U Biełastoku zaviali dziasiatki kryminalnych spraŭ suprać biełarusaŭ, što prykidvalisia palakami. Iłže-palakam pahražaje da 5 hadoŭ turmy, paviedamlaje euroby.info.
U sud Biełastoka pastupiła pieršaja kryminalnaja sprava ŭ dačynieńni da iłže-palaka. Abvinavačany 34-hadovy biełarus Dźmitryj M. vykarystaŭ padroblenyja dakumienty ab svajoj prynaležnaści da polskaha naroda.
Biełarus padavaŭ dakumienty na atrymańnie karty palaka ŭ Biełastoku ŭ miascovaje vajavodskaje praŭleńnie. U jakaści dokazu svajoj suviazi z Polščaj pradstaviŭ paśviedčańnie ab naradžeńni. Jak akazałasia, hrafa ab nacyjanalnaj prynaležnaści maci «polka» była padroblenaj. Prynamsi, tak zajaŭlaje prakuratura.
Zvyčajna padobnyja spravy da suda nie dachodziać. Iłže-palaki pryznajuć vinu, iduć na pahadnieńnie sa śledstvam i abychodziacca štrafami.
U dadzienym vypadku biełarus nie zhodny z abvinavačvańniem. Mienavita tamu spravu razhladaje sud. Kali biełarusa nie apraŭdajuć, jamu pahražaje da 5 hadoŭ turmy.
Pavodle infarmacyi polskaj prakuratury, u Biełastoku raspačali dziasiatki padobnych kryminalnych spraŭ u dačynieńni da ludziej, jakija vykarystoŭvajuć padroblenyja dakumienty ab prynaležnaści da polskaha naroda. Iłže-palaki stali masava vyjaŭlacca ŭ Polščy z 2018 hoda.
Kamientary