Paśla vystupu Cichanoŭskaj u Jeŭraparłamiencie ŭchvalili rekamendacyi pa pierahladzie adnosinaŭ ES ź Biełaruśsiu
Pieramovy ab pryjarytetach partniorstva ES — Biełaruś nieabchodna prypynić da taho času, pakul u Biełarusi nie praviaduć novyja, svabodnyja i spraviadlivyja prezidenckija vybary, havorycca ŭ rekamendacyjach pa pierahladzie ES adnosinaŭ ź Biełaruśsiu, jakija pryniaŭ kamitet Jeŭraparłamienta pa zamiežnych spravach, piša «Svaboda».
Za pryniaćcie rekamiendacyj prahałasavali 60 čalcoŭ kamiteta, suprać — 7, ustrymaŭsia — 1, paviedamlaje pres-słužba JEP. U dakumencie adznačajecca, što pierahlad adnosin ź Biełaruśsiu nieabchodna zrabić z akcentam na tym, jak Jeŭrasajuz moža padtrymać hramadzianskuju supolnaść i narod Biełarusi.
U rekamiendacyjach adznačajecca, što kamitet:
- padtrymlivaje rašeńnie ES i krain-čalcoŭ nie pryznavać vyniki sfalsifikavanych prezidenckich vybaraŭ u Biełarusi: «Alaksandr Łukašenka nie budzie źjaŭlacca zakonnym prezidentam pa zakančeńni terminu jaho ciapierašnich paŭnamoctvaŭ 5 listapada»,
- padtrymlivaje narod Biełarusi ŭ jaho zakonnych patrabavańniach novych, svabodnych i spraviadlivych vybaraŭ i nastojvaje na poŭnaj adpaviednaści vybarčaha pracesu ŭ Biełarusi mižnarodnym standartam,
- pryznaje Kaardynacyjnuju radu, inicyjavanuju Śviatłanaj Cichanoŭskaj, zakonnym pradstaŭnikom naroda, jaki patrabuje demakratyčnych źmienaŭ i svabody ŭ Biełarusi,
- patrabuje nieadkładnaha spynieńnia hvałtu, žorstkich represij, katavańniaŭ i cisku na mirnych demanstrantaŭ, a taksama nieadkładnaha i biezumoŭnaha vyzvaleńnia ŭsich palityčnych viaźniaŭ, pradstaŭnikoŭ hramadzianskaj supolnaści i žurnalistaŭ,
- zaklikaje Jeŭrasajuz jak maha chutčej uvieści sankcyi ŭ dačynieńni da vialikaj hrupy biełaruskich słužbovych asob, u tym liku Łukašenki.
Rekamiendacyi taksama tyčacca pytańniaŭ ekanamičnaha i halinovaha supracoŭnictva ź Biełaruśsiu, kantaktaŭ pamiž ludźmi, atamnaj enierhietyki.
Ciapier rekamendacyi pavinny zaćvierdzić na sesii Jeŭraparłamienta, a potym nakiravać viarchoŭnamu pradstaŭniku Jeŭrasajuza pa źniešniaj palitycy i palitycy biaśpieki Žazepu Barelu, u Jeŭrakamisiju i va ŭrady krain-siabraŭ ES.
Kamientary