Kala 3 nočy pa maskoŭskim časie ŭ fejsbuku hienprakurora Ukrainy Rusłana Rabašapki źjaviŭsia repost dopisu supracoŭnicy Viarchoŭnaj rady Hanny Isłamavaj ab zaviaršeńni abmienu źniavolenymi pamiž Rasijaj i Ukrainaj. «Abmien zaviaršyŭsia: maraki, Siancoŭ, Karpiuk, Bałuch, Hryb laciać dadomu», — napisała Isłamava.
Hałoŭny redaktar «Echo Moskvy» Alaksiej Vieniadziktaŭ praz paŭtary hadziny paviedamiŭ u svaim Telegram-kanale, što samalot z vyzvalenymi ukraincami pavinien pryziamlicca ŭ Kijevie ŭ 5-j ranicy.
U 5-j ranicy karespandentu RBK ŭ kijeŭskim aeraporcie Žulany paviedamili, što infarmacyi ab prybyćci rejsa z Rasii sa źniavolenymi niama.
Sakratar Rady nacyjanalnaj biaśpieki i abarony (RNBA) Ukrainy Alaksandr Daniluk u razmovie z karespandentam RBK vykazaŭ nadzieju, što abmien adbudziecca ŭ piatnicu, ale nie paćvierdziŭ prybyćcio borta z Rasii ŭ Kijeŭ.
Kala 8 ranicy pres-sakratar Słužby biaśpieki Ukrainy (SBU) Alena Hitlanskaja zajaviła, što praces pieramovaŭ pa abmienie viaźniami pamiž Rasijaj i Ukrainaj jašče praciahvajecca. «Składany praces pieramovaŭ pa abmienie zakładnikaŭ praciahvajecca. Nabiaryciesia ciarpieńnia, spadziajusia, nienadoŭha. Nie raspaŭsiudžvajcie niepravieranuju infarmacyju. Trymajem kułaki», - napisała jana ŭ Facebook.
Pieramovy ab abmienie pałonnymi pamiž Ukrainaj i Rasijaj praciahvajucca. Pra heta paviedamili ŭ Ofisie prezidenta Ukrainy.
«Praces uzajemnaha vyzvaleńnia zatrymanych praciahvajecca. Infarmacyja ab jaho zakančeńni nie adpaviadaje rečaisnaści. Kali ŭzajemnaje vyzvaleńnie zatrymanych budzie zavieršana, Administracyja prezidenta budzie paviedamlać pra heta pa aficyjnych kanałach», — havorycca ŭ zajavie.
Kamientary