«Padletki mohuć admovicca ad hiniekałahičnaha ahladu». Jak apraŭdvajucca daktary paśla taho, jak im daručyli paviedamlać milicyi pra seks
Na minułym tydni na kalehii hałoŭnaha ŭpraŭleńnia adukacyi Minabłvykankama načalnik adździeła pa supraćdziejańni handlu ludźmi Jaŭhien Dubanievič zajaviŭ: «Kali na štohadovych miedahladach vyjavicca, što dziaŭčaty da 16 hod mieli pałavuju suviaź, hiniekołah budzie abaviazany adrazu ž paviedamić pra heta načalniku miascovaha UUS».
Pa słovach Dubanieviča, u takich vypadkach miedycynskaja tajamnica pierastaje być aktualnaj, bo na pieršaje miesca vychodzić vyjaŭleńnie złačynstva suprać pałavoj niedatykalnaści niepaŭnaletnich.
Paśla takoj naviny hramadstva vybuchnuła abureńniem i krytykaj.
Čytajcie taksama.
Viktar Marcinovič: Jon, Jana i tavaryš śledčy
Ale hramadskaść abmiarkoŭvała tolki zajavu milicyi, što ž pra heta dumajuć daktary?
Kab rasstavić kropki nad «i», «Naša Nina» pahutaryła z adnym z hałoŭnych hiniekołahaŭ krainy. Na žal, pres-słužba Ministerstva achovy zdaroŭja admoviłasia ŭzhadnić kamientar (takaja praktyka isnuje).
Tamu, kirujučysia intaresami čytačoŭ, my publikujem atrymany kamientaryj, nie nazyvajučy imia hiniekołaha, jaki pahadziŭsia ahučyć svaju pazicyju pa skandale ź miedahladami.
«Usie daktary pracujuć vyklučna ŭ pravavym poli»
«Chutčej za ŭsio, vykazvańnie Jaŭhiena Dubanieviča było nieabdumanym ci jaho vyrvali z kantekstu žurnalisty. Dalej pačałosia čakanaje — haračuju temu raściahnuli pa partałach i padali sa svaimi pamyłkovymi interpretacyjami.
Usie daktary pracujuć vyklučna ŭ pravavym poli, ničoha nie źmianiłasia. Samaje hałoŭnaje dla nas — kab vykonvalisia pravy čałavieka, a kali idzie havorka pra niepaŭnaletnich — pravy dziaciej.
Ministerstva achovy zdaroŭja šmat hod vybudoŭvała daviernuju atmaśfieru pamiž dziećmi i miedykami. I na siońnia niejkaje razumieńnie, davier byli dasiahnutyja. A ciapier atrymlivajecca, što pamyłkovaje vykazvańnie adnaho čałavieka moža ŭsiu hetuju pracu pierakreślić?
Baraćbu z kišennymi kradziažami nielha vyrašyć, vydaŭšy zakon pra zabaronu kišeniaŭ. Tut taja samaja situacyja».
Dyk što ŭsio ž budzie ź miedyčnaj tajamnicaj?
«Milicyja nie moža prymusić daktaroŭ pajści na vydaču miedyčnaj tajamnicy — takich precedentaŭ nie było i nie budzie.
U Biełarusi isnuje takoje paniaćcie, jak «miedycynskija prafahlady», jany rehłamientavanyja 96-j pastanovaj Ministerstva achovy zdaroŭja. Dziaciej pavinny ahledzieć pierad pastupleńniem u daškolnuju ŭstanovu ci ŭ škołu (kali heta nie było zroblena pierad sadkom). A dalej iduć rehłamientavanyja terminy ahladaŭ: pačynajučy z 14—15 hod štohod.
Važna: z 14 hod dzicia samastojna moža admovicca ad hetych prafahladaŭ. Viedajecie, kala balnic niama achoŭnikaŭ z sabakami i rašotki na voknach nie stajać.
I samaje cikavaje, pra što našy hramadzianie banalna mohuć nie viedać: u mierapryjemstvy prafiłaktyčnaha ahladu hiniekałahičny ahlad nie ŭvachodzić. Kali dzicia i jaho baćki nie majuć skarhaŭ na zdaroŭje, na niejkija patałahičnyja boli, vydzialeńni i hetak dalej, nichto nie budzie hvałtoŭna zahaniać padletka na hiniekałahičnaje kresła. Doktar pavinien tolki adsačyć ahulnaje raźvićcio, pahladzieć małočnyja załozy i žyvot.
Kali dzicia i baćki admaŭlajucca ad prafahladu, nichto ich za heta karać nie budzie».
Pra chłopčykaŭ i dziaŭčynak
«Toje, pacyjentka cnatlivaja ci nie, nikoli nie źjaŭlajecca metaj hiniekałahičnych ahladaŭ, doktar nie daje takich zaklučeńniaŭ (tym bolš na zvyčajnych ahladach heta možna vyjavić nie zaŭsiody).
Hałoŭnaja meta daktaroŭ — tolki kali baćki i dzicia sami pryjšli sa skarhami na zdaroŭje — pabačyć rysy mahčymych supraćpraŭnych dziejańniaŭ u dačynieńni da pacyjenta, niejkija infiekcyi, i tolki tady dać sihnał pra drennaje stanovišča, kab jamu chutčej dapamahli.
Usie čamuści pryčapilisia da pałavoha akta i defłaracyi, ale seksualny hvałt u adnosinach da dziaciej u bolšaści vypadkaŭ nie pra heta. Heta mohuć być dziejańni roznaha charaktaru: naprykład, virtualny hvałt — hruminh, čacinh i hetak dalej.
I mienavita takija złačynstvy važna papiaredzić. Tut niavažna, darečy, pra kaho idzie havorka: pra chłopca ci dziaŭčynku. Abyvacieli razvažajuć, što voś u dziaŭčynak my možam niejak adsačyć seksualnaje žyćcio — značyć, budziem ich kantralavać. Adnak heta hiendarnaja niaroŭnaść: pa statystycy, achviarami seksualnaha hvałtu bieź niepasrednaha pałavoha kantaktu chłopčyki stanoviacca navat čaściej.
Havorka ŭ dadzienych vypadkach nie idzie pra padletkaŭ, jakija zajmajucca seksam, — chaj zajmajucca na zdaroŭje, kali heta pa kachańni, biez prymusu. Hałoŭnaje, kab jany ŭmieli zaścierahacca ad ciažarnaści i infiekcyj».
Kamientary