Будынак суда акружаны, усе пасяджэнні адмененыя. Як пачынаецца працэс па «справе Белгазпрамбанка»
4 лютага пачалося папярэдняе судовае пасяджэнне па «справе Белгазпрамбанка», яго разглядае Вярхоўны суд у будынку суда Маскоўскага раёна. Будынак суда застаўлены металічнымі агароджамі, па перыметры дзяжураць сілавікі ў балаклавах, для наведвальнікаў суд зачынены да 15.00, усе пасяджэнні адмененыя. Прынятыя беспрэцэдэнтныя меры бяспекі, якіх не было нават па справе аб выбуху ў метро, піша Tut.by.
Аб папярэднім пасяджэнні па справе стала вядома напярэдадні. Прэс-служба Вярхоўнага суда адмовілася дапусціць на працэс журналістаў найбуйнейшых незалежных медыя Tut.by, «Наша Ніва», Onliner, БелаПАН, «Комсомольская правда в Беларуси» і інш. Афіцыйная прычына — прафілактыка каранавіруса, аднак на працэсе па «справе Уцюрына», які таксама Вярхоўны суд разглядаў у будынку суда Маскоўскага раёна, такіх выключэнняў не было, хоць ужо тады была пандэмія.
Па «справе Белгазпрамбанка» праходзіць восем фігурантаў: Віктар Бабарыка («адмыванне» сродкаў, атрыманых злачынным шляхам; атрыманне хабару ў асабліва буйным памеры), Аляксей Задойка, Кірыл Бадзей, Сяргей Шабан, Дзмітрый Кузьміч, Аляксандр Ільясюк, Сяргей Дабралёт (усе — атрыманне хабару ў асабліва буйным памеры), Віктар Кабяк (дача хабару паўторна альбо ў буйным памеры).
З шасцю абвінавачанымі заключаны дасудовыя пагадненні (з Бадзеем, Дабралётам, Кузьмічом, Ільясюком, Шабанам, Кабяком заключаны дасудовыя пагадненні аб супрацоўніцтве), Віктар Бабарыка ў іх лік не ўваходзіць, таму на папярэднім судовым пасяджэнні яго сёння няма. Абвінавачаныя, якія заключылі пагадненне, заявілі ў судзе, што пайшлі на гэта добраахвотна і выканалі ўсе ўмовы.
Абарону абвінавачаных ажыццяўляюць больш за дзесяць адвакатаў, сярод іх сёння на працэсе былі заўважаныя Ганна Келер, Максім Агееў, Аляксандр Паўлавец, Сяргей Буякевіч.
На папярэдняе пасяджэнне прыйшлі родныя і калегі абвінавачаных, частку слухачоў, нягледзячы на свабодныя месцы ў зале, на пасяджэнне не пусцілі.
У першым шэрагу на працэсе заўважаны Юрый Васкрасенскі, які два месяцы правёў у ізалятары па абвінавачванні ва ўдзеле ў масавых беспарадках. На дзяржаўных тэлеканалах яго называлі ідэйным натхняльнікам пратэстаў, у тых інтэрв'ю ён распавядаў, як людзі Бабарыкі і Ціханоўскай хацелі захапіць уладу.
У выніку стала вядома, што асноўнае судовае пасяджэнне па «справе Белгазпрамбанка» прызначанае на 17 лютага, 11.00. Працэс будзе адкрыты.
-
Літоўскія памежнікі знайшлі на мяжы з Беларуссю партыю цыгарэт на 260 тысяч еўра
-
«Паша, я табе не веру». Севярынец расказаў, як выпадковая дзяўчына матывавала яго назаўсёды перайсці на беларускую мову
-
«Яна не дачакала гэтага дня, але гэты дзень дачакаў яе»: Ларысе Геніюш пасмяротна выдалі Нацыянальны пашпарт Беларусі
Цяпер чытаюць
Топавы перакладчык паехаў у Беларусь мяняць пашпарт — і сеў за данаты. «КДБ паглядзеў на суму і вырашыў, што ніхто ў здаровым розуме не можа выдаткаваць столькі ўласных грошай»
Каментары