnaha suda Alaksandr Šylin.
27 kastryčnika Viktar Sazonaŭ pryjechaŭ u Śvisłač i Jakušoŭku na Dzień pamiaci paŭstancaŭ 1863 hoda vyklučna jak pravaabaronca vieści manitorynh hetaha festu. Jon prysutničaŭ u Śvisłačy, naziraŭ za mierapryjemstvam i rabiŭ fotazdymki. Charakterna, što ni ŭ adnym z rapartaŭ milicyi nie adlustravana, što Viktar Sazonaŭ niešta rabiŭ na hetaj akcyi. Adnak u milicyi skłali pratakoł pra nibyta administracyjnaje pravaparušeńnie.
Na sudzie supracoŭnik milicyi major Alaksandr Mackievič śviedčyŭ pra toje, što Sazonaŭ išoŭ u kałonie pryjechaŭšych z mohiłak u centr Śvisłačy da pomnika Kastusiu Kalinoŭskamu. Nasamreč hetaha nie było, što i paćvierdziŭ prahlad videamateryjałaŭ. Paśla hetaha Viktar Sazonaŭ zajaviŭ chadajnictva pra pryciahnieńnie śviedki da administracyjnaj adkaznaści za davańnie iłžeśviedčańniaŭ. Adnak sudździa Šylin praihnaravaŭ hetaje chadajnictva.
Śviedkam na pracesie pavodle chadajnictva Sazonava vystupiŭ hramadski aktyvist Uładzimir Chilmanovič, jaki zaśviedčyŭ, što 27 kastryčnika supracoŭniki milicyi ŭsie byli ŭ cyvilnym, nijak nie pradstaŭlalisia, nikoha nie papiaredžvali pra niejkija pravaparušeńni i administracyjnuju adkaznaść. A adzin ź milicyjantaŭ lejtenant Pavieł Kiedzik u Jakušoŭcy pavodziŭ siabie pravakacyjna da pryjechaŭšych, nachabna lez ź videakamieraj u tvary prysutnym.
Tym nie mienš, pavodle častki 1 artykułu 23.34 KaAP sud aštrafavaŭ Viktara Sazonava na 15 bazavych vieličyń, što składaje 367 rubloŭ 50 kapiejek.
Kamientary