Cieła treciakurśnicy maładziečanskaha politechničnaha kaledža Chryściny Ułachno znajšli kala 8-aj hadziny viečara. Dziaŭčyna skončyła žyćcio samahubstvam, pakul doma nikoha nie było. Zdaryłasia heta paśla taho, jak jana ŭ čarhovy raz nie zdała ekzamien.
Chryścinie było 18 hadoŭ. Jana vučyłasia pa śpiecyjalnaści «Technałohija zachoŭvańnia i pierapracoŭki charčovaj raślinnaj syraviny».
«Naša Niva» pahavaryła z bratam dziaŭčyny.
«Jaje źbiralisia i tak adličyć, ale vyrašyli pamučyć, — upeŭnieny chłopiec. — Jana nie zdała ŭletku ekzamien. Pierazdaču pieranieśli na vosień.
Uvohule, jaje nie vielmi lubili ŭ kaledžy. Asabliva apošnim časam: Chryścina pačała rabić sabie tatuiroŭki, vyhladała śpiecyfična. Jaje krytykavali i abražali za źniešni vyhlad u kaledžy.
Časam vykładčyki prychodzili da baćkoŭ, razmaŭlali ź imi amal što matam.
I ekzamieny Chryścinie davodziłasia pierazdavać nadta ŭžo časta. A kožnaja pierazdača płatnaja. U kaledžy joj adnojčy skazali tak: kali na tatuiroŭki chapaje hrošaj, to i na pierazdaču znojdzieš».
Brat kaža, što ŭ dzień trahiedyi ŭsio było narmalna. Dziaŭčyna była ŭ dobrym humory, była ŭpeŭnienaja, što ekzamien zmoža zdać.
«Jana rychtavałasia da pierazdačy, tamu išła na ekzamien z dobrym nastrojem. Byli płany, što jana raźbiarecca ź pierazdačaj, paśla kupić tort i jany doma z mamaj i babulaj jaho źjaduć, — kaža brat Chryściny. — Kali jana sychodziła ŭsie byli doma, nichto nie zaŭvažyŭ, što štości nie tak.
Ale kali Chryścina viarnułasia paśla ekzamienu dadomu, tam nie było nikoha. Tady jana pazvaniła baćkam, babuli, spytała, kali jany źbirajucca viarnucca».
Daviedaŭšysia, što jašče niekatory čas doma nikoha sa svajakoŭ nie budzie, Chryścina ździejśniła suicyd. Cieła dački znajšła mama, kali viarnułasia dadomu ŭviečary.
Zapiski Chryścina nie pakinuła. Adzinaje što, vykłała «storyz» u instahramie. Napisała «Ja prajhrała» i «Spakojnaj nočy».
U sacsietkach u Chryściny niekalki staronak. Usie pad fejkavymi imionami. Staronki napoŭnienyja davoli depresiŭnymi malunkami.
Ale brat dziaŭčyny kaža, što heta tolki zabaŭki.
«Tak, kantent depresiŭny, i tatuiroŭki ŭ jaje byli takija ž. Ale ŭ mazhach u jaje takoha nie było», — zapeŭnivaje chłopiec.
«Naša Niva» pahavaryła ź niekatorymi adnahrupnikami Chryściny. Kažuć, što apošnim časam na jaje źniešnaść uvahi ŭžo nichto i nie źviartaŭ.
Taksama, pa słovach studentaŭ, ekzamien pa «Abstalavańni» nie zdała tolki Chryścina. Čamu — studenty nie viedajuć.
«Naša Niva» taksama źviazałasia z Hannaj Alisiejka, vykładčycaj kaledža, jakaja nie pryniała tuju złaščasnuju pierazdaču ekzamienu. Ale žančyna kateharyčna admoviłasia ad kamientaroŭ.
Kamientary