Vampire Weekend — Father Of The Bride
Pieršy za šeść hod albom amierykanskaha indzi-hurta. Jaho mała viedajuć u nas, a ŭ kalekcyi Vampire Weekend jość navat statuetka Hremi za najlepšy alternatyŭny albom.
Za hety doŭhi čas šmat čaho źmianiłasia: u muzykaŭ naradzilisia dzieci, skład kamandy źmianiŭsia, ale jany ŭsio jašče chočuć hrać u toj samy indzi z afrykanskimi matyvami.
Bad Religion — Age Of Unreason
Siamnaccataja płytka lehiendarnych pankaŭ z 40-hadovaj historyjaj. Viadomyja svaimi vostrasacyjalnymi tekstami, Bad Religion nie mahli abminuć uvahaj źmieny, jakija adbyvajucca ŭ amierykanskim hramadstvie i palitycy.
«Hurt zaŭsiody vystupaŭ za kaštoŭnaści aśviety. Siońnia hetyja kaštoŭnaści iściny, svabody, roŭnaści, pamiarkoŭnaści i navuki znachodziacca ŭ realnaj niebiaśpiecy. Hety zapis — naš adkaz», — kaža pra novy albom hitaryst hurta Bret Hurevič.
Rhye — Spirit
Rhye — heta muzyčny prajekt, u jaki ŭvachodzili kanadski śpiavak Majk Miłaš dy dacki instrumientalist Robin Chenibał. U 2017 hodzie datčanin pakinuŭ kalektyŭ, i dalejšy šlach kalektyvu staŭ vyznačać Majk Miłaš.
Jak trapna acharaktaryzavali reliz na Pitchfork, hrajučy na dziciačym pijanina, Miłaš adlustroŭvaje pačućcio rytualnaj cišyni; heta nie niazhrabna, a vielmi intymna.
Injury Reserve — Injury Reserve
Injury Reserve — heta muzyčnaje trya z Aryzony, jakoje składajecca z adnaho pradziusara i dvuch emsi.
Dla ich muzyki składana pryviazać termin «chip-chop», niechta nazyvaje takuju muzyku džaz-repam za niežadańnie traplać u ramki žanra i pastajannyja ekśpierymienty.
The National — I Am Easy To Find
I Am Easy to Find — heta adnačasova muzyčny albom i karotkamietražny film. A ŭsie razam — adzin z samych pryhožych art-tvoraŭ apošnich hadoŭ.
Jon naradziŭsia amal vypadkova. Paśla tura ŭ padtrymku svajho pieradapošniaha relizu Sleep Well Beast hurt chacieŭ zrabić paŭzu, ale atrymaŭ list ad režysiora Majka Miłsa. Jon pryznaŭsia ŭ svajoj daŭniaj lubovi da hurta i prapanavaŭ supracoŭnictva.
Tak źjaviłasia ideja stvaryć klip, ale abmiažoŭvacca piacichvilinnym videa Miłsu nie chaciełasia. The National na entuzijaźmie dasłali režysioru ŭsie svaje biahučyja napracoŭki, dzie materyjału chapiła b na ceły film — u vyniku film i atrymaŭsia.
Paźniej da prajekta padklučyłasia Alisija Vikander — askaranosnaja aktrysa taksama akazałasia fanatkaj i režysiora, i hurta. 26-chvilinny rolik mała čym pachodzić na filmy inšych artystaŭ. I Am Easy to Find — heta sproba vizualizavać niepasredna muzyku.
Nakidy novaj muzyki natchnili Miłsa na stvareńnie filma, a sama karotkamietražka dapamahła The National sabrać I Am Easy to Find jak albom. Častku tekstaŭ da piesień muzyki padčapili sa scenaryja režysiora, inšuju — natchniŭšysia scenami samoj stužki.
