Bolš za pałovu ŭstanoŭ Homielskaj vobłaści, raźmieščanych na «Kufary», pradajucca z-za pierajezdu haspadaroŭ
U studzieni źjaviłasia infarmacyja ab prodažy adnoj z ustanoŭ hramadskaha charčavańnia Śvietłahorska. Pryčyna prodažu — pierajezd haspadaroŭ u inšuju krainu. Paśla analizu ŭsich padobnych abjaŭ vyśvietliłasia, što bolš za pałovu ŭstanoŭ usioj Homielskaj vobłaści, raźmieščanych na kufar.by, pradajecca pa pryčynie źmieny miesca žycharstva ŭłaśnikaŭ. Heta siem abjektaŭ z dvanaccaci, piša lovesun.by.
Čatyry ŭstanovy hramadskaha charčavańnia znachodziacca ŭ Žłobinie i pa adnym u Śvietłahorsku, Homieli i Rečyckim rajonie.
«Marvieł burhier» u Homieli
U abłasnym centry terminova pradajecca kaviarnia. Dyzajn ustanovy raspracavany ŭ stylistycy amierykanskich komiksaŭ.
Za svoj biznes ułaśnik choča 34 tysiačy rubloŭ.
«Usio pracuje. Ramont śviežy […] TERMINOVA pradaju ŭ suviazi ź pierajezdam».
Sietka ustanoŭ u Žłobinie
Try ŭstanovy ź niadrennymi łakacyjami pradajucca ŭ Žłobinie. Ułaśnik kaža ab dobraj dachodnaści i zusim nievysokim košcie prodažu, kab «viarnuć układańni».
«Prosta zapuskajcie i łavicie chajp»
U Žłobinie pradajecca jašče adna, ale ŭžo zusim novy kijosk z raspracavanym mieniu, dyzajnam i łahatypam. Abjekt jašče navat nie adkryŭsia, ale va ŭłaśnika źnikła žadańnie zajmacca hetym biznesam.
«Jość usio nieabchodnaje dla startu […] płošča «Kupavy» 50 kv. m. Hetak ža terytoryja aharodžanaja +50 kv. m. Raźmieščana ŭ adnym z najlepšych miescaŭ horada, heta centr, vielmi vysoki trafik prachodnaści».
Kafe «Maksim» pad Rečycaj
Prydarožnaje kafe płoščaj 450 kv. mietraŭ. Niekalki załaŭ. Usio nieabchodnaje abstalavańnie i tysiačy klijentaŭ za 16 hadoŭ pracy.
Usio heta pradajecca za $300 tysiač «ŭ suviazi ź pierajezdam ŭładalnika na inšaje miesca žycharstva».
Rock Star u Śvietłahorsku
Mabilnaja burhiernaja adkryłasia letam, adnak užo ciapier biznes pradajecca i taksama z-za pierajezdu.
Za 26 tysiač rubloŭ novamu haspadaru dastaniecca całkam abstalavany paviljon, technałahičnyja karty, śpis pastaŭščykoŭ, Instagram-akaŭnt i zapaminalny numar telefona dla zamovy dastaŭki.
Kamientary