Camit Juščanka‑Łukašenka: start dla Vyšahradskaj hrupy 2.0?

Momant udały, surjoznaść možna budzie acanić pa vyrašeńni zastarełaj prablemy miždziaržaŭnaha doŭhu. Piša Dzianis Mieljancoŭ.

20 studzienia adbyłasia dvuchbakovaja sustreča prezidentaŭ Biełarusi i Ŭkrainy, jakaja płanavałasia jašče z 2007 hoda, ale kožny raz adkładałasia z roznych pryčynaŭ. Niahledziačy na toje, što pad čas hetaje sustrečy nie ŭdałosia vyrašyć usich prablemaŭ biełaruska‑ŭkrainskich adnosinaŭ, jana pa pravie moža ličycca losavyznačalnaj dla ŭsioj Uschodniaj Jeŭropy.

Vizit Alaksandra Łukašenki ŭ Čarnihaŭ staŭ praryŭnym nie ŭ sensie dasiahnutych pahadnieńniaŭ, ale ŭ sensie hłybokaha simvalizmu i vyraznaści «pasłańnia», u pryvatnaści, Kramlu.

Pa‑pieršaje, hety vizit rychtavaŭsia dva hady, i kožny raz jamu zaminali roznyja čyńniki, hałoŭnym ź jakich byŭ pat u vyrašeńni prablemy ŭkrainskaha doŭhu, praź jakuju niemahčyma było kančatkova zakryć pytańnie ŭkrainska‑biełaruskaj miažy. Analityki padkreślivali, što vizit moža adbycca tolki tady, kali budzie znojdziena rašeńnie prablemy doŭhu, abo kali ŭ bakoŭ źjavicca palityčnaja vola zapluščyć vočy na hetaje pytańnie dziela vyrašeńnia stratehičnych prablemaŭ. Tamu hetaja sustreča havoryć pra źjaŭleńnie supolnych prablem, jakija kaštujuć bolš za stomiljonny doŭh.

Pa‑druhoje, sustreča Juščanki i Łukašenki adbyłasia nie ŭ adnoj sa stalic, a ŭ Čarnihavie, jaki raźmieščany pamiž Minskam i Kijevam.

Pa‑treciaje, sustreča prajšła mienavita 20 studzienia, u dzień inaŭhuracyi novaha prezidenta ZŠA. Takim čynam, źmiena administracyi simvalizuje i pieramieny ŭ rehijanalnaj palitycy va Ŭschodniaj Jeŭropie.

Pa‑čaćviortaje, vizit adbyŭsia praktyčna adrazu paśla zaviaršeńnia rasijska‑ŭkrainskaj hazavaj vajny, što padkreślivaje jahonuju tematyku i značnaść nie tolki dla Ŭkrainy i Biełarusi.

Aficyjnaja sustreča dvuch lideraŭ u Čarnihavie stałasia zaviaršeńniem davoli praciahłaha pieryjadu ŭ biełaruska‑ŭkrainskich adnosinach, jaki raspačaŭsia paśla «Pamarančavaj revalucyi» i charaktaryzavaŭsia intensifikacyjaj handlu pry ahulnym nizkim uzroŭni palityčnych kantaktaŭ. Na prastory SND Ukraina i Biełaruś zajmali supraćlehłyja palityčnyja pazicyi, adnak na siońnia supolnyja vykliki prymušajuć Minsk i Kijeŭ šukać šlachi kaardynacyi svajoj palityki.

Sustreča mieła vynikam padpisańnie cełaha pakietu druhasnych dakumientaŭ. Značnaść padpisanych dakumientaŭ nie patrabavała sustrečy na vyšejšym uzroŭni, tym bolš što ani pytańnie doŭhu, ani pytańnie miažy vyrašana nie było. Sustreča kiraŭnikoŭ dziaržaŭ była važnaj sama pa sabie, a nie ad padpisanych pahadnieńniaŭ.

Jana dała mahčymaść pry začynienych dźviarach abmierkavać tyja pytańni, jakija pakul što rana vynosić na papieru, siarod jakich kaardynacyja ŭ miežach inicyjatyvy «Ŭschodniaje partniorstva» ES, Bałta‑Čarnamorski transpartny kalidor i naftapravod «Adesa‑Brody».

Fakt i źmiest sustrečy Juščanki i Łukašenki ŭ Čarnihavie dazvalajuć zrabić šerah vysnovaŭ datyčnych raźvićcia ŭsiaho rehijonu.

1. Biełaruś paśladoŭna pravodzić palityku vychadu ź mižnarodnaj izalacyi,

2. Palityčnaje zbližeńnie z Ukrainaj źjaŭlajecca častkaj narmalizacyi adnosinaŭ z Zachadam

3. Naładžvańnie kantaktaŭ z Ukrainaj śviedčyć pra sproby znajści alternatyŭnuju ES i Rasii aporu ŭ rehijonie.

4. Raspačynajecca praca ŭ nakirunku kaardynacyi tranzitnaj palityki Biełarusi i Ŭkrainy,

5. Pačatak abmierkavańnia supolnych dziejańniaŭ što da ŭdziełu va Ŭschodnim partniorstvie ES i kaardynacyi padychodaŭ Kijeva i Minska ŭ stasunkach ź Jeŭrakamisijaj śviedčać pra

mahčymaść naradžeńnia va Ŭschodniaj Jeŭropie druhoha vydańnia Vyšahradskaj hrupy, metaj jakoj, nahadaju, była kaardynacyja ŭstupleńnia ŭ Jeŭrapiejski sajuz.

• 0
• 0
• 0
• 0
• 0
• 0
• 0
• 0