«Strašyłki» pra manikiur. Ci moža zvykłaja pracedura vyklikać rak, VIČ i inšyja surjoznyja zachvorvańni?
Abmierkavali z doktaram-dermatołaham Kaciarynaj Karpiłovič, ci treba rabić pierapynak u naviedvańni manikiurnaha sałona, jakija chvaroby možna «začapić» u sałonie, i navošta brać z saboj na manikiur soncaachoŭny krem.
Kaciaryna Karpiłovič pracuje doktaram-dermakaśmietołaham užo 12 hod. Za hety čas, raskazvaje doktarka, joj nie raz davodziłasia lačyć zachvorvańni ruk u tym liku i ad nastupstavaŭ niepravilna vykananaha manikiuru.
Doktar-dermatołah Kaciaryna Karpiłovič.
«Manikiur ni ŭ jakim razie nielha ličyć absalutna biaskryŭdnaj praceduraj. Pa-pieršaje, daloka nie ŭsie łaki dla paznohciaŭ biaśpiečnyja. Niekatoryja ź ich utrymoŭvajuć škodnyja farmaldehidy, jakija niehatyŭna mohuć adbicca na zdaroŭi, a pa-druhoje, heta pracedura parušaje cełasnaść skury, što moža pryvieści da roznych infiekcyj», — raskazvaje Kaciaryna Karpiłovič.
Usio čaściej modnicy addajuć pieravahu sałonnamu manikiuru, jaki vykonvajecca hiel-łakam. Jano i zrazumieła, taki manikiur trymajecca na paznohciach 2-3 tydni, jon nie abłazić, paznohci pad im jak praviła nie łamajucca, ale za kamfort i pryhažość davodzicca płacić. Kali nie hrašyma, to svaim zdaroŭjem, bo taki vid manikiuru — heta surjoznaje vyprabavańnie dla paznohciaŭ.
Pa-druhoje, UF-lampy, pad jakimi sušycca hiel, taksama vyklikajuć sumnievy i roznyja mierkavańni daktaroŭ i majstroŭ manikiuru. Niekatoryja ličać, što častaje ich vykarystańnie moža pryvieści da raku skury.
I pa-treciaje, časam, žadajučy zekanomić na naviedvańni sałona, my karystajemsia pasłuhami sumnieŭnych majstroŭ, jakija robiać manikiur doma, dzie instrumient nie apracoŭvajecca i nie dezynfikujecca naležnym čynam. A takoje abyjakavaje staŭleńnie da instrumientaŭ, ź jakimi pracuje vaš majstar, moža taić u sabie navat zaražeńnie VIČ.
«Usio ž treba zaspakoić, što zaražeńnie VIČ u sałonie manikiuru małavierahodnaje. Jak i zaražeńnie hiepatytam. A voś čaho varta aścierahacca sapraŭdy, dyk heta hrybkovaj infiekcyi. Hrybok vielmi ŭstojlivy ŭ źniešnim asiarodździ. Kab zarazicca hrybkovaj infiekcyjaj, dastatkova, kab jana była na instrumientach. Pryčym piłki — adnyja z samych niebiaśpiečnych instrumientaŭ, mienavita na ich zastajucca ŭzbudžalniki zachvorvańnia. U prystojnych sałonach piłki adnarazovyja, tak i pavinna być, ale na praktycy ŭsio inačaj. Taksama praź instrumienty i paškodžańni skury možna zarazicca stafiłakokam ci streptakokam. Jany vyklikajuć zapalenčyja pracesy, jakija časam patrabujuć navat chirurhičnaha ŭmiašalnictva», — raspaviadaje doktar.
Hieli, pudry, łaki, inšyja srodki dla abiastłuščvańnia i źniacca łakaŭ mohuć vyklikać alerhiju. Kali paśla naviedvańnia majstra pa manikiury vy zaŭvažajecie, što skura na palcach pačyrvanieła, śviarbić, stała suchoj, nie čakajcie, što ŭsio projdzie samo, źviartajciesia da doktara.
«Chaču jašče raz spynicca na UF-lampach. Pa svaim pryncypie jany padobnyja na tyja, što stajać u salaryjach. My, dermatołahi, suprać naviedvańnia salaryjaŭ, bo jany pravakujuć raźvićcio miełanomy na skury. Adnak taksama niapravilna paraŭnoŭvać lampy dla manikiuru i lampy salaryjaŭ. U manikiurnych sałonach stajać nie takija mahutnyja lampy, kab jany mahli pravakavać surjoznyja zachvorvańni. Ale, jak kažuć, ścieražonaha boh ścieraže. Pierad naviedvańniem manikiurnaha sałona zmažcie ruki soncaachoŭnym kremam ci apranicie palčatki biez palčykaŭ, kab śviatło lampy nie sušyła skuru ruk», — raić doktar-dermatołah.
Kab źbierahčy zdaroŭje svaich ruk, raić doktar, treba samim kłapacicca pra ŭłasnuju biaśpieku ŭ sałonach.
«Samaja prostaja i dziejsnaja parada — prychodźcie ŭ sałon sa svaimi instrumientami i piłkami. Kali heta parada dla vas nievykanalnaja, to paprasicie chacia b pakazać vam, jak dezynfikujucca instrumienty, paprasicie majstra pracavać u palčatkach», — adkazvaje Kaciaryna Karpiłovič.
Jašče adno pytańnie, jakoje ŭźnikaje ŭ modnic, jakija chočuć zaŭsiody mieć biezdakorny manikiur: ci treba davać svaim paznohciam adpačyć ad doŭhaterminovaha pakryćcia?
«Pačnu z taho, što nohcievaja płaścina — heta prydatak skury, heta dosyć tryvały materyjał. Nohcievaja płaścina nie ŭtrymlivaje potavych i salnych załoz, nie ŭbiraje i nie vyłučaje vilhać, na pavierchni nohcievaj płaściny ŭsie kletki — biez vady, jadra i cytapłazmy. Adpaviedna, charčavańnia paznohciam nie treba. Jano treba tolki zonie rostu — vobłaści kucikuły, dzie kletki intensiŭna dzielacca. Ad kucikuły zaležyć taŭščynia i daŭžynia nohcievaj płaścinki.
To, što paznohci dychajuć, heta pamyłkovaje mierkavańnie, z pavietra nijakija rečyvy da ich nie pastupajuć, tamu što charčavańnie idzie za košt kapilaraŭ, jakija zabiaśpiečvać kryvioj fałanhi palcaŭ.
Naadvarot, jakasnaje pakryćcio dadatkova abaraniaje tonkija płaściny ad uździejańnia źniešnich chimičnych i fizičnych faktaraŭ. Adnak sami majstry manikiuru rekamiendujuć rabić adpačynak paznohciam na 3—4 miesiacy paśla taho, jak vy nosicie doŭhaterminovy manikiur ciaham hodu. Za 3—4 miesiacy poŭnaściu adrastaje nohcievaja płaścina.
Ale vyrašać vam. Pamiatajcie, što paznohci pavinny mieć zdarovy vyhlad. Kali ŭźnikli choć jakija sumnievy, nie palanujciesia, naviedajcie doktara», — prosić Kaciaryna Karpiłovič.
Kamientary