Łukašenka pavinšavaŭ dyktatara Mjanmy z nacyjanalnym śviatam

Prezident Biełarusi Alaksandr Łukašenka ad imia biełaruskaha naroda i siabie asabista, piša BIEŁTA, pavinšavaŭ prezidenta Sajuza Mjanmy, staršyniu h.zv. Dziaržsavieta mira i raźvićcia, hałoŭnaha hienierała Tan Šve z nacyjanalnym śviatam — Dniom niezaležnaści.

Tan Šve kiruje Mjanmaj (byłaja Birma) z 1992 h.

U samym samym pačatku jon pravodziŭ bolš libieralnuju palityku, čym jaho žorstkija papiaredniki. Navat pavypuskaŭ z turmy palityčnych apanientaŭ i asłabiŭ miery suprać liderki apazicyi Aun San Su Čžy, što ad 1989 h. utrymlivajecca pad chatnim aryštam.

Zmahaŭsia Tan Šve žaleznaj rukoj z karupcyjaj i navat dazvoliŭ mižnarodnym arhanizacyjam — Čyrvony Kryž i Mižnarodnaja amnistyja — naviedvać Mjanmu. Sklikaŭ Nacyjanalny schod dla vypracoŭki kanstytucyi. Zrešty Kanstytucyja tak i nie była pryniata, a Nacyjanalny schod raspuščany. A suprać ŚMI užytyja represii.

Dyjałohu z apazicyjaj tak i nie vyjšła, a Aun San Su Čžy znoŭ była pasadžana pad chatni aryšt.

U Mjanmu viarnulisia samyja zmročnyja časy tatalnych represij i samaizalacyi.

Tan Šve pieraśleduje nie tolki palityčnych apanientaŭ i usich niezadavolenych, ale nacyjanalnyja mianšyni. 250 tys. pradstaŭnikoŭ narodnaści rachindža byli vymušanyja ratavacca ŭ Banhładeš.

Uvosień 2007 h. Tan Šve žorstka padaviŭ akcyi budyjskich manachaŭ, jakija pratestavali suprać dyktatury.

U traŭni 2008 h. na Mjanpu abrynuŭsia cykłon «Narhis». Tan Šve abmiežavaŭ mižnarodnuju dapamohu achviaram stychijnaha biedstva, admoviŭsia puskać u krainu rataŭnikoŭ i daktaroŭ i spyniŭ dopusk zamiežnikaŭ u rajony katastrofy. Los svajho narodu jaho mała cikavić.

Cikava, što Indyja papiaredziła vajennuju chuntu pra nabližeńnie stychii za dva dni, ale zalevy zastali mjanmarcaŭ źnianacku. U vyniku zahinuli kala 30 tys. čałaviek, a 2,5 miljony zastalisia biaz dachu nad hałavoj i srodkaŭ dla isnavańnia.

***

Pra Tan Šve chodziać čutki jak pra małaadukavanaha, zakrytaha. kryŭdlimvaha čałavieka, jaki bolš času bavić za kamputaram ci hulaje holf, ale tolki nie zajmajecca dziaržaŭnymi spravami.

Kiravańnie Tan Šve apošnim časam nabyvaje ŭsio bolej rysaŭ manarchii, i pra Tan Šve užo kažuć jak pra cara.

U lutym 2008 hodu amierykanski časopis «Parade» (dadatak da The Washington Post) abnarodavaŭ śpis samych žortskich dyktataraŭ sučasnaści. U jaho uvajšli lider KNDR Kim Čen Ir, Sudana - Amar al‑Bašyr, Mjanmy Tan Šve i karol Saŭdaŭskaj Aravii Abdała.

• 0
• 0
• 0
• 0
• 0
• 0
• 0
• 0