Asoby hodu

Rejtynh NN.

Čałaviek hodu: Viktar Hančarenka

Chojnicki, mieležaŭski typaž hety Hančarenka. 31‑hadovy trenier BATE naradziŭ novuju biełaruskuju lehiendu. Fantastyčny ŭźlot barysaŭskaj kamandy ŭ Lihu čempijonaŭ byŭ zasłuhaj unikalna maładoha (try hulcy kamandy starejšyja za jaho) treniera. Zasłužyŭ hodnaść čałavieka hodu ŭ Biełarusi.

Viktar Hančarenka naradziŭsia ŭ 1977 u Chojnikach Homielskaj vobłaści. Haduniec chojnickaj spartovaj škoły i staličnaj Respublikanskaj vučelni alimpijskaha reziervu (RVAR). Vystupaŭ za RVAR (1995—1997) i BATE (1998—2002). Abaronca. Dvuchrazovy čempijon Biełarusi (1999, 2002). Karjeru hulca zaviaršyŭ praz surjoznuju traŭmu — razryŭ kryžapadobnaj źviazki, mienisk. U čas vystupleńnia za BATE zdymaŭ kvateru razam z varatarom nacyjanalnaj zbornaj Jurjem Žaŭnovym.

Adukacyja vyšejšaja. U 2004 skončyŭ Biełaruskuju akademiju fizičnaj kultury (trenier pa futbole). U 2004 — 2006 pracavaŭ trenieram dublujučaha składu BATE. Ź listapada 2007 — hałoŭny trenier BATE.

Žanaty, vychoŭvaje syna Arcioma, jakomu krychu bolš za hod. Maci i siastra žyvuć u haradskim pasiołku Akciabrski, što na Homielščynie. Baćka, jaki pracavaŭ u Čarnobyli ŭ pieršyja dni paśla avaryi, pamior u 1993, pachavany ŭ Chojnikach. Hančarenka kaža, što mienavita baćka pryščapiŭ jamu luboŭ da futbołu.

Lubimyja kłuby — «Mančester Junajted», «Viljareał», «Miłan». Lubimyja treniery — Fabijo Kapeła, Aleks Fierhiuson, Arsien Vienhier.

Hančarenka staŭ samym maładym trenieram u historyi Lihi čempijonaŭ. Kaža, što pierad startam Lihi čempijonaŭ chvalavaŭsia mieniej, čym pierad viasiellem.

Chobi — Formuła‑1. Lubimy honščyk — Chemiłtan. Lubimaja kamanda — «Makłaren».

Muzyka — nijakich pieravahaŭ nie maje.

***

V.Šejman

U. Makiej

Pieraraźmierkavańnie hodu: Uładzimir Makiej i Viktar Šejman

U 2008 hodzie Biełaruś atrymała novaha šeraha kardynała. A razam ź im — novy aficyjny kurs. Na pasadzie kiraŭnika Administracyi prezidenta strašnaha Viktara Šejmana źmianiŭ Uładzimir Makiej. Jaki z usich siłaŭ imkniecca padavacca niastrašnym i uvasablać kurs biełaruskaj ułady na libieralizacyju i prymireńnie ź Jeŭrasajuzam. Što niemałavažna — Makiej čaściakom fihuruje na fotach pobač ź Viktaram Łukašenkam.

Taksama ź blizkaha atačeńnia Alaksandra Łukašenki vybyli mnohija pradstaŭniki staroj hvardyi — Hienadź Niavyhłas, Aleh Pralaskoŭski. Źmianili mułkija kresły staršyniaŭ abłvykankamaŭ na siniekuru ŭ pałacie pradstaŭnikoŭ i nacyjanalnym schodzie Andrejčanka i Batura.

Farmalna jastrab Šejman palacieŭ za toje, što nie ŭpilnavaŭ vybuchu na Dzień Respubliki. Adnak zboku toj vybuch vyhladaje jak zručnaja nahoda. Šejman padazrajecca ŭ datyčnaści da źniknieńniaŭ apanientaŭ ułady. Jon zastaŭsia ŭ śpisie nievyjaznych u krainy Jeŭrasajuzu navat paśla admieny sankcyj. Taki čałaviek oj jak nie treba ciapier Łukašenku na zaŭvažnaj pasadzie.

