Pucin zvolniŭ hałoŭnaha zachavalnika kramloŭskich tajamnic. Jon naradziŭsia ŭ Asipovičach
Kiraŭnika kancylaryi Kramla Pucin niečakana zvolniŭ 12 červienia. Uradženiec Mahiloŭščyny Andrej Kazakoŭ mieŭ dostup da dakumientaŭ asablivaj važnaści, ale, jak vyśvietliłasia, sam jon byŭ jak na dałoni dla zamiežnych śpiecsłužbaŭ. The Insider raskazvaje, jak uradženiec Asipovičaŭ staŭ hałoŭnym zachavalnikam tajamnic RF.
U razmovach sa svajakami Kazakoŭ nazyvaŭ siabie hałoŭnym zachavalnikam kramloŭskich tajamnic. I heta sapraŭdy tak: Kazakoŭ jak nichto inšy viedaŭ usiu ŭnutranuju kuchniu Kramla, miechanizmy pryniaćcia sakretnych rašeńniaŭ i toje, chto ŭ ich zadziejničany.
Jon raniej za inšych daviedvaŭsia pra novyja pryznačeńni i hučnyja adstaŭki.
Ad svaich padnačalenych Kazakoŭ patrabavaŭ niaŭchilnaha zachavańnia režymu sakretnaści. Pry hetym navat samy paviarchoŭny pošuk dazvalaje ŭstanavić usiu mahčymuju infarmacyju pra jaho samoha.
Kazakoŭ naradziŭsia ŭ 1958 hodzie ŭ biełaruskim horadzie Asipovičy pad Mahilovam. Paśla pierajezdu ŭ Maskvu jon skončyŭ vajskovaje vučylišča i słužyŭ «sakretčykam» u ciesna źviazanym z HRU Hałoŭnym upraŭleńni mižnarodnaha vajennaha supracoŭnictva Minabarony. Tam jaho i zaŭvažyŭ daŭni tavaryš pa słužbie Pucina pa PHU KDB SSSR Siarhiej Ivanoŭ, jaki ŭ toj čas uznačalvaŭ vajskovaje viedamstva.
Karjera Kazakova pajšła ŭhoru, jon dasłužyŭsia da namieśnika načalnika aparatu ministra abarony i ŭžo ŭ 2010 hodzie zmoh dazvolić sabie kvateru ŭ elitnym ŽK premium-kłasa «Smalenskaja zastava» ŭ Ružejnym zavułku ŭ Chamoŭnikach.
U 2011 hodzie Ivanoŭ pierasieŭ u kresła kiraŭnika AP i nieŭzabavie pryznačyŭ Kazakova namieśnikam načalnika svajho sakrataryjata.
Jašče praz try hady Kazakoŭ kupiŭ i aformiŭ na dačku jašče bolš darahuju i prastornuju kvateru ŭ ŽK Barkli Park (nieruchomaść tam kaštuje ad 100 da 500 młn rubloŭ).
Ježu na dom jon staŭ zamaŭlać z «Hłobus Hurme». Nie tolki sam čynoŭnik, ale i jaho svajaki abzavialisia darahimi mašynami. Pad Myciščami ŭ DNP «Vajskoviec» Kazakoŭ pabudavaŭ asabniak.
Tam ža ŭ haražy stajać rarytetnyja «Maskvič» i «Žyhuli», jakija jon z honaram pakazvaje haściam. Na Novy hod usia siamja źbirajecca ŭ asabniaku, a ŭletku spraŭlajuć śviaty na jachcie na Piharoŭskim vadaschoviščy.
U 2016 hodzie Kazakoŭ pierajšoŭ u kancylaryju prezidenta RF, dzie ŭžo ŭ 2020 hodzie źmianiŭ šmathadovaha načalnika kancylaryi Alaksandra Hołubieva, jaki pamior ad karanavirusa.
