«Nu što jamu narabiłasia? Hetyja biednyja dzietki sami ŭsio starajucca». Rodnaja napadnika sa Stoŭbcaŭ raskazała pra jahonuju siamju
Svaboda parazmaŭlała sa svajačkaj dziesiacikłaśnika Vadzima M., jaki napaŭ z nažom na nastaŭnicu i vučniaŭ u siaredniaj škole №2 u Stoŭbcach. Ciotka baćki napadnika raskazała pra siam‘iu, dzie vychavaŭsia chłopiec.
Zdareńnie adbyłosia siońnia rankam. 53-hadovaja nastaŭnica historyi i hramadaznaŭstva pamierła ad ran. Paźniej stała viadoma, što zahinuŭ jašče 17-hadovy padletak, dva — 15-hadovy i 16-hadovy — zastajucca ŭ reanimacyi.
Baćka Vadzima M., jaki ŭčyniŭ napad u staŭbcoŭskaj škole, pracuje vadzicielem u kamunhasie ŭ Stoŭbcach. Tam ža, prybiralščycaj, pracuje i maci. Abaim niama jašče i 40 hadoŭ. Jany pachodziać ź viosak u Staŭbcoŭskim rajonie. Žyvuć u Stoŭbcach.
Jak raspaviała svajačka baćki školnika, u siam‘i, aprača Vadzima M., jość mienšaja dačka, jakaja chodzić u 5-ju klasu toj samaj škoły, dzie adbyłosia zdareńnie.
«Mnie siońnia zvoniać biez kanca svajaki. Nu ŭsie kažuć, što jon uzorny vučań, pavodziny dobryja, a što jamu stałasia? Ci jon što ŭ internecie rabiŭ, ci čym zajmaŭsia!? Baćka jahony zaŭsiody byŭ rady, što jon doma, ź siam‘ioj, ni ŭ jakija durnyja kampanii nia lez. Zaŭsiody z baćkami, razam. Nikoli baćki raniej na jaho nia skardzilisia, što kuryć ci jašče što», — kaža stryječnaja babula Vadzima M.
Siam‘iu, u jakoj vychavaŭsia chłopiec, jana nazyvaje spakojnaj i pracavitaj. A samoha Vadzima M. nazyvaje «narmalnym i adekvatnym chłopčykam».
«Vielmi dobraja siamja. Hetyja biednyja dzietki (baćki. — RS) sami ŭsio starajucca. Pracujuć. Mašynu kupili sami, dom sami. Bačyła niejak niadaŭna baćku i pytajusia: jak, skažy, Vadzim ža ŭ 10-y kłas [chodzić], moža, i pastupać kudy ŭžo źbirajecca? A jon kaža: ciocia, jon taki svojski ŭ nas, damašni. I ŭsie tak pra jaho kažuć. Charošy i dobry vučań byŭ. Spakojny, uzorny chłopiec. Što jon zrabiŭ, što tam atrymałasia, nia viedaju».
Skantaktavacca z baćkami Vadzima M. joj pakul nie ŭdałosia.
«Dzie ž jany sami pazvoniać. Jaho złavili ž užo. Peŭna, i baćki tam niedzie. Biednyja. Nu što jamu narabiłasia, u mianie ŭ hałavie nia ŭkładvajecca».
«Celiŭ u horła»: stali viadomyja padrabiaznaści zdareńnia ŭ Stoŭbcach, dzie školnik zarezaŭ nastaŭnicu i vučnia
Dziesiacikłaśnik u Stoŭbcach napaŭ z nažom na nastaŭnicu i adnakłaśnikaŭ, dvoje zahinuli
Vylecieła ŭ nieviadomym kirunku śpikierka KR Anžalika Mielnikava30
Kamientary