Prafiesara Andreja Kaladu zvolnili z Akademii mastactvaŭ

Prafiesar Biełaruskaj akademii mastactvaŭ Andrej Kalada zvolnieny z pracy za supracoŭnictva z «Svabodnym teatram» i litaraturnyja pierakłady.

Prafiesar viadomy ŭ Biełarusi jak viadučy ŭ krainie śpiecyjalist pa sceničnaj movie, čyimi padručnikami i dapamožnikami karystajecca nie adno pakaleńnie studentaŭ, i jak pierakładčyk na biełaruskuju movu tvoraŭ Dastajeŭskaha, Bunina, Nabokava, Sałžanicyna, Pastarnaka. Siońnia na rachunku Andreja Kalady 26 knih, da vydańnia rychtujucca jašče try: pierakłady abranych tvoraŭ Ivana Bunina, składanka z troch ramanaŭ nobieleŭskich łaŭreataŭ i vydańnie biełaruskaj i brytanskaj dramaturhii.

Budučy prarektaram Biełaruskaj akademii mastactvaŭ pa vučebnaj pracy, Kalada davioŭ vykładańnie ŭ VNU na biełaruskaj movie z 0% da 65% u 1994 hodzie. Kali, z prychodam ciapierašniaj ułady, u akademii pačaŭsia nachił u bok rusifikacyi vučebnaha pracesu, prafiesar Kalada skłaŭ ź siabie abaviazki prarektara i staŭ tolki vykładać na kafiedry sceničnaj movy, praciahvajučy vieści kurs na biełaruskaj movie.

U kastryčniku prafiesara Kaladu apaviaścili ab tym, što kantrakt ź im padoŭžany nie budzie, niahledziačy na toje, što da hetaha momantu jon vioŭ dva kursy, jakija, pa łohicy, pavinien byŭ davieści da vypusku. Pretenzii da Andreja Kalady pradjaŭlali daŭno, i pryčynaj tamu była jahonaja pierakładčyckaja dziejnaść i supracoŭnictva sa «Svabodnym teatram», jakim kirujuć jahonaja dačka Natalla i ziać — Mikałaj Chalezin. Čašu ciarpieńnia rektara Ryčarda Smolskaha pierapoŭniŭ vychad składanki pjes maładych biełaruskich dramaturhaŭ «Pakaleńnie Jeans» u pierakładach Andreja Kalady. Tady rektar u sercach skazaŭ, što «ziać i dačka Kalady — hańba krainy, a sam prafiesar Kalada — hańba akademii mastactvaŭ».

Kamientujučy svajo zvalnieńnie ź Biełaruskaj akademii mastactvaŭ, Andrej Kalada skazaŭ: «Ja mierkavaŭ, što heta moža adbycca ŭ luby momant, pakolki siońnia akademija mastactvaŭ pieraŭtvoranaja va ŭstanovu, jakaja absalutna nie adpaviadaje hetamu vysokamu zvańniu. Uvieś vučebny praces staŭ zakładnikam ideałahičnych dohmaŭ, naviazanych zvonku». Pieršym krokam da zvalnieńnia stała pazbaŭleńnie Kalady ŭsich nadbavak za navukoŭcy zvańni, jakoje ŭžyvajecca siońnia vybarča da tych, chto nie zhadžajecca pracavać pa ideałahičnych šabłonach.

«Siońnia nadbaŭki za navukoŭcy zvańni — heta nie vypłaty, zabiaśpiečanyja zakanadaŭča, a prava kiraŭnika VNU trymać piedahahičny skład na karotkim łancužku, pazbaŭlajučy niepažadanych srodkaŭ da isnavańnia. Kazać ža ab rusifikacyi piedahahičnaha pracesu siońnia stała ahulnym miescam — rektar Smolski navat zahadaŭ zamianić šyldački na svaim kabiniecie na ruskamoŭnyja, aścierahajučysia, mabyć, prychodu ŭ akademiju kahości, chto nie zrazumieje biełaruskaj movy» — kaža Andrej Kalada.

• 0
• 0
• 0
• 0
• 0
• 0
• 0
• 0