«Kab zatknuć rot, mianie treba rasstralać». Błohier Piatruchin pra svaju kryminalnuju spravu
Intervju Svabody z błohieram Siarhiejem Piatruchinym z Bresta pierad vyrakam. Prakuror patrabuje dla jaho 2 hady «chimii» za abrazu milicyjantaŭ.
U Bieraści zaviaršajecca sud nad błohieram Siarhiejem Piatruchinym, jaki abvinavačvajecca ŭ paklopie i abrazie milicyjantaŭ. Błohier abvinavačańni adchilaje, kažučy, što nie abražaŭ kankretnych milicyjantaŭ.
Na minułym pasiedžańni prakuror zapytaŭ dla Piatruchina 2 hady z nakiravańniem na «chimiju», 100 bazavych štrafu. Aproč taho, čatyry milicyjanty chadajničajuć ab spahnańni ź Piatruchina ahułam 7000 rubloŭ «za maralnyja pakuty».
Paciarpiełymi ŭ spravie prachodziać milicyjanty Siarhiej Ihnaciuk, Dźmitry Jakuševič, Siarhiej Tokun, Ihar Halancič. Jany napisali zajavu na błohiera Siarhieja Piatruchina za abrazu i paklop u adnym ź jahonych videarolikaŭ, paśla čaho i była raspačataja kryminalnaja sprava. Razhladaje spravu sudździa Alaksandar Siemiančuk.
Pravaabarončy centar «Viasna» dy inšyja pravaabarončyja arhanizacyi pryznajuć sud nad błohieram Siarhiejem Piatruchinym palityčna matyvavanym.
Napiaredadni vyraku Svaboda pahutaryła ź Siarhiejem Piatruchinym pra toje, što jon dumaje ab svajoj spravie.
«Kali b nia hetaja sprava, to była b inšaja»
«Ja dumaju, što naŭrad ci hety sud byŭ by, kab nie pratest suprać akumulatarnaha zavodu. Ja pierakanany, što doŭha razvažali, rabić heta ci nie rabić. Navat advakat skazaŭ na sudzie, što ŭpieršyniu takoje bačyć dziva, što paklop i abrazu razam razhladajuć, a nie paasobku. Hetuju spravu pa chadajnictvie hałoŭnaha śledčaha rajonu Syčova zavioŭ prakuror Vierabiej. Karaciej, tut šmat pytańniaŭ, i ja nikoli nie čuŭ, kab takija spravy tak zavodzilisia za abrazu kucharaŭ ci medykaŭ. Čamuści voś kali milicyjant…
U hetaj spravie, što datyčycca paklopu, nia baču składu złačynstva, tamu što ja paŭtaryŭ słovy čałavieka, jaki pra siabie sam raskazvaje, što jaho biŭ milicyjant.
A nakont abrazy — pytańnie, jakoje stavicca pierad ekspertami ŭ kryminalnaj spravie, pavinna być dakładnym. A pytańnie hučyć, ci jość u frahmencie tekstu nehatyŭnaja acenka supracoŭnikaŭ milicyi i ichnyja proźviščy. A ŭ artykule 189 KK havorycca pra abrazu kankretnaha čałavieka. Eksperty spasyłajucca, što niachaj sud heta vyrašaje, dyk navošta tady takaja ekspertyza, kali vy kažacie, kab sudździa Siemiančuk z hetym prakuroram vyrašali, abraza heta ci nie?
Ja ŭpeŭnieny, što kali b nia hetaja sprava, to była b inšaja. Jany pakazvajuć, što kali jany zachočuć, to zrobiać što zaŭhodna. Jany «źjechali z katušak» ad biaśsilla, ad niemačy svajoj».
«Presinh pačaŭsia paśla taho, jak Miaśnikovič źviarnuŭ uvahu»
«Jašče da zaviadzieńnia spravy mnie pisali troli, što ŭ krasaviku mnie śviecić kryminalnaja sprava. Skul jany viedali? Ciapier ja razumieju.
Heta ŭsio tema zavodu. Ja dumaju, u Miensku skazali niejkim čynam strymać sytuacyju. Napačatku ž zatrymlivali nas z Alaksandram Kabanavym, potym zrazumieli, što nia my tam hałoŭnyja asoby, i ciapier, pierad adkryćciom zavodu, pačali ŭciskać usich biez razboru — Źmitra Biekaluka amapaŭcy chapali, Taćcianu Fiesikavu z domu zabirali…
U ich uvohule «pajechaŭ dach» — zakinuli ŭ izalatar Kaciarynu, maci dvaich dziaciej, i pačali praź dziaciej cisnuć, maŭlaŭ, pastavim u sacyjalna niebiaśpiečnaje stanovišča.
Majsieju Maźko patrony padkinuli… Heta niejkaje źvierstva, niejki satanizm.
Jany pakazvajuć, što mohuć zrabić z nami što zaŭhodna. Ale jany vielmi pamylajucca. Hety pratest hruntujecca na samych asnoŭnych pačućciach ludziej — instynkcie samazachavańnia. Ludzi dumajuć pra dziaciej i zdaroŭje.
Takimi ŭčynkami ŭłady kapajuć sabie jamu. Jany robiać Bieraście pratestavym rehijonam. 40 tysiač podpisaŭ suprać zavodu, na jakija nijak nie adreahavali — ludzi hetaha nie darujuć.
Hety zavod, jak lakmusavaja papierka, pakazaŭ, jak ułady staviacca da ludziej.
Aktyŭny presinh pačaŭsia paśla taho, jak Michaił Miaśnikovič publična źviarnuŭ uvahu na pratest suprać zavodu. Heta była admaška, heta byŭ — «fas». Jon litaralna skazaŭ, što navošta takija čynoŭniki, kali prostyja ludzi za vas razumniejšyja, sprytniejšyja, na entuzijaźmie źbirajucca».
«Kali sašluć — zrobiać mianie pakutnikam, zorkaj»
«Da ssyłki na «chimiju» ja hatovy. Kab zatknuć rot, mianie treba chacia b rasstralać. Jak by jany nie zrabili, mnie jany horš nia zrobiać. Kali sašluć — zrobiać mianie pakutnikam, zorkaj, pryciahnuć uvahu da mianie.
Jany paprakajuć mianie niejkimi polskimi hrašyma. Pahladzicie, jak ja žyvu — u mianie niama mašyny, u mianie ničoha niama. Tamu z hetym štrafam 100 bazavych i kampensacyjami milicyjantam chaj iduć sami viedajecie kudy. Ja ničoha im płacić nia budu, chaj robiać što chočuć. Chaj zakryvajuć vyjezd za miažu, mianie heta nie chvaluje. Heta maja kraina, i ja adsiul źjaždžać nie źbiraŭsia.
Ja vielmi ŭdziačny ludziam, jakija mianie padtrymlivajuć, prychodziać na sudy, dapamahajuć hrašyma, spłočvajuć štrafy. U mianie vialikaja padtrymka. I kali ŭłady pakarajuć za praŭdu tak, to mianie jašče bolš ludziej pačujuć.
Dziaržaŭnuju televiziju ludzi nie hladziać. Ludzi hladziać błohieraŭ, heta vidać pa tym, jak achviarujuć kapiejčynaj. Mianie ludzi prosiać tolki pisać, a na advakataŭ jany dapamohuć. Heta natchniaje».
Ci jość strach?
«Strach? Strach jość. Tamu što ŭ nas niama zakonu, niama sudoŭ, milicyi… Vy adčuvajecie paradoks? Ludzi prychodziać da mianie, da takoha ž biezabaronnaha čałavieka, kab ja abaraniŭ ich ad milicyjantaŭ. To što tut možna kazać? Jak ja mahu siabie adčuvać biaśpiečna, kali viedaju, što luby hety milicyjant moža zrabić sa mnoj što zaŭhodna.
Toje, što adbyvajecca sa mnoj — heta nastup na svabodu słova, mianie bjuć za krytyku i, viadoma, za hety zavod, za jakim stajać niečyja vialikija intaresy».
Jakim budzie vyrak?
«Ja nia viedaju. Nie pakarać jany nia mohuć. Štraf, ja dumaju, budzie. Ale kali nakirujuć na «chimiju», to heta mianie nie pužaje. Ja ž prajdu ŭsie sudy, až da AAN».
Kamientary