Budynak suda akružany, usie pasiadžeńni admienienyja. Jak pačynajecca praces pa «spravie Biełhazprambanka»
4 lutaha pačałosia papiaredniaje sudovaje pasiadžeńnie pa «spravie Biełhazprambanka», jaho razhladaje Viarchoŭny sud u budynku suda Maskoŭskaha rajona. Budynak suda zastaŭleny mietaličnymi aharodžami, pa pierymietry dziažurać siłaviki ŭ bałakłavach, dla naviedvalnikaŭ sud začynieny da 15.00, usie pasiadžeńni admienienyja. Pryniatyja biesprecedentnyja miery biaśpieki, jakich nie było navat pa spravie ab vybuchu ŭ mietro, piša Tut.by.
Ab papiarednim pasiadžeńni pa spravie stała viadoma napiaredadni. Pres-słužba Viarchoŭnaha suda admoviłasia dapuścić na praces žurnalistaŭ najbujniejšych niezaležnych miedyja Tut.by, «Naša Niva», Onliner, BiełaPAN, «Komsomolskaja pravda v Biełarusi» i inš. Aficyjnaja pryčyna — prafiłaktyka karanavirusa, adnak na pracesie pa «spravie Uciuryna», jaki taksama Viarchoŭny sud razhladaŭ u budynku suda Maskoŭskaha rajona, takich vyklučeńniaŭ nie było, choć užo tady była pandemija.
Pa «spravie Biełhazprambanka» prachodzić vosiem fihurantaŭ: Viktar Babaryka («admyvańnie» srodkaŭ, atrymanych złačynnym šlacham; atrymańnie chabaru ŭ asabliva bujnym pamiery), Alaksiej Zadojka, Kirył Badziej, Siarhiej Šaban, Dźmitryj Kuźmič, Alaksandr Iljasiuk, Siarhiej Dabralot (usie — atrymańnie chabaru ŭ asabliva bujnym pamiery), Viktar Kabiak (dača chabaru paŭtorna albo ŭ bujnym pamiery).
Z šaściu abvinavačanymi zaklučany dasudovyja pahadnieńni (z Badziejem, Dabralotam, Kuźmičom, Iljasiukom, Šabanam, Kabiakom zaklučany dasudovyja pahadnieńni ab supracoŭnictvie), Viktar Babaryka ŭ ich lik nie ŭvachodzić, tamu na papiarednim sudovym pasiadžeńni jaho siońnia niama. Abvinavačanyja, jakija zaklučyli pahadnieńnie, zajavili ŭ sudzie, što pajšli na heta dobraachvotna i vykanali ŭsie ŭmovy.
Abaronu abvinavačanych ažyćciaŭlajuć bolš za dziesiać advakataŭ, siarod ich siońnia na pracesie byli zaŭvažanyja Hanna Kieler, Maksim Ahiejeŭ, Alaksandr Paŭłaviec, Siarhiej Bujakievič.
Na papiaredniaje pasiadžeńnie pryjšli rodnyja i kalehi abvinavačanych, častku słuchačoŭ, niahledziačy na svabodnyja miescy ŭ zale, na pasiadžeńnie nie puścili.
U pieršym šerahu na pracesie zaŭvažany Juryj Vaskrasienski, jaki dva miesiacy pravioŭ u izalatary pa abvinavačvańni va ŭdziele ŭ masavych biesparadkach. Na dziaržaŭnych telekanałach jaho nazyvali idejnym natchnialnikam pratestaŭ, u tych intervju jon raspaviadaŭ, jak ludzi Babaryki i Cichanoŭskaj chacieli zachapić uładu.
U vyniku stała viadoma, što asnoŭnaje sudovaje pasiadžeńnie pa «spravie Biełhazprambanka» pryznačanaje na 17 lutaha, 11.00. Praces budzie adkryty.
-
Ivan Prus raskazaŭ, jak nažyŭsia na 200 dalaraŭ, pasialiŭšy kinazorku va ŭbitaj kvatery kala zvałki ŭ Šabanach, abstaŭlenaj rečami ź jaho internata
-
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»
-
Litoŭskija pamiežniki znajšli na miažy ź Biełaruśsiu partyju cyharet na 260 tysiač jeŭra
Ciapier čytajuć
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»3
Kamientary