Pavodle słoŭ krynicy The Insider na Staroj płoščy, ź pieršych dzion novy kiraŭnik kancylaryi staŭ patrabavać ad padnačalenych pavyšanaj pilnaści:
«Andrej Anatoljevič prosta apantany sakretnaściu. My i tak usie pad padpiskaj ab nierazhałošvańni, a tut jašče pastajannyja pravierki. Atmaśfiera ŭ kancylaryi vielmi niervoznaja, stukactva stała normaj. A skardzicca niama kamu — vyšej tolki VVP».
U adnosinach da samoha siabie jon, zdajecca, hety režym sakretnaści nie zanadta vykonvaŭ: telefanavaŭ kiraŭniku HRU Iharu Kaściukovu pa zvyčajnaj mabilnaj suviazi i karystaŭsia poštaj na Gmail, jakaja zachoŭvajecca na amierykanskich siervierach.
Praz zvyčajnyja boty dla prabivańnia źviestak nieskładana daviedacca pra ŭsie detali jaho bytavoha žyćcia, pačynajučy ad smakavych pieravah (naprykład, jaho siamja imkniecca kuplać biezłaktoznaje małako) i zakančvajučy asabistym stamatołaham. Heta, darečy, Dźmitryj Siarhiejeŭ z Centralnaha vajskovaha kliničnaha špitala imia P. Mandryka Ministerstva abarony RF.
Siamja zachavalnikaŭ dziaržtajamnicy
Akramia taho, Kazakoŭ vykładaŭ u publičnym dostupie fatahrafii svajho siamiejnaha adpačynku ŭ krainach NATA. Dziela spraviadlivaści, paśla poŭnamaštabnaha ŭvarvańnia siamja Kazakova stała adpačyvać na terytoryi Rasii: u hrand-ateli «Prymorje» ŭ Hielendžyku, «Rosa Springs» u Sočy abo piacizorkavym «Hrand Pałas» u Śvietłahorsku.
Apošni raz za miažu siamja Kazakova adpraviłasia za čatyry dni da pačatku ŭvarvańnia va Ukrainu — 20 lutaha 2022 hoda. Jon z žonkaj, dačkoj i ŭnučkaj palacieŭ adpačyvać u Sierbiju. Vidać, dapuščany da ŭsich dziaržaŭnych tajamnic čynoŭnik razumieŭ, što heta jaho apošni šaniec vyjechać za miažu.
Darečy, siamja ŭ Kazakova taksama «sakretnaja». Syn Kanstancin — supracoŭnik FSA. Jon uznačalvaŭ Upraŭleńnie abarony dziaržaŭnaj tajamnicy Minfina, što adpaviadaje hienieralskaj pasadzie.
Žonka syna, Darja, taksama znachodzicca pad padpiskaj ab nierazhałošvańni dziaržtajamnicy. Pa prafiesii jana miedyk, ale ŭ 2022 hodzie śviokar uładkavaŭ jaje na Staruju płošču kansultantam u departamient pa pracy z sakretnymi dakumientami ŭpraŭleńnia prezidenta pa dziaržaŭnych uznaharodach.
Praź jaje ruki prachodziać sotni sakretnych ukazaŭ ab uznaharodžańni hienierałaŭ FSB, SVR, Minabarony, «hierojaŭ» SVA i špijonaŭ, jakija vykonvajuć tajemnyja apieracyi za miažoj.
Nasupierak papiaredžańniam FSB ab viarboŭcy ŭ zamiežnych kamandziroŭkach, da 2025 hoda jana biesstrašna vykładała fota svaich padarožžaŭ pa Italii, Hiermanii, Šviejcaryi i Ispanii razam sa svaim zasakrečanym mužam.
Na raźvitańnie Pucin uznaharodziŭ Kazakova ordenam «Za zasłuhi pierad Ajčynaj» III stupieni. Jak skazana va ŭkazie, «za ŭkład u zabieśpiačeńnie dziejnaści prezidenta RF i šmathadovuju dobrasumlennuju pracu».
Ciapier čytajuć
«70% mastakoŭ u čornych śpisach». Mastak Siarhiej Hrynievič paśla tryumfu ŭ Vieniecyi raskazaŭ pra hady maŭčańnia i pra toje, na jakim śviecie jon apynuŭsia1515
Kamientary