«Niepadjomnyja i niespraviadlivyja»: kataliki apublikavali zajavu nakont Čyrvonaha kaścioła

Fota Nadziei Bužan

U suviazi z haračym abmierkavańniem u biełaruskim hramadstvie pravavoj situacyi i zapazyčanaści parafii śviatoha Symona i śviatoj Aleny, Kuryja Minska-Mahiloŭskaj archidyjacezii [h.zn. upraŭleńnie kaścioła ŭ Minskaj i Mahiloŭskaj abłaściach] apublikavała zajavu.

Čyrvony kaścioł vinavaty dziaržavie 166 tysiač rubloŭ padatkaŭ? Vierniki źviartajucca da Łukašenki

Minskija ŭłady: Tak, Čyrvony kaścioł vinny dziaržavie 166 tysiač rubloŭ

Zajava Kuryi Minska-Mahiloŭskaj archidyjacezii adnosna zapazyčanaści parafii śviatoha Symona i śviatoj Aleny ŭ Minsku

Kaścioł śviatoha Symona i śviatoj Aleny ŭ Minsku, viadomy jak «Čyrvony kaścioł», byŭ pabudavany ŭ 1910 hodzie. U 1932 hodzie byŭ začynieny. Spačatku ŭ im raźmiaściŭsia Dziaržaŭny polski teatr BSSR, potym jon byŭ pieraabstalavany pad Dom kino.

U 1990 hodzie budynak kaścioła byŭ pieradadzieny katolikam u biazvypłatnaje karystańnie bieź pieradačy jaho va ŭłasnaść parafii, što my ličym niespraviadlivym rašeńniem, bo jon byŭ pabudavany katolikami i pavinien im pa pravie naležać.

Za košt viernikaŭ i pry ich niepasrednym udziele raspačałosia adnaŭleńnie budynka śviatyni i parafijalnaha doma:

• vykanana ŭnutranaje pieraabstalavańnie kaścioła sa znosam mižpavierchavych pierakryćciaŭ, unutranych ścien i pieraharodak i adnaŭleńniem jaho pieršapačatkovaha vyhladu;
• ździejśniena zamiena dachu kaścioła i parafijalnaha doma mietaładachoŭkaj;
• adlityja i ŭstalavanyja na viežach i inšych elemientach kaścioła 9 bronzavych i 2 žaleznyja kryžy;
• nanava pabudavanyja padvalnyja pamiaškańni z kanfierenc-załaj, kłasami dla katechizacyi dziaciej i biblijatekaj;
• vykanana pakryćcio padłohi zały dla nabaženstvaŭ, halerei, padvalnych pamiaškańniaŭ z hranitu i marmuru ahulnaj płoščaj 1000 kv.m;
• zrobleny 5 ałtaroŭ z ružovaha marmuru;
• sprajektavany i adlity z bronzy centralnyja ŭvachodnyja dźviery;
• zamienieny vokny apsidy (trochpaviarchovaj prybudovy da budynka kaścioła);
• ustalavany ŭvachodnyja bakavyja dźviery ŭ budynak kaścioła;
• adrestaŭravany vitražy budynka kaścioła, halerei i hałoŭnaj viežy;
• dvojčy vykanana dobraŭparadkavańnie asfaltavym pakryćciom prylehłaj terytoryi vakoł kompleksu budynkaŭ płoščaju bolš za 700 kv.m;
• uźviedziena hranitnaja padpornaja ścienka pa pierymietry terytoryi kompleksu budynkaŭ, a taksama paradnyja schody z čyrvonaha hranitu da centralnaha ŭvachodu ŭ budynak kaścioła z boku płoščy Niezaležnaści;
• u 1996 h. pierad kaściołam była ŭstalavana skulptura Archanioła Michała, a ŭ 2000 hodzie — pomnik «Zvon Nahasaki».

Čyrvony kaścioł adyhryvaje vialikuju rolu nie tolki ŭ relihijnym, ale i ŭ kulturnym žyćci stalicy Biełarusi.

