Kali vašy baćki dažyli da 100 hadoŭ, ci značyć heta, što i vy pražyviacie doŭha? Navukoŭcy dali adkaz
Daśledčyki praanalizavali zdaroŭje bolš jak dźviuch tysiač naščadkaŭ doŭhažycharoŭ — i voś ich vysnovy.
Ludzi, jakija dažyvajuć da sta hadoŭ, sustrakajucca nadzvyčaj redka i daŭno cikaviać navukoŭcaŭ. Adno z hałoŭnych pytańniaŭ — što dazvalaje im žyć tak doŭha i jakuju rolu tut adyhryvaje spadčynnaść.
Navukoŭcy ź Miedycynskaha kaledža Albierta Ejnštejna ŭ Ńju-Jorku vyrašyli pravieryć, ci pieradajecca pieravaha doŭhažycharoŭ ich dzieciam. Dla hetaha, jak piša Scence Alert, daśledčyki praanalizavali danyja troch praciahłych daśledavańniaŭ. U ich udzielničali bolš za 2300 dziaciej ludziej, jakija pražyli nie mienš za sto hadoŭ, i bolš za 1700 čałaviek, čyje baćki nie byli doŭhažycharami.
Vyniki va ŭsich troch hrupach akazalisia padobnymi. Jak pišuć aŭtary, u dziaciej doŭhažycharoŭ ryzyka raźvićcia hipiertanii była na 32% nižejšaja, sardečna-sasudzistych zachvorvańniaŭ na 33%, a ryzyka śmierci ŭ lubym uzroście na 42% nižejšaja, čym u kantrolnaj hrupie. U dvuch z troch daśledavańniaŭ u naščadkaŭ doŭhažycharoŭ taksama była mienšaja ryzyka insultu.
Bolš za toje, chvaroby ŭ ich nie tolki ŭźnikali radziej, ale i źjaŭlalisia paźniej. Naprykład, hipiertanija ŭ siarednim raźvivałasia prykładna na piać hadoŭ paźniej, a śmierć nastupała ŭ siarednim na try hady paźniej, čym u ludziej z kantrolnaj hrupy.
Pry hetym navukoŭcy nie vyjavili istotnaha źnižeńnia ryzyki zachvareć na rak. Aŭtary dapuskajuć, što dzieci doŭhažycharoŭ mohuć lepš pieranosić ankałahičnyja zachvorvańni i radziej pamirać ad ich, ale dla paćviardžeńnia hetaha patrebnyja dadatkovyja daśledavańni.
Sprava nie tolki ŭ zdarovym ładzie žyćcia
Možna było b vykazać zdahadku, što dzieci doŭhažycharoŭ prosta pierajmajuć ad baćkoŭ bolš zdarovy ład žyćcia. Dyjeta, kureńnie, adukacyja i sacyjalna-ekanamičnaje stanovišča sapraŭdy ŭpłyvajuć na vierahodnaść uzrostavych zachvorvańniaŭ.
Adnak daśledčyki paraŭnali ludziej z padobnymi pakazčykami pa hetych faktarach, i pieravaha dziaciej doŭhažycharoŭ usio roŭna zachoŭvałasia.
Heta śviedčyć, što pryčyna moža być hłybiejšaj i prynamsi častkova tłumačycca hienietykaj. Niekatoryja ludzi, vidać, atrymlivajuć u spadčynu dadatkovuju bijałahičnuju pieravahu, jakaja pavialičvaje ich šancy na bolš doŭhaje i zdarovaje žyćcio.
«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna2323
«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna23
Pamiatajecie minčuka, jaki ŭ 2017‑m vyratavaŭ ściah z-pad noh amapaŭcaŭ — koštam svajoj svabody? Ciapier jamu, byłomu palitviaźniu, patrebnaja dapamoha1414
Kamientary