Milinkievič adkryŭ u Varšavie navučalnuju prahramu dla represavanych biełaruskich studentaŭ

Siońnia ŭ Varšavie lider abjadnanych demakratyčnych sił Biełarusi Alaksandr Milinkievič daŭ start navučalnaj prahramie imia Kastusia Kalinoŭskaha, dziakujučy jakoj 214 biełaruskich studentaŭ, paciarpiełych za aktyŭny ŭdzieł u vybarčaj kampanii i pratestach paśla prezidenckich vybaraŭ, zmohuć praciahnuć navučańnie ŭ VNU Polščy.

Uračystaja cyrymonija inaŭhuracyi navučalnaj prahramy adbyłasia siońnia ŭviečary ŭ Varšaŭskim univiersitecie. Biełaruskich studentaŭ vitali premjer-ministr Polščy Kazimiež Marcinkievič i śpikier Sienatu Polščy Bohdan Barusievič.

Adkryvajučy prahramu lider abjadnanych demakratyčnych sił Biełarusi Alaksandr Milinkievič padziakavaŭ polskamu ŭradu za salidarnaść z represavanymi biełarusami i źviarnuŭsia ź vitalnym słovam da studentaŭ:

- Svaimi mužnymi ŭčynkami vy vykazali ŭłasnuju hramadzianskuju pazicyju i svaju luboŭ da Biełarusi. Maju nadzieju, što vymušanaje navučańnie za miažoj stanie dla vas jaskravym śviedčańniem taho, što realnaść, jakaja panuje ŭ našaj krainie – nie adzinaja mahčymaja. Vy atrymali mahčymaść bačyć žyćcio ź inšaj pierśpiektyvy. Ja vieru, što heta acenka dapamoža vam pryniać pravilnyja rašeńni i ruchacca ŭpierad, - skazaŭ Alaksandr Milinkievič.

Alaksandr Milinkievič paprasiŭ taksama studentaŭ nie aceńvać stvoranyja dla navučańnia mahčymaści jak uznaharodu, a tolki jak mahčymaść atrymać dastojnyja jeŭrapiejskija viedy, jakija buduć abaviazkova zapatrabavanyja ŭ demakratyčnaj Biełarusi.

- Ja spadziajusia, što taja adukacyja, jakuju vy atrymajecie pa-za miežami rodnaj Baćkaŭščyny, daść šturšok vašaj dalejšaj prafiesijnaj karjery i dapamoža zbudavać novuju Biełaruś z mocnaj ekanomikaj, z demakratyčnymi svabodami. Biełaruś, jakaja budzie adkryta da mižnarodnaj supracy, i jakuju buduć šanavać nie tolki ŭ Jeŭropie, a va ŭsim śviecie. Pryjdzie čas i źjavicca vialiki popyt na hodnych ludziej z dobraj adukacyjaj. Jakaja b nie była vaša prafiesija, viedajcie, što vy patrebny svajoj krainie i jana jašče budzie hanarycca vami, - adznačyŭ Alaksandr Milinkievič.

Pačynajučy z 6 lipienia biełaruskija studenty buduć intensiŭna vyvučać polskuju movu. U žniŭni dla ich buduć arhanizavanyja aznajamlenčyja padarožžy pa Polščy. Płanujecca, što moładź ŭbačyć histaryčnyja miaściny Polščy, i naviedaje taksama univiersiteckija harady, jakija ad pačatku kastryčnika prymuć biełaruskich studentaŭ.

Pavodle ŭmovaŭ prahramy, pieravažnaja bolšaść studentaŭ praciahnie navučańnie na tych fakultetach, na jakich navučałasia ŭ Biełarusi. Mahčymaść źmianić fakultet buduć mieć tolki tyja studenty, jakija byli vyklučanyja za palityčnuju dziejnaść ź pieršaha kursu.

Prahrama navučalnych stypiendyjaŭ dla biełaruskich studentaŭ, paciarpiełych u vyniku palityčnaj kampanii biahučaha hoda, była zasnavanaja 30 sakavika ŭ Varšaŭskim univiersitecie premjer-ministram Polščy, lideram abjadnanych demakratyčnych sił Biełarusi Alaksandram Milinkievičam i rektarami vyšejšych navučalnych ustanovaŭ Polščy.

Prahrama raźličanaja na 300 miescaŭ i da 15 lipienia jana zastajecca adkrytaj. 10 miescaŭ u navučalnych ustanovach dla biełaruskich studentaŭ prapanavaŭ taksama ŭrad Estonii. Jość prapanovy ad Niamieččyny, Čechii, Słavaččyny, Aŭstryi i Narviehii. Isnuje mahčymaść zavočnaha navučańnia va Ukrainie, jakaja hatovaja vyłučyć 100 miescaŭ dla represavanych biełaruskich studentaŭ.

• 0
• 0
• 0
• 0
• 0
• 0
• 0
• 0