Biełaruskuju pieradaču pa RTVi pierakryvajuć multfilmami

Aperatar efirna-kabelnaha telebačańnia «Kosmas TV» pierakryvaje multfilmami prahramy mižnarodnaha rasiejskaha kanału RTVi, na jakim ad pačatku hodu vychodziać pieradačy, pryśviečanyja Biełarusi. Heta ŭžo nia pieršy vypadak «filtracyi» kabelnym aperataram źmiestu RTVi: ad siaredziny sakavika na ŭvieś peryjad prezydenckaj kampanii kanał byŭ niedastupny biełaruskim telehledačam. Tady ŭ ofisie «Kosmas TV» spasyłalisia na techničnyja pryčyny. Što zaminaje kabelnamu aperataru ciapier?

Prahrama «Akno ŭ Eŭropu» na telekanale RTVi tranślavałasia štoniadzielu (z dvuchtydniovym pierapynkam u sakaviku) z paŭtorami ŭ paniadziełak, aŭtorak, sieradu i čaćvier.

U apošnija vychodnyja prahrama, jak zvyčajna, anansavałasia pa-biełarusku biahučym radkom, adnak u pryznačany čas zamiest «Akna ŭ Eŭropu» telehledačy ŭbačyli multfilmy.

Nie źjavilisia abiacanaja pieradača i ŭčora. Pradstaŭnik «Kosmas TV» Alaksandar Karnaŭch tłumačyć:

(Karnaŭch: ) «Moža, technična heta adbyvajecca i praz nas, nia viedaju, nia budu harantavać, ale padazraju, što heta robicca dzieści na bolš vysokim uzroŭni. Chutčej za ŭsio, sama sytuacyja tak skłałasia…»

Cikaŭlusia, ci mohuć da sytuacyi mieć dačynieńnie novyja rasiejskija suŭładalniki «Kosmas TV», jakija, jak było abvieščana, pretendujuć na surjoznuju dolu ŭ sumiesnym biznesie?

(Karnaŭch: ) «Pakul što infarmacyi, jakuju ja moh by ahučyć, peŭna, niama. Pryjaždžali novyja suzasnavalniki, ahučvali novyja plany, ale jany nie zaćvierdažnyja. Pakul na papiery ničoha niama, nie biarusia štości kazać».

Na pačatku hodu kansorcyjum na čale ź niamieckaj kampanijaj «Medyja kansałta» staŭ pieramožcam tenderu Eŭrakamisii ŭ spravie arhanizacyi niezaležnaha viaščańnia na Biełaruś. Ciaham dvuch hadoŭ musić być raźmierkavana 2 miljony eŭra pamiž šeraham ŚMI dziela arhanizacyi tematyčnych vypuskaŭ pra padziei ŭ Biełarusi.

U lutym startavali adrazu dva prajekty, aryjentavanyja na biełaruskuju aŭdytoryju: pačało viaščańnie «Eŭrapiejskaje radyjo dla Biełarusi» (štodzionnaja hadzinnaja pieradača na rasiejskaj i biełaruskaj movach). Na telekanale RTVi 26 lutaha vyjšła pieršaja pieradača pad nazvaj «Akno ŭ Eŭropu». Za vyklučeńniem niekalkich tydniaŭ prezydenckaj kampanii, jana tranślavałasia ŭ niadzielu z paŭtorami ŭ budnyja dni.

Dyrektar kanału RTVi Michaił Barščeŭski raskazaŭ, što nia viedaje pra vypadki zamieny prahramaŭ na inšyja, ale źviazvaje heta z precedentam padčas prezydenckaj kampanii.

(Barščeŭski: ) «Adzin z bujniejšych kabelnych aperataraŭ, jaki z nami pracuje ŭ Biełarusi, paviedamiŭ nam pra takuju sytuacyju: maŭlaŭ, było telefanavańnie ź niejkaha «vierchu» z žorstkim patrabavańniem adklučyć naš kanał. Ale ž u aperataraŭ jość kantraktnyja abaviazacielstvy, i kali adklučyć nazaŭsiody, to firma moža zbankrutavać. Mnie nia vielmi, praŭda, zrazumieła, čaho baicca ŭ dadzienym vypadku ŭłada i tyja ludzi, jakija jaje pradstaŭlajuć, adsiakajučy telehledačoŭ ad adnaho z samych papularnych telekanałaŭ».

Dyrektar kanału RTVi Michaił Barščeŭski nie vyklučaje jurydyčnych zachadaŭ suprać aperatara, jaki nie vykonvaje padpisanych damoŭlenaściaŭ. Adnak, pavodle spadara Barščeŭskaha, napačatku daviadziecca razabracca ŭ pryčynach takich pavodzinaŭ «Kosmas TV».

Lider Abjadnanaj hramadzianskaj partyi Anatol Labiedźka, sustrakajučysia dniami ŭ Berlinie z pradstaŭnikami kansorcyjumu «Medyja kansałta», naŭprost zajaviŭ: prajekt «Akno ŭ Eŭropu» jak tendencyja vartaja ŭvahi. Adnak z hledzišča efektyŭnaści jaho značeńnie roŭnaje nulu.

U pryvatnaści, palityk vykazaŭ niedavier ćvierdžańniu, što ŭ 25-chvilinnaj pieradačy na RTVi 750-tysiačnaja aŭdytoryja. Pavodle Labiedźki, pieradusim biełarusy nia majuć techničnych mahčymaściaŭ da taho, kab masava prymać syhnał RTVi.

Radyjo Svaboda

• 0
• 0
• 0
• 0
• 0
• 0
• 0
• 0