Ideja na navahodniaje mieniu: kuryny rulet z kaštanami abo kurahoj
Užo zusim chutka nadydzie čaroŭnaja navahodniaja noč. I ludzi čakajuć hetaje śviata nie tolki tamu, što spadziajucca na zdiajśnieńnie ŭsich svaich maraŭ i na pačatak novaha žyćcia z novaha hoda. Šmat chto čakaje mienavita navahodni stoł, za jakim možna pahamanić sa svajoj siamjoj i siabrami i pakaštavać novyja cikavyja stravy. I kožnamu chočacca ździvić svaich haściej, ale pry hetym nie pravieści ŭvieś viečar na kuchni.
Tamu ja paraju dzivić nie kolkaściu i składanaściu stravaŭ, ale ŭžyvańniem niezvyčajnych inhredyjentaŭ. Naprykład, možna zrabić zvyčajny kuryny rulet, ale dadać u jaho takija niazvykłyja dla nas kaštany, kab atrymać absalutna inšy smak. Smačna jeści!
Kaštany tut nadajuć svojeasablivy sałodka-arechavy smak. Možna pasprabavać zamianić ich kurahoj, kali kaštany budzie składana znajści.
Na 4 rulety:
- 2 vialikija hrudki sa skuraj i kostkaj
- 1 cybulina
- 1 zubčyk časnaku
- pałova morkviny
- 50 hram rysu
- 50 hram hreckich arechaŭ
- 100 hram kaštanaŭ
- aliŭkavy alej
- sol, pierac
Pačniom z taho, što zvarym kaštany. Na skurcy kožnaha kaštana robim nadrez šyrynioj santymietr ci dva. Apuskajem kaštany ŭ kastrulu z vadoj i varym chvilin 30—40 da miakkaści (unutry jany pavinny lohka prakałvacca videlcam). Kaštany čyścim i režam na siarednija kavałki.
Pakul varacca kaštany, rychtujem usio astatniaje dla načynki. Rys varym da hatoŭnaści ŭ salonaj vadzie. Cybulu, morkvu i časnok drobna narazajem. U patelni razahrajom alej i smažym na im aharodninu da miakkaści. Arechi rubim na kavałki.
Źmiešvajem rys, aharodninu, arechi i kaštany, dadajom sol i pierac — načynka hatovaja!
Kurynyja hrudki zrazajem z kostki, skuru pakidajem. Sprabujem zrabić hrudku jak maha tančejšaj i bolšaj pa płoščy: u toŭstych miescach hrudku narazajem pa haryzantali, ale nie da kanca, kab hrudka zastavałasia cełym kavałkam. Trochi adbivajem, solim i pierčym.
Na kožnuju hrudku vykładajem načynku, zahortvajem ruletam i źviazvajem nitkaj. Šmarujem rulety aliŭkavym alejem.
Zapiakajem rulety ŭ duchoŭcy 40 chvilin pry 180 hradusach. Potym padvyšajem tempieraturu da 200 hradusaŭ i pakidajem jašče na 10 chvilin, kab na ruletach źjaviłasia pryhožaja załataja skarynka.
Kamientary