Pačynajučy z nastupnaha paniadziełka, 4 maja, u Polščy adnoviać rabotu hateli i handlovyja centry. Takija zahady ažyćciaŭlajucca ŭ miežach druhoha etapa źniaćcia abmiežavańniaŭ, uviedzienych u suviazi z epidemijaj karanavirusa. Pra rašeńnie ŭrada paviedamiŭ premjer-ministr Matevuš Maraviecki. Pavodle jaho słoŭ, źniaćcie abmiežavańniaŭ zaklikana adnavić ekanamičnaje žyćcio krainy, paviedamlaje Radyjo Polšča.
«My pierakananyja, što nam udałosia ŭstanavić peŭny kantrol nad epidemijaj karanavirusa. U toj ža čas my nie možam być upeŭnienyja ŭ tym, što całkam kantralujem virus. My viedajem, čaho možna čakać praź miesiac-dva-try. My pavinny dziejničać aściarožna i ełastyčna, tamu my paśladoŭna adkryvajem ekanomiku, ale pry hetym my nikolki nie sasłablajem normaŭ biaśpieki i sacyjalnaha dystancyjavańnia», — adznačyŭ polski premjer.
Maraviecki taksama paviedamiŭ, što z 4 maja buduć adkryty niekatoryja muziei i biblijateki, jakija zmohuć adpaviadać sanitarnym normam va ŭmovach epidemii, a taksama sportplacoŭki, na jakich zmohuć zajmacca da 6 čałaviek.
Pa stanie na 29 krasavika, ahulnaja kolkaść zaražanych karanavirusnaj infiekcyjaj ŭ Polščy skłała 12 415 čałaviek, u tym liku 606 śmiarotnych vypadkaŭ.
Kamientary