Aŭtar niamieckaha časopisa Spiegel, łaŭreat mnohich žurnalisckich premij Kłaas Rełotyus pryznaŭsia, što stvaraŭ fejki. Z časopisa jaho zvolnili. Viadomy žurnalist prydumlaŭ detali svaich historyj, jarkija cytaty ź nieisnujučych intervju, u jaho historyjach fihuravali nieisnujučyja piersanažy.
Kłaas Rełotyus «falsifikavaŭ artykuły ŭ hrandyjoznych maštabach i navat prydumlaŭ hierojaŭ», — havorycca ŭ redakcyjnym artykule na sajcie Spiegel.
Vydumki jość u niekalkich repartažach žurnalista, u tym liku materyjałach, adznačanych uznaharodami, dadali ŭ redakcyi časopisa. Jak pryznaŭsia žurnalist, prydumanyja fakty i kamientary ŭtrymlivajucca ŭ 14 jaho repartažach. U redakcyi ličać, što takich materyjałaŭ moža być bolš.
Siarod materyjałaŭ z fejkaŭ — artykuł «Apošni śviedka» — pra amierykanca, jaki prysutničaje na śmiarotnych pakarańniach u roli śviedki, «Dzieci lvoŭ» — pra dvuch irakskich dziaciej, vykradzienych bajevikami ekstremisckaj hrupoŭki «Isłamskaja dziaržava», i «Numar 440» — ab źniavolenych turmy ŭ Huantanama. Usie hetyja teksty byli naminavanyja na prestyžnyja ŭznaharody, za niekatoryja Rełotyus atrymaŭ pryzy.
Časopis Spiegel — adzin z najstarejšych i samych prestyžnych na płaniecie. Zasnavany ŭ 1947 hodzie, siońnia Spiegel vychodzić nakładam kala 725 tys. drukavanych asobnikaŭ, u internecie časopis kožny miesiac čytajuć kala 6,5 młn čałaviek. Časopis viadomy doŭhimi i padrabiaznymi repartažami i rasśledavańniami.
33-hadovy žurnalist pačaŭ svaju karjeru ŭ Spiegel pazaštatnym supracoŭnikam u 2011 hodzie.
Za siem hadoŭ pracy ŭ časopisie Rełotyus napisaŭ kala 60 artykułaŭ. Mnohija ź ich praŭdzivyja, nastojvaje jon.
U 2014 hodzie Kłaas atrymaŭ uznaharodu Si-en-en jak najlepšy reparcior. U 2013-m, 2015-m, 2016 hodzie i 2018-m hadach žurnalistu ŭručali prestyžnuju premiju Deutscher Reporterpreis. Akramia Spiegel, jon supracoŭničaŭ z mnohimi inšymi prestyžnymi časopisami.
Kropku ŭ bliskučaj karjery maładoha aŭtara pastaviła kamandziroŭka ŭ ZŠA. Rełotyusu i jaho kalehu Chuanu Marena daručyli napisać pra mieksikanskich mihrantaŭ i pra toje, jak da ich staviacca ŭ ZŠA.
Paśla taho jak Marena ŭbačyŭ Rełotyusa ŭ spravie, u jaho źjavilisia padazreńni nakont jaho pracy. Jon davioŭ ich da redaktaraŭ, ale tyja nie prysłuchalisia, i sumiesny artykuł byŭ nadrukavany ŭ listapadaŭskim numary časopisa.
Tym časam Marena pačaŭ ŭłasnaje rasśledavańnie. Dla pracy nad nastupnym artykułam jon znoŭ pajechaŭ u ZŠA i arhanizavaŭ sustreču z dvuma ludźmi, na jakich Rełotyus spasyłaŭsia ŭ svaim artykule.
Akazałasia, što hetyja krynicy ŭvohule nikoli nie sustrakalisia z žurnalistam, heta značyć, ich słovy Rełotyus vydumaŭ ad pačatku da kanca.
Jon prydumaŭ płakat z nadpisam «Mieksikancam uvachod zabaronieny», jaki nibyta bačyŭ u Miniesocie. Vydumaŭ Rełotyus i bolšuju častku svajho materyjału ab siryjskim chłopčyku — hety jaho tekst niezadoŭha da skandału byŭ adznačany žury adnaho ź niamieckich žurnalisckich konkursaŭ za vydatny styl.
Kłaas zvolniŭsia sa Spiegel. U časopisie miarkujuć, što fejki mahli ŭtrymlivacca i ŭ artykułach, jakija jon pisaŭ dla inšych ŚMI.
Sam žurnalist skazaŭ kaleham, što «chvory i maje patrebu ŭ dapamozie». Bolš razhornutych publičnych kamientaroŭ jon pakul nie rabiŭ.
Jak ciapier vyhladaje palitźniavoleny Ihar Łosik FOTA1
Kamientary