«Cana žyćcia — 10 kapiejek». Invalid pamior paśla bojki z-za sprečki ŭ čarzie ŭ minskim supiermarkiecie

5 lutaha ŭ minskim supiermarkiecie adbyŭsia kanflikt pamiž dvuma pakupnikami. 39-hadovy minčuk schapiŭ za kaŭnier 64-hadovaha invalida, udaryŭ jaho ab ścienku, a potym spuściŭ z prystupak. Paciarpiełamu zrabili niekalki apieracyj, ale jon pamior u špitali, nie prychodziačy ŭ prytomnaść. Napadnik znachodzicca na voli i, pa słovach siamji zahinułaha, navat nie paprasiŭ vybačeńniaŭ, piša Tut.by

— Majho muža zabili ŭ kramie, — zryvajučysia na ślozy raspaviadaje Ludmiła Rusieckaja. — Muž u mianie paśla insultu, pravy bok u jaho pracavaŭ 50 na 50 — ruka nieruchomaja, naha ciahnułasia. Jon kuplaŭ niešta ŭ kramie, i na stužku la kasy pasypalisia kapiejki. Viedajecie, jak paśla insultu, ciažka spravicca. Moža, aburaŭsia. Paśla insultu ŭ jaho było parušana maŭleńnie. Jon hučna razmaŭlaŭ. Heta mahło razdražniać … Nasuprać, la inšaj kasy, stajaŭ mužčyna. Pamiž imi pačałasia svarka.

Dačka zahinuŭšaha Julija dapaŭniaje:

— Jak ciapier kažuć u Malinaŭcy, cana žyćcia — 10 kapiejek. U taty rassypalisia maniety na kasie, adna manietka trapiła pad stužku. Jon staŭ ich źbirać. Paprasiŭ dastać 10 kapiejek ŭ kasira. Jana adkazała: «Jak ja dastanu, tut stužka nierazbornaja». Baćka staŭ niervavacca, bo insultniki, jak dzieci, vielmi ŭsprymalnyja da ŭsiaho.

Svajaki zahinułaha razmaŭlali ź vidavočcami, hladzieli materyjały videanazirańnia.

— Na videa bačna, jak tata bubnić pad nos, — kaža Jula. — Na susiedniaj kasie pakupnik praź plačo pavaročvajecca i adkazvaje niešta baćku. Paśla druhoj repliki vidać, što adkazvaje jon užo na emocyjach, pačynaje niervavacca. Dalej toj mužčyna padychodzić da kasy, dzie staić tata, adsoŭvaje pakupnicu pierad im, biare baćku za kaŭnier, ciahnie ŭ tambur i tam kidaje jaho ab ścianu. Potym biare za škirku, adkryvaje dźviery na vulicu i z paroha vykidvaje jaho. Tata lacić praz prystupki, padaje na śpinu, i ruka, jakaja ŭ jaho nie pracuje, tak i zastajecca sahnutaj. Hety mužčyna sychodzić. Potym viartajecca, pieravaročvaje tatu, i da ich padychodzić achoŭnik. Pačynaje telefanavać u chutkuju i milicyju. Napadnik u hety momant sprabavaŭ źbiehčy, ale achoŭnik jaho dahnaŭ.

Svajaki spadziavalisia, što ŭ balnicy baćku nakładuć švy na hałavu, i nieŭzabavie vypuściać. Jamu zrabili dźvie apieracyi, adnak u siabie mužčyna ŭžo nie pryjšoŭ, pamior 9 lutaha.

Viadoma, što napadniku 38 hadoŭ. Jon pracuje achoŭnikam u hulniavym kłubie ŭ Malinaŭcy.

— Nam skazali, što jon byŭ ćviarozy, — udakładniaje Ludmiła Faminična. — Muž moj naohuł nie piŭ, jon — invalid druhoj hrupy.

— Paśla taho, što zdaryłasia, da nas nie źviartaŭsia ni napadnik, ni jaho rodnyja — nijakich vybačeńniaŭ, nijakaha raskajańnia, - kaža dačka zahinułaha. - Ja nie razumieju, čym baćka tak pieraškodziŭ hetamu čałavieku. Nu, dobra pasvarylisia. U kramie kožny dzień takoje moža adbycca. Ale jakoje prava ty maješ raspuskać ruki? Na videa bačna, što ŭ taty ruka nie pracuje, jon nie moh dać nijakaha adporu!

Pa słovach svajakoŭ, napadnik znachodzicca na svabodzie.

— Śledčy nam skazaŭ, što prakuror nie bačyć padstavaŭ trymać jaho pad vartaj, — kaža dačka zahinułaha.

Zaviedziena kryminalnaja sprava pa fakcie naŭmysnaje pryčynieńnie ciažkaha cialesnaha paškodžańnia, što paciahnuła pa nieaściarožnaści śmierć čałavieka (č. 3 art. 147 KK). Kali vina budzie dakazanaja, minčuku pahražaje ad 5 da 15 hadoŭ pazbaŭleńnia voli. Jak rastłumačyli ŭ Śledčym kamitecie, z ulikam asoby abvinavačanaha da jaho ŭžytaja miera strymańnia ŭ vyhladzie padpiski ab niavyjeździe i naležnych pavodzinach.

• 0
• 0
• 0
• 0
• 0
• 0
• 0
• 0