Sychod hodu: Iryna Kazulina

Iryna Kazulina, jakaja na toj čas užo nie mahła havaryć, znajšła siły adkazać adkrytym listom. «Začapiła za žyvoje hreblivaje staŭleńnie da našaj siamji. Choć časam zdajecca, što ničoha padobnaha ŭžo nie moža vyvieści ź siabie, cynizm dzivić. Tyja prapanovy, jakija byli ahučanyja jaho pasłancam nam, byli nieprymalnymi. Heta było b haniebnymi ŭciokami z krainy».

23 lutaha, praz tydzień paśla vystupu kiraŭnika krainy, Iryna Kazulina pamierła ad raku małočnaj załozy. Administracyja kałonii doŭha nie chacieła vypuskać A. Kazulina na pachavańnie žonki. Ale los pakutnicy‑žančyny abudziŭ takuju chvalu hramadskaha spačuvańnia i abureńnia, što ŭłady ŭrešcie byli vymušanyja adškadavać palityku try dni adpačynku. Raźvitacca ź Irynaj u Čyrvony kaścioł i na mohiłki ŭ Tarasava pryjšli niekalki tysiač čałaviek.

Problisk hodu: Michaś Paškievič

U krainie źjaviŭsia novy enierhičny palityk. Za hod lider «Maładych demakrataŭ» Michaś Paškievič prajšoŭ praz kryminalny sud u «Pracesie čatyrnaccaci», vyklučeńnie z apošniaha kursu histfaku BDU (jamu zastavałasia tolki abaranić dypłom), adsiadzieŭ ahulnaj kolkaściu 37 sutak administracyjnaha aryštu. Navat prysud na dva hady «chatniaj chimii» kreatyvu ŭ Paškieviča nie adniaŭ. Prykinuŭšysia beeresemaŭcam, jon pranik na źjezd «łukamołu» i, dabivajučysia słova, ŭźniaŭ tam chaj padčas vystupu vice‑premjera Kosinca. Niaŭrymślivy Michaś Paškievič vyhladaje adnym z najbolš pierśpiektyŭnych palitykaŭ novaj hienieracyi. Aby nie pierahareŭ, jak užo časta byvała z «maładymi dy rańnimi».

Hrymior hodu: łord Beł

Hod pracy nie minuŭ darma. Intervju z Łukašenkam źjavilisia ŭ najbujniejšych hazietach Jeŭropy i ZŠA. Darečy, mienavita Beł za niekalki dzion da vyzvaleńnia Kazulina, Kima i Parsiukieviča zajaviŭ, što na volu vyjduć palitviaźni.

Druhoj najvažniejšaj zadačaj brytaniec nazyvaŭ praviadzieńnie parłamienckich vybaraŭ. Tut demakratyčnyja dekaracyi ruchnuli. Adnak Jeŭropa ŭsio nastrojenaja praciahvać dyjałoh. I tut zasłuha Beła, biezumoŭna, jość. Adno što ŭłada pilna sočyć, kab Bełava navuka rabić dobruju minu nie stała sapraŭdnaj minaj, zakładzienaj pad «stabilnaść» i «praćvitańnie».

Ptuška hodu: Michaił Śniahir

Katedžy budavali ŭsie, a krajnim zastaŭsia Śniahir. Prakuror Minskaj vobłaści staŭ hałoŭnaj achviaraj antykarupcyjnaha dakładu Łukašenki 13 listapada. Pretenzii byli vykazanyja da nabytaj prakuroram kvatery ŭ centry Minsku, a taksama katedžu, jaki vyhladaje «bolš unušalna za rezidencyju prezidenta».

