«Dumaju, samyja demakratyčnyja krainy nas nie asudziać». Łukašenka patrabuje prymusić pryvatnyja kampanii stvaryć prafsajuzy
Alaksandr Łukašenka siońnia padčas źjezdu Fiederacyi prafsajuzaŭ zajaviŭ, što ŭ pieršuju čarhu prafsajuzy — heta harant i abaronca pravoŭ rabotnikaŭ pa ŭsich napramkach, u tym liku i na pradpryjemstvach u pryvatnym siektary. Na jaho dumku, pieršasnyja prafsajuznyja arhanizacyi da miesca i tam. Praca pa ich stvareńni prafaktyvam viadziecca, ale jość abjektyŭnyja składanaści.
«Pryvatniku nie zaŭsiody zručna mieć u siabie prafsajuz, jaki budzie sačyć za vykanańniem pravoŭ rabotnikaŭ, prymušajučy časam adstupicca ad svaich finansavych intaresaŭ. Ale dziaržava pajšła na libieralizacyju ŭmoŭ dla biźniesu. Dyk pakažycie i vy svaju stałaść, zdolnaść nieści sacyjalnuju adkaznaść pierad ludźmi, — źviarnuŭsia da pryvatnaha biźniesu Alaksandr Łukašenka. — My ŭžo hety biźnies nastolki libieralizavali, što dalej niama kudy. Užo staršynia Kamiteta dziaržkantrolu Anfimaŭ ledź nie z chvalavańniem kožny raz pytajecca, možna tudy iści ci nie. Idzicie tudy, kudy treba, i nie saromiejciesia».
Kali biźnies nie razumieje, to budzie raspracavany ŭkaz ab stvareńni na pryvatnych pradpryjemstvach pieršasnych prafsajuznych arhanizacyj, papiaredziŭ kiraŭnik dziaržavy. «Heta nie spantannaje rašeńnie», — rastłumačyŭ jon. Pavodle jaho słoŭ, jamu nadakučyła słuchać, što pryvatny biźnies nie choča stvarać u siabie prafsajuznyja jačejki. «Treba prymusić ich», — zajaviŭ Alaksandr Łukašenka.
«Ja dumaju, samyja demakratyčnyja krainy nas nie asudziać. Za što nas asudžać? My ž demakratyčna chočam abaranić pravy čałavieka. Pryvatniki jak staviać pytańnie: pastaŭcie nas u adnolkavyja ŭmovy ź dziaržaŭnymi pradpryjemstvami. Voś my ich i pastavim. I ŭsio ž taki treba skazać, što ŭžo, moža, bolšaść pryvatnikaŭ stvaryli hetyja prafsajuznyja arhanizacyi i dumajuć: a čym my horšyja za tych, chto nie stvaryŭ? Tamu treba, kab sapraŭdy ŭsie byli ŭ adnolkavych umovach. Kali nie razumiejuć prostuju čałaviečuju movu, kali ŭžo ja im ab hetym havaru, i jany hetaha nie čujuć. Heta niedapuščalna», — padkreśliŭ Łukašenka.
Ciapier čytajuć
Načalnik kryminalnaha vyšuku MUS bačyŭ prahułačny dvoryk SIZA KDB z akna svajho kabinieta, a potym sam staŭ viaźniem3
Kamientary