«Sustrakaju na pryjomie darosłych žančyn, jakija nie viedajuć słova «mienstruacyja». Doktar daje parady mamam dziaŭčynak

1. Nie ŭpuskajcie momant, kali dzicia pačynaje pierabirać vahu.

Heta vielizarnaja prablema: bačyć dziaŭčat, jakija ź dziacinstva ličać, što ich atłuścieńnie — heta siamiejnaje. Nie prydumvajcie apraŭdańniaŭ, budźcie sumlennymi z saboj i dziciom.

Čamu tak važna sačyć za vahoj? U dziaŭčat ź lišniaj vahoj raniej nastupaje pałavaja śpiełaść. Nie dumaju, što chtości z mam chacieŭ by bačyć mienstruacyi ŭ svajoj dački ŭ 8 hadoŭ.

Lišniaja vaha — heta insulinarezistentnaść. Jana ŭ padletkaŭ i tak jość, fizijałahičnaja. Dadajom patałahičnuju (z-za lišnich kiłahramaŭ) — i vuala! Pryvitańnie, cukroŭka druhoha typu, mietabaličny sindrom u budučym. Plus estrahien-zaležnyja zachvorvańni — mijomy matki, endamietryjoz.

2. Nie zabyvajciesia, što dla ŭtvareńnia pałavych harmonaŭ patrebny tłušč.

Razmova zaraz pra biaskoncyja dyjety, jakijami pačynajuć mučyć siabie padletki.

Białkova-enierhietyčnaja niedastatkovaść — heta nie prosta pryhožaja nazva deficytu vahi. U hetym usia sutnaść stanu. Kali niama substrataŭ dla sintezu harmonaŭ (białkoŭ i enierhii, to bok tłuščaŭ), jany prosta nie ŭtvarajucca. Vypraŭlać toje, što nie naładžana ŭ dziacinstvie/pubiertacie, — heta naša z hiniekołahami ahulnaja biada.

3. Nie zabyvaciesia raskazvać dačce pra tyja rečy, jakija robiać jaje žančynaj

Vam nie pavinna być soramna kazać dziaŭčyncy pra narmalnyja fizijałahičnyja pracesy, što adbyvajucca ŭ jaje arhaniźmie, narmalnymi słovami. Naprykład, maja trochhadovaja dačka zusim niadaŭna pacikaviłasia, a što heta ŭ mianie takoje i dla čaho jano isnuje. Adkaz (spakojnym roŭnym hołasam) pra toje, što heta hrudzi i jany isnujuć dla taho, kab karmić małoha małakom, jaje całkam zadavoliŭ.

A ja ž pieryjadyčna sustrakaju na pryjomie darosłych žančyn, jakija nie viedajuć značeńnia słova «mienstruacyja». Kali pra fizijałohiju nie paśpiejuć raskazać mamy, to heta zrobić chtości inšy i za jakaść infarmacyi nieści adkaznaść jon nie budzie.

4. Nie dazvalajcie pryznačać vašaj dačce-padletku kambinavanyja aralnyja kantraceptyvy (KAK)

Nierehularny mienstrualny cykł na praciahu pieršych 1-1,5 hoda — heta norma. U hety pieryjad adbyvajecca farmiravańnie vosi hipatałamus-hipofiz-jaječniki, impulsnaj siekrecyi harmonaŭ. Pryjom KAK nijak nie spryjaje hetamu pracesu, a naadvarot błakuje jaho.

Što majem u vyniku? Arhanizm dziaŭčyny, jakaja hadami prymała kantraceptyvy (ad balučych mienstruacyj, pryščoŭ, dla atrymańnia rehularnaha cykła), tak i nie navučyŭsia samastojna vystrojvać fazy cykła.

Kali takaja žančyna, «lečanaja» ŭ dziacinstvie, prychodzić na pryjom, žadajučy naładzić cykł ci zaciažaryć, davodzicca vykručvacca z usich sił. Paviercie, heta składana. Hiniekołahi paćvierdziać.

Ja nie suprać KAK, i dla padletkaŭ u tym liku. Ale jany musiać prymianiacca tolki z metaj kantracepcyi i tolki ŭ dziaŭčat, u jakich ustalavaŭsia rehularny cykł.

• 0
• 0
• 0
• 0
• 0
• 0
• 0
• 0