22 lutaha — maštabny «Mova Fest»: na im buduć aktyŭnaści dla małych ad «Dudu» i «Aściarožna: dzieci!»
22 lutaha ŭ minskim kulturnym chabie «OK16» (vuł. Kastryčnickaja, d. 16, k. 27) «Art Siadziba» pry padtrymcy hienieralnaha partniora «Alivaryja» źbiraje razam 50 biełaruskich kampanij, arhanizacyj, inicyjatyŭ i tvorčych kalektyvaŭ, kab hodna pravieści maštabnaje i ŭnikalnaje śviata «Mova Fest», prymierkavanaje da Mižnarodnaha dnia rodnaj movy.
Na šaści tematyčnych placoŭkach «Mova Fest»:
- pakaža i raskaža pra dasiahnieńni biełaruskaj movy za apošnija 10 hadoŭ;
- źbiare razam biznes i hramadskija inicyjatyvy, aktyvistaŭ i tvorčuju intelihiencyju, NDA i prosta aktyŭnych biełarusaŭ, jakija vučać, padtrymlivajuć, papularyzujuć i raźvivajuć biełaruskuju movu;
- prademanstruje rečy, źjavy, vyraby, roznyja pradukty dy mastackija tvory, jakija stvarajucca pa-biełarusku ci pryśviečanyja biełaruskaj movie;
- prezientuje raznapłanavaść i raznastajnaść nośbitaŭ biełaruskaj movy.
Z padrabiaznaj prahramaj śviata vy možacie paznajomicca na staroncy movafest.by.
Aficyjny chešteh śviata #movafest daje mahčymaść nie tolki sačyć za padrychtoŭkaj i praviadzieńniem śviata, ale i vyjhrać padarunki ad partnioraŭ. Śviata 22 lutaha ŭ kulturnym chabie «OK16» pačniecca a 13-j hadzinie i budzie doŭžycca da 22.00. Uvachod volny.
U hetym hodzie na 700 kvadratnych mietrach kulturnaha chaba «OK16» 22 lutaha ceły dzień budzie hučać biełaruskamoŭnaja muzyka: fołk ad Sieržuka Doŭhušava i hurta Vuraj, rep ad Zrabi i Gleboki Smak, pop ad VAL, Hanny Šarkunovaj, Maryi Jermakovaj, Lear i Lery Jaskievič, rok ad hurtoŭ «Mutnajevoka», Akute i chedłajniera śviata, jaki budzie abvieščany 15 lutaha.
Viadomyja ludzi na adkrytaj dyskusijnaj placoŭcy buduć abmiarkoŭvać razam z žurnalistam «Jeŭraradyjo» Źmitrom Łukašukom nacyjanalnuju ideju Biełarusi, biznesoŭcy razam z žurnalistam «Našaj Nivy» Arciomam Harbacevičam — biełaruskuju movu ŭ biełaruskim biznesie, a «Radyjo Svaboda» zaprosić na pryščepku biełaruskaj movy: movaznaŭca Vincuk Viačorka raskaža i pakaža, jakija typovyja i časam śmiešnyja pamyłki robiać pačatkoŭcy dy jak ad ich vylekavacca.
Moŭny kvest daść mahčymaść usim naviednikam śviata pravieryć u niečakanych farmatach svajo viedańnie biełaruskaj movy, a «Mova Bar» — pasłuchać z kuflem piva vieršy siabroŭ PEN-Centra i Sajuza biełaruskich piśmieńnikaŭ.
Uvieś dzień budzie pracavać spartovaja placoŭka ad Leon.by, na joj Vital Hurkoŭ pradstavić majstar-kłas «Tajski boks pa-biełarusku». Paralelna na stendzie Čyrvonaha Kryža i «Terytoryi dapamohi» projdzie majstar-kłas pa pieršaj dapamozie, dzie budzie mahčymaść pa-biełarusku pavučycca vyratavańniu žyćcia darosłaha i niemaŭlaci ŭ vypadku spynieńnia dychańnia, daviedacca, dzie možna prajści navučańnie pieršaj dapamozie pa jeŭrapiejskich standartach.
Na dziciačaj placoŭcy «Naša Niva» prezientuje svaje časopisy «Dudu» i «Aściarožna, dzieci!» dy padrychtuje interaktyŭnyja zabavy razam z aŭtarami vydańniaŭ, a kampanija «Budźma biełarusami!» pradstavić interaktyŭnuju hulniu-śpiektakl «Pa śladach adnaho padańnia».
Ciaham usiaho śviata buduć pracavać vuličnaja placoŭka z fudtrakami «Smačna ŭ rocie» i proma-placoŭka «Mova, hramadstva, biznes» z aktyŭnaściami, stendami, handlovymi punktami ad partnioraŭ «Mova Fest», a zabaŭlać haściej śviata biełaruskimi tradycyjnymi hulniami, zabavami i tancami buduć studyja «Varhin» i kapeła «Koliśnija».
Štohadovaje śviatkavańnie Mižnarodnaha dnia rodnaj movy ŭ Biełarusi stała sapraŭdnaj narodnaj inicyjatyvaj, jakuju z kožnym hodam padtrymlivaje ŭsio bolš i bolš biełarusaŭ. Kali jašče 7 hadoŭ tamu ŭ hety dzień aktyvisty pravodzili nievialikija mierapryjemstvy dla vuzkaha koła biełaruskamoŭnych siabroŭ, to za apošnija try hady adbylisia značnyja źmieny. Naprykład, letaś prykmietnymi byli mierapryjemstvy nie tolki ad hramadskaha siektara, ale taksama ad dziaržaŭnych ustanoŭ, ŚMI i bujnoha biznesu.
Kamientary