Za karupcyjnymi pravałami ŭ samym sercy viertykali prahladajucca daŭnija i ciomnyja splacieńni intaresaŭ. U 2000 hodzie pastanovu ab aryšcie Dźmitryja Paŭličenki padpisaŭ mienavita namieśnik hienieralnaha prakurora Michaił Śniahir. A biedny čałaviek, jakoha Śniehir vysieliŭ z kvatery, jak akazałasia, — uładalnik zavodaŭ, haziet, parachodaŭ…

Jašče rasijski caryzm praktykavaŭ zdaču palityčnych aktyvistaŭ u sałdaty.

Sioleta u boty masava abuvali siabroŭ «Moładzi BNF». U vojska zabrali niespraviadliva adličanaha homielskaha studenta Źmitra Žaleźničenku, Alesia Kalitu, Źmitra Bialajeva, Jurja Dašuka, Chviedara Čarankova.

Pryzyŭ‑2009 taksama abiacaje być bahatym. Na čarzie Franak Viačorka, a taksama adzin ź lideraŭ «Maładoha frontu» Ivan Šyła.

Tyja, chto vypisvaje pozvy, spadziajucca, što z dapamohaj armii zmohuć źbić aktyŭnaść maładzionaŭ. Na praktycy ž chłopcy atrymlivajuć niališniuju zahartoŭku. A prykład Tarasa Šaŭčenki pakazvaje, što z vojska časam viartajucca hienijalnymi paetami i simvałami nacyi.

Usiu hamu pačućciaŭ apazicyjnych kandydataŭ u pałatu pradstaŭnikoŭ prailustravaŭ barysaviec Viktar Harbačoŭ, jaki ŭ noč parłamienckich vybaraŭ u intervju «Našaj Nivie» ščyra vyhuknuŭ: «Nas kinuli, blacha!» I stolki adčaju i padmanutaj naiŭnaści čytałasia ŭ jahonych słovach… A što ž vy chacieli?

Biełaruski futboł sioleta prasłaviŭsia nie tolki pośpiechami BATE, ale i ŭčynkam bresckaha sudździ Siarhieja Šmolika, jaki vyjšaŭ pracavać na matč čempijanatu krainy pjanym.

Spačatku balelščyki dumali, što ŭ refiery prosta skurčyła śpinu, ale potym zrazumieli, što Šmolik łyka nie viaža. Kadry, kali arbitra vyvodziać pad ruki z pola, ablacieli najbolšyja telekanały płaniety. Takoha ŭ suśvietnaj futbolnaj praktycy jašče nie bačyli. Sam ža Šmolik byŭ dyskvalifikavany pažyćciova.

Voś vam i adkaz, čym siońniašniaja Biełaruś roźnicca ad inšych krainaŭ śvietu.

Miedalisty piekinskaj Alimpijady, małatabojcy Ivan Cichan i Vadzim Dzieviatoŭski, byli pazbaŭlenyja ŭznaharod. Dopinh‑kantrol pakazaŭ, što testasteron u kryvi atletaŭ zaškalvaŭ. Sami spartsmieny rastłumačyli heta tym, što padčas spabornictvaŭ admovilisia ad seksu i charčavalisia jajcami bujnoj rahataj žyvioły. Voś pakutniki: i ad seksu admovilisia, i ŭsiakaje łajno jeli, i miedaloŭ nie atrymali.

Pakul apalnyja rok‑muzyki zvykajucca da svajho novaha stanovišča i zdymajuć klipy na telekanale «Ład», «Lapis Trubiackoj» vydaŭ nonkanfarmiscki albom. Ź dźviuma pieśniami pa‑biełarusku. U adnoj ź jakich śpiavajecca:

Serca pałaje, dałoń nie dryžyć
Dy palaŭničy - tam voŭk biažyć.
Pahonia pobač —
Budziem žyć!
BELARUS FREEDOM!!!
BELARUS FREEDOM!!!
BELARUS FREEDOM!!!
BELORUSSIA LIBERTA

A. Halijeŭ

Nie tak i mnoha advakataŭ advažvajecca abaraniać palityčnych praciŭnikaŭ Łukašenki. Tamu pracu Alaksandra Halijeva, Marjany Simieški, Paŭła Sapiełki nielha niedaaceńvać. Časta na padobnych pracesach advakaty vystupać z bolš śmiełymi zajavami adnosna situacyi ŭ krainie, čym sami abvinavačanyja. Dla hetaha treba mieć nieabyjakuju hramadzianskuju mužnaść.

