Alaksandr Łukašenka pravioŭ siońnia pracoŭnuju sustreču ź dziaržaŭnym sakratarom Rady biaśpieki Stanisłavam Zasiem, pieradaje BIEŁTA.
Stanisłaŭ Zaś prainfarmavaŭ kiraŭnika dziaržavy ab svaich sustrečach z kiraŭnikami dziaržaŭ — členaŭ ADKB, jakija pavinny byli ŭzhadnić jaho kandydaturu na pasadu hienieralnaha sakratara arhanizacyi. Takaja forma pryznačeńnia była prapanavanaja Alaksandram Łukašenkam na listapadaŭskaj sustrečy prezidentaŭ u Sankt-Pieciarburhu.
Dziaržsakratar Rady biaśpieki Biełarusi ŭžo naviedaŭ Kyrhyzstan, Kazachstan, Tadžykistan i Rasiju. Kiraŭniki hetych dziaržaŭ uchvalili biełaruskuju kandydaturu. Alaksandr Łukašenka taksama aficyjna padtrymaŭ pryznačeńnie Stanisłava Zasia, padpisaŭšy adpaviedny prajekt rašeńnia Rady kalektyŭnaj biaśpieki ADKB.
«Ja raniej kazaŭ pra toje, što byŭ nie adzin kandydat ad Biełarusi. Ale ja spyniŭsia na prapanovie Zasia, kab pakazać, kali možna tak skazać, prykład, što čas nam užo ŭ hetaj arhanizacyi pierajści ad niejkaha farmalnaha pryznačeńnia byłych, adstaŭnych hienierałaŭ (ničoha nie chaču drennaha skazać pra ich) da dziejučych maładych i pierśpiektyŭnych hienierałaŭ, kab nadać značeńnie hetaj arhanizacyi. Tym bolš što my pryznačali adstaŭnych hienierałaŭ, jakija ŭžo daŭno adyšli ad vajskovaj słužby, ad palityki, ale ŭsio ž taki heta vajenna-palityčnaja arhanizacyja «, - rastłumačyŭ kiraŭnik krainy svajo rašeńnie.
Jon vykazaŭ nadzieju, što takoj praktyki ŭ budučyni buduć prytrymlivacca i inšyja členy ADKB pry pryznačeńni svaich pradstaŭnikoŭ na pasadu hienieralnaha sakratara.
«I, naturalna, heta adpaviadaje našym kryteram padrychtoŭki i pryznačeńnia kadraŭ: prafiesijanalizm i luboŭ da toj spravy, jakoj ty budzieš zajmacca», - dadaŭ Alaksandr Łukašenka.
Jak ciapier vyhladaje palitźniavoleny Ihar Łosik FOTA1
Kamientary