Akramia nabaženstvaŭ, tam pravodziacca raznastajnyja kulturnyja mierapryjemstvy, u tym liku vielmi papularnyja kancerty duchoŭnaj muzyki.

Zhodna z rasparadžeńniem prezidenta Respubliki Biełaruś ad 13 vieraśnia 2013 h. kompleks Čyrvonaha kaścioła z respublikanskaj ułasnaści pieradadzieny ŭ kamunalnuju ŭłasnaść horada Minska i ŭ biazvypłatnaje karystańnie relihijnaj supolnaści «Rymska-katalickaja parafija śviatoha Symona i śviatoj Aleny». Minharvykankam pieradaŭ jaho ŭ hacpadarčaje kiravańnie KUP «Minskaja spadčyna». U ciapierašni čas kompleks vykarystoŭvajecca parafijaj.

Za pieryjad karystańnia ŭ relihijnaj supolnaści nie było zapazyčanaściaŭ za akazańnie pasłuh zabieśpiačeńnia elektra- i ciepłaenierhijaj, vadoj, kanalizacyjaj i za apłatu rabot pa biahučym ramoncie i žyćciadziejnaści parafii.

Adnak paśla praviedzienaj u 2018-2019 hadach rekanstrukcyi kompleksu Čyrvonaha kaścioła, u pieršym kvartale 2020 hoda parafija atrymała dakumienty, u jakich ukazana, što, zhodna z zaklučanymi dahavorami biazvypłatnaha karystańnia, dadatkova zvyš kamunalnych płaciažoŭ štomiesiačnaja suma vypłat relihijnaj supolnaści na karyść KUP «Minskaja spadčyna» składaje 12 950, 39 rubloŭ jak kampiensavańnie za ziamielny padatak, amartyzacyju i padatak na nieruchomaść.

U ciapierašni čas zapazyčanaść parafii pierad KUP «Minskaja spadčyna» pa aznačanych płaciažach składaje bolš za 160 tys. rubloŭ. Pry hetym adsutničaje ŭsialakaja zapazyčanaść pa ŭsich kamunalnych płaciažach.

Takim čynam atrymlivajecca, što relihijnaj supolnaściu stračana prava na atrymańnie padatkovych ilhotaŭ pa vypłacie ziamielnaha padatku i padatku na nieruchomaść, harantavanych zakanadaŭstvam Respubliki Biełaruś, u suviazi z tym, što budynki kompleksu Čyrvonaha kaścioła naležać kamunalnamu budaŭniča-ekspłuatacyjnamu pradpryjemstvu «Minskaja spadčyna» na pravie haspadarčaha kiravańnia.

Dla daviedki:

1. U adpaviednaści ź dziejučym zakanadaŭstvam Respubliki Biełaruś, ziamielnyja ŭčastki, dadzienyja relihijnym arhanizacyjam pad kultavyja budynki i zbudavańni, nie abkładajucca ziamielnym padatkam, a kultavyja zbudavańni, jakija źjaŭlajucca ŭłasnaściu relihijnych supolnaściaŭ abo znachodziacca ŭ ich vałodańni, nie abkładajucca padatkam na nieruchomaść (artykuł 239, 228 NK RB).

2. Pastanova Savieta ministraŭ Respubliki Biełaruś

22 śniežnia 2012 h. № 1194

Ab zaćviardženni pieralikaŭ materyjalnych historyka-kulturnych kaštoŭnaściej, uklučanych u dziaržaŭny spis historyka-kulturnych kaštoŭnaściej Respubliki Biełaruś, jakija vyzvalajucca ad padatku na nieruchomaść, i ziemli, zaniatyja jakimi, vyzvalajucca ad ziamielnaha padatku i arendnaj płaty za ziamielnyja ŭčastki, što znachodziacca ŭ dziaržaŭnaj ułasnaści

Pavialičyć

Abodva hetyja dakumienty dajuć relihijnaj supolnaści prava pa ziamielnym padatku i padatku na nieruchomaść. Adnak parafija straciła prava na zhadanyja lhoty ŭ suviazi z tym, što kompleks budynkaŭ kaścioła sv. Symona i sv. Aleny nie naležyć relihijnaj supolnaści.

