Chto takaja Ksienija Lebiedzieva, jakaja aśviatlaje žanočyja maršy dla BT
Žurnalistku BT Ksieniju Lebiedzievu mnohija pratestoŭcy bačyli na žanočych maršach. Biehaje za natoŭpam ź mikrafonam, isteryčna spračajecca z žančynami. U jaje repartažach vy nie pabačycie, jak ciahajuć žančyn za vałasy i zakidvajuć ich u aŭtazak, jak miech ź zierniem. Zatoje pačujecie, što damy sami nie viedajuć, čaho chočuć, a pratest źlivajecca.
«Naša Niva» daviedałasia bolš pra asobu karespandentki.
Žanočy partał i isłam
Ksienija rodam z Mahilova. Zavočna vučyłasia na žurnalista i paralelna pracavała karespandentkaj na žanočym partale Velvet.by. Pisała pra modu, rabiła intervju ź sielebryci. Redaktary partała kažuć, što teksty byli nie bliskučyja, davodziłasia šmat pravić, zatoje Ksienija dobra fatahrafavała.
Na partale dziaŭčyna viała svoj błoh — pad proźviščam Alchmam. Heta nie psieŭdanim: Ksienija była zamužam za zamiežnikam i vyznavała isłam.
«U 2010 hodzie ŭ mianie byŭ niepryjemny pierałomny momant u žyćci. Ja straciła padtrymku blizkich, sutyknułasia ź nierazumieńniem, a tak zvanyja siabry kudyści źnikli. Stała nie toje, kab strašna, a źjaviłasia bolš niavyznačanaściaŭ, bolš składanaściaŭ, ad jakich zachaciełasia zakrycca.
U toj momant źmianiłasia sistema kaštoŭnaściaŭ i staŭleńnie da siamji, da žyćcia.
Jašče ŭ škole mianie strašna zachaplali raskazy našaj histaryčki pra musulman, ja pačała bolš čytać pra isłam, kamunikavać ź ludźmi hetaj relihii. I ŭ niejki momant zrazumieła, što mnie heta blizka.
Na žal, nie mahu pachvalicca tym, što ja ruplivaja musulmanka, ale mnie kamfortna ŭ hetaj relihii»,
— pisała žurnalistka ŭ svaim błohu.
Praź niekalki hod jana raźviałasia. Tłumačyła, što sama była inicyjataram: nie ryzyknuła źjechać u absalutna inšuju krainu.
«Samym važnym momantam było pačuć ad muža «tałak», čto značyć «razvod». Pa musulmanskaj tradycyi muž pavinien vymavić heta trojčy, paśla čaho žančyna svabodnaja. Nu a potym užo hramadzianski sud i hetak dalej», — apisvała praces Ksienija.
Pa ŭspaminach adnoj z kaleh, pracu na partale dziaŭčyna ličyła časovaj, bo maryła pra telebačańnie. I hadoŭ piać tamu hetaja mara ździejśniłasia.
Šlach na telebačańni i zdymki ŭ kupalniku
Vypuski Ksienii na «Biełaruś 1» byli na roznyja temy. Pra novy rejs u Pałanhu, Pastaŭski małočny zavod, jubilej Vaŭkavyska i toje, jak nie atrućcica kavunom. Vychodzili taksama vialikija śpiecrepartažy pra arendnyja aziory i ludziej, što zastalisia žyć u čarnobylskaj zonie.
Za karotkamietražny film «Vioska Dudzičy» (pra adzinokuju babulu z adsielenaj zony) žurnalistka atrymała Hran-pry moładzievaha konkursa dakumientalnaha kino sacyjalnaj skiravanaści «Jeŭrazija.DOC: 4 chviliny».
Letaś Ksienija razam z kalehami (naprykład, Palinaj Šubaj) źniałasia ŭ imidžavym roliku ATN. U kupalniku płavała ŭ pałoncy na nadzimanym kole.
Ale palityčnych siužetaŭ da vybaraŭ nie było zaŭvažna (chiba tolki pra śviatočnuju atmaśfieru ŭ dzień parłamienckich vybaraŭ).
«Jana kazała, što pracuje ŭ sielhasredakcyi, bo ŭ palityčny adździeł nie prabracca. Tam šmat płaciać, vielmi vialikaja kankurencyja», — dzialiłasia znajomaja žurnalistki.
Razvahi pra boršč i pracu la stanka
Užo ŭ vieraśni Ksienija rychtavała repartažy pra zabastoŭki rabočych i žanočyja maršy. U kadry kazała, što choča pakazać roznyja punkty hledžańnia. Ale karcinku supravadžała źjedlivymi kamientarami.
«Och užo heta padtrymka, dapamahli b materyjalna, prosta dapamahli. Słova «prosta» hučyć ad kožnaha, napeŭna, sapraŭdy stajać prosta, a pracavać la stanka — nie», — kpiła jana z haradžan, jakija pryjšli vykazać salidarnaść z rabočymi MTZ.
«Telehram-kanały im pisali, što zbor na płoščy Pieramohi, ale ŭ apošni momant zrabili staŭku na Kamaroŭku. Napeŭna, boršč važniejšy,
— heta ŭžo Lebiedzieva kamientuje apošni žanočy marš. — Nie prajšło i dźviuch hadzin, jak marš zdźmuŭsia. Napeŭna, dziaŭčaty zhubili kaardynatara».
Žurnalistka pracuje biez kamizelki i biare intervju naŭprost pad voknami busikaŭ, ale milicyja jaje nie čapaje. BT, zrešty, paznajuć i haradžanie — admaŭlajucca razmaŭlać ci nazyvajuć dziaržkarespandentaŭ zambiravanymi i pradažnymi.
Karespandentka, darečy, była ŭ liku zaprošanych na inaŭhuracyju Łukašenki 23 vieraśnia.
Byłyja kalehi kažuć, što Ksienija niadrenny i družalubny čałaviek. Ale vielmi paddajecca ŭpłyvu.
«Jość u jaje rysa — impulsiŭnaść. Toj, chto pobač, na jaje ŭździejničaje, i jana, nie abdumaŭšy, dziejničaje. U joj niama ni złosnaści, ni pradumanaści».
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
«This f*cking AI». Pierakładčyk Łukašenki pry prezidencie AAE vykarystaŭ niedypłamatyčnaje słova7
Kamientary