Za afiery ź ziamloj byŭ aryštavany adzin z najbahaciejšych ludziej krainy, dyrektar «Ždanovičaŭ» Jaŭhien Šyhałaŭ. Zrešty, zapomniŭsia nie sam aryšt, a rekordny zakład, jaki zapłacili za chvoraha biźniesmiena, kab jon mieŭ mahčymaść zrabić apieracyju za miažoj. Kab Šyhałaŭ ubačyŭ nieba Łondana, było zapłačana kala piaci miljonaŭ dołaraŭ. Ciapier ź jaho patrabujuć jašče 40 — nibyta za parušeńni ekałohiju pry budaŭnictvie handlovaha kompleksu. Zaraz pakinuć i biez Ždanoŭ, i biez štanoŭ.

Adnoj z značnych kulturnych padziej hodu była pastanoŭka miuzikłu «Dzień Maksima».

Hałoŭnuju rolu Maksima Bahdanoviča ŭ pastanoŭcy vykanała… Śviatłana Zielankoŭskaja.

Niachaj «Dzień Maksima» i atrymaŭ nie samyja adnaznačnyja vodhuki, ale ihra samoj Zielankoŭskaj była bliskučaj.

Abama staŭ pieršym afraamierykancam, jaki zaniaŭ pasadu kiraŭnika najmahutniejšaj krainy śvietu. Tak Amieryka kančatkova raźvitałasia z rasavymi zababonami. Abama staŭ novym uvasableńniem amierykanskaj mary. Narodžany ŭ biednaj siamji, jon vybiŭsia ŭ ludzi, skončyŭ adzin z samych prestyžnych univiersitetaŭ. Svaju karjeru jon pačaŭ nie z zarablańnia hrošaj, jak bolšaść jahonych adnahodkaŭ, a z sacyjalnaj raboty ŭ Čykaha.

Śmialčak hodu: irakski žurnalist

Jarka i artystyčny vykazaŭ svaje palityčnyja pohlady irakski žurnalist Muntadar al‑Zajdzi — zapuściŭ tuflami ŭ Džordža Buša. Pasprabavaŭ by jon špurnuć u Chusejna…

U sakaviku ŭsia Biełaruś była šakavanaja paviedamleńniem pra zdareńnie na trasie Minsk — Mikaševičy. Kab spynić pjanaha kiroŭcu, jaki z chutkaściu 180 km/h uciakaŭ ad milicyjantaŭ, inśpiektary DAI pieraharadzili darohu pryvatnymi lehkavymi aŭtamabilami, nie vysadziŭšy adtul ludziej. Na ščaście, abyšłosia biez čałaviečych achviaraŭ, chacia kiroŭca Mianciuk i ŭrezaŭsia ŭ adzin z aŭtamabilaŭ. Infarmacyja patrapiła ŭ presu. Śledam pačali ŭspłyvać i daŭniejšyja padobnyja vypadki… U vyniku Ramanu dali piać hadoŭ kałonii, a milicyjanty‑arhanizatary ŭsiaho tolki abmiežavalisia ŭmoŭnymi terminami i rabotu pamianiali.

Dzicia hodu: Mikołka Łukašenka

Kiraŭnik krainy braŭ syna na Alimpijadu ŭ Piekin, a taksama na samit SND u Biškiek. Na pytańnie pra maci Koli, Łukašenka adkazaŭ, što «heta adna doktarka». Ludzi ž zvyklisia, što ŭ televizary Łukašenka źjaŭlajecca ciapier vyklučna z synam.

***

Tekst Źmitra Pankaŭca

Fota Julii Daraškievič, Uładzia Hrydzina, photo.bymedia.net, gazetaby.com, belta.by, AP, nytimes.com, naviny.byž

• 0
• 0
• 0
• 0
• 0
• 0
• 0
• 0