Parafija nieadnarazova źviartałasia da dziaržaŭnych uładaŭ z prośbaj adnavić histaryčnuju spraviadlivaść i pieradać kompleks Čyrvonaha kaścioła parafijalnaj supolnaści.

Adnak biezvynikova. Apošni raz takuju prośbu parafija nakiravała ŭ Minharvykankam u mai 2020 hoda. U adkazie ad 18 červienia 2020 h. adznačana, što ŭ ciapierašni čas Minharvykankam nie bačyć padstaŭ dla pieradačy budynka kaścioła i parafijalnaha doma va ŭłasnaść relihijnaj supolnaści.

My ŭdziačnyja za finansavy ŭdzieł dziaržavy ŭ restaŭracyi kompleksu budynkaŭ Čyrvonaha kaścioła — abjektaŭ historyka-kulturnaj kaštoŭnaści Respubliki Biełaruś, jakaja ździajśniałasia ŭpieršyniu za ŭsiu historyju isnavańnia nazvanych budynkaŭ. Adnak varta pamiatać, što na praciahu amal 30 hadoŭ zhadanyja budynki adnaŭlalisia i padtrymlivalisia siłami relihijnaj supolnaści. U pieryjad restaŭracyi kompleksu Čyrvonaha kaścioła parafija taksama nie zastałasia ŭ baku. Tut, pieradusim, varta adznačyć nabyćcio troch darahich bronzavych zvanoŭ, jakija byli ŭstalavanyja na viežy kaścioła.

U ciapierašni čas my nie bačym realnaj mahčymaści ažyćciaŭlać štomiesiačnyja vypłaty ŭ pamiery 12 950, 39 rubloŭ, vystaŭlenyja KUP «Minskaja spadčyna». Dla parafii jany niepadjomnyja, a taksama niespraviadlivyja.

Sa skazanaha vyšej naprošvajecca vysnova, što parafija na praciahu 75 hadoŭ (na stolki raźličany vypłaty za amartyzacyju) pavinna pakryć vydatkavanyja dziaržavaj srodki na restaŭracyju kaścioła i parafijalnaha doma, jakija naležać dziaržavie.

Atrymlivajecca tak, što dziaržava, nie pytajučysia ŭ parafii, jak byccam pazyčyła joj i ciapier patrabuje viartańnia.

Ale pra heta nie było havorki pierad pačatkam restaŭracyi.

U toj ža čas zhodna z rasparadžeńniem Prezidenta Respubliki Biełaruś ad 2013 h. «Ab biazvypłatnaj pieradačy majomaści» kompleks budynkaŭ kaścioła sv. Symona i sv. Aleny pryniaty z respublikanskaj ułasnaści va ŭłasnaść h. Minska i zamacavany na pravie haspadarčaha kiravańnia za KUP «Minskaja spadčyna» dla praviadzieńnia restaŭracyjnych prac.

My zaklikajem dziaržaŭnyja ŭłady pierahledzieć svajo rašeńnie, pieradać kompleks budynkaŭ Čyrvonaha kaścioła parafii i tym samym adnavić prava karystańnia padatkavymi ilhotami ŭ adpaviednaści z zakanadaŭstvam.

My taksama pierakanany, što tolki sumiesnymi namahańniami dziaržavy, viernikaŭ i ŭsich nieabyjakavych hramadzian budzie zachavana histaryčnaja spadčyna, jakoju źjaŭlajecca kompleks Čyrvonaha kaścioła, kab svaim vyhladam radavać voka žycharoŭ i haściej Minska, a nabaženstvami, jakija ździajśniajucca ŭ im, a taksama duchoŭnymi i kulturnymi mierapryjemstvami vychoŭvać čałavieka na niaźmiennych duchoŭnych kaštoŭnaściach!

• 0
• 0
• 0
• 0
• 0
• 0
• 0
• 0