The Heavy — Sons
Muzyku brytancaŭ možna znajści ŭ dziasiatkach filmaŭ i sieryjałaŭ, a taksama ŭ kampjutarnych hulniach. Tamu navat kali vy nikoli nie čuli pra isnavańnie The Heavy, to ź vialikaj imaviernaściu čuli ich pieśni.
Rammstein — Rammstein
Čytajcie taksama: U siecivie źjaviŭsia novy doŭhačakany albom Rammstein. Jaho zapisvali ŭ Minsku
Tut niama čaho doŭha raśpisyvać: lehiendarnyja niemcy viarnulisia. I viarnulisia tryumfalna. Da aficyjnaha relizu alboma ŭ siecivie źjavilisia dva pravakacyjnyja klipy, jakija tolki padahreli intares da płytki.
Jak zaŭsiody, mierkavańni amataraŭ Rammstein padzialilisia, ale heta moža značyć tolki adno: abyjakavych niama.
Tyler, The Creator — IGOR
Svaim šostym albomam IGOR Tajler šturchaje napierad nie tolki siabie, ale i vobraz taho, jakim pavinien być chip-chop albom u 2019 hodzie.
Firmovyja hrubyja bity, praniźlivyja teksty i ahulnaje pačućcio hnievu i ahresii, jakija siłkavali jaho papiarednija albomy, na novym źmianiajucca pavolnym tempam i zachaplalnymi soŭł-prypievami.
Novy albom — heta demanstracyja stałaści, u niedachopie jakoj časta paprakali jaho minułyja albomy. Čas ad času jon hučyć jak albom ab rasstavańni. Ale ŭličvajučy šyzafreničnyja zdolnaści Tajlera havaryć z saboj i pra siabie — ci nie rasstajecca jon tut sa svaim ža minułym?
Groove Dealers — Motherfunk
Druhi albom minskaha fank-hurta.
Jak pryznajucca muzyki, hety reliz atrymaŭ takuju nazvu z-za taho, što ŭ jaho ŭvajšli pieśni krychu ahresiŭnaha charaktaru, zamiašanyja na fanku, roku i elektronnaj muzycy. Atrymaŭsia miełanchaličny, ciomny i ciažki fank.
«Niekatoryja treki adlustroŭvajuć našyja nie samyja lepšyja časy, kali hrošaj niama naohuł ni na što, dy i vakoł nie samyja viasiołkavyja karciny. Ale my pa-raniejšamu ŭsie fizičnyja i duchoŭnyja resursy, jakija ŭ nas jość, układvajem u muzyku, dzielimsia emocyjami i siłaj, kab pieraadoleć usie smuty. Abiacajem: u jakoj by dupie my ni byli, my ŭsio roŭna znojdziem siły vyjści napierad i skazać: «Hej, a zacani maju fankiłu!»
Kali vam cikava pasłuchać jašče štości novieńkaha ź biełaruskaj muzyki, TUT možna pasłuchać debiutny EP «Soram» ad dueta «luty sakavik».
Čatyry pieśni biez sumnych i nienavisnych elektryčnych hitar — prosta takt, bas i sintezatary. Siońniašniaja interpretacyja sint-popu, post-panku i minimał-uejvu. Novyja i niečakanyja roli Eryka Arłova-Šymkusa i Uładzimira Lankieviča, jakija raniej hrali ŭ inšych hurtach.
Denzel Curry — ZUU
«Ja prosta chacieŭ zapisać albom, u jakim ludzi ŭbačyli b siabie», — tłumačyć repier.
Aŭtar adnaho z najlepšych chip-chop albomaŭ minułaha hoda TA1300 nie hublaje času i na chajpie vypuskaje novy. Kali letašni byŭ mocna kanceptualnym, to z hetym praściej — heta chronika rodnaha horada Karał-Sici, jaki miascovyja kličuć «zaaparkam» (Zuu).
A što vy słuchali ŭ mai? Pišycie ŭ kamientarach!
Kamientary