Krynicy: Ułaśniku handlovaj sietki Green naličyli $5 miljonaŭ za vychad ź SIZA
Bujny pradprymalnik, suzasnavalnik firmy «Rapa» Hienadź Kirejkaŭ byŭ zatrymany ŭ pačatku lutaha.
Čytajcie. «Kampaniju my vyrazajem»: zatrymany ŭłaśnik kramaŭ «Hryn» i HC «Skała» Hienadź Kirejkaŭ
Pa čutkach, jakija hulajuć u biznes-kołach, realnaj pryčynaj zatrymańnia Kirejkava i nastupnych pahroz i sankcyj u dačynieńni da kampanii stała pazicyja asobnych mieniedžaraŭ sietki Green, jakija prymali aktyŭny ŭdzieł ŭ pratestach suprać biezzakońnia i falsifikacyi vybaraŭ.
Ci mahło być takoje, što kampanija sapraŭdy admoviłasia brać na realizacyju tavary asobnych dziaržaŭnych vytvorcaŭ? Niekatoryja surazmoŭcy «Našaj Nivy» dapuskajuć takuju imaviernaść, ale zadajucca pytańniem, u čym tut moža być kryminał.
Jak ciapier spravy ŭ Green? Nieviadoma ni pra adnu kramu, jakaja b zakryłasia. Abaznanyja navat kažuć, što sietka maje płany pa pašyreńni.
A voś samomu Hienadziu Kirejkavu, jak kažuć blizkija, užo nazvali «sumu za vychad», jaje pačali źbirać.
«Heta zvyčajnaja praktyka, kali biznesmienu ahučvajuć sumu «vykupu». Mohuć na papierčynie napisać, mohuć aficyjna naličyć dla «kampiensacyi škody» ŭ ramkach Kryminalnaha kodeksa. Amal lubomu bujnomu biznesmienu možna niešta «naličyć», usie žyvuć u Biełarusi, razumiejučy, što taki dzień niekali moža nastać», — tłumačać krynicy ź biznes-asiarodkaŭ.
U vypadku Kirejkava nazyvajuć sumu piać miljonaŭ dalaraŭ.
Tym nie mienš zatrymańnie biznesoŭca ŭžo ŭdaryła pa budoŭli handlova-zabaŭlalnaha kompleksa na miescy Červieńskaha rynku.
Nakolki nam viadoma, u suviazi z zatrymańniem hałoŭnaha akcyjaniera budoŭla pačała hublać abaroty. Fatohraf «Našaj Nivy» zaśpieŭ rabočych, ale ich byli adzinki.
Budaŭnictva handlova-zabaŭlalnaha kompleksa miełasia pačacca jašče ŭ 2013-m, kali drobnych kamiersantaŭ vyhnali ź placoŭki.
Ale niekalki ŭładalnikaŭ ziamli adzin za adnym jaje pazbaŭlalisia, nie prajaŭlajučy impetu ŭ budaŭnictvie. Pakul u 2019-m «Rapa» i braty Kimy nie vykupili kampaniju z pravam budaŭnictva.
Handlova-zabaŭlalny kompleks maje źjavicca ŭžo ŭ 2023-m